ភ្នំពេញ៖ បេីយោងតាមសេចក្តីជូនដំណឹងរបស់រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៣០ ខែមិថុនា ឆ្នាំ២០២១កន្លងទៅថ្មីៗនេះ បានប្រកាសស្តីពីការដេញថ្លៃឈ្នួល ដាយត្រី ដាយត្រីលេញ និងដាយបង្កង សម្រាប់ឱ្យធ្វើអាជីវកម្ម ក្នុងរដូវនេសាទ ឆ្នាំ២០២១- ២០២២ និងឆ្នាំ ២០២២-២០២៣ នៅរដ្ឋបាលជលផល រាជធានីភ្នំពេញ ខេត្តកណ្តាល និង ខេត្តព្រៃវែង។
ជាក់ស្ដែងនៅក្នុងសេចក្តីជូនដំណឹងលេខ ១២៥០ ជផ ដែលចុះហត្ថលេខាដោយ ប្រតិភូរាជរដ្ឋាភិបាល ទទួលបន្ទុកជា ប្រធានរដ្ឋបាលជលផល លោក ពុំ ស៊ីថា បានបញ្ជាក់ថា៖ ការដេញថ្លៃ នៅខេត្តព្រៃវែង ធ្វើឡើងនៅព្រឹក ថ្ងៃទី៣ ខែសីហា ឆ្នាំ២០២១, នៅខេត្ត កណ្តាល ព្រឹកថ្ងៃទី៥ ខែសីហា និងនៅរាជធានីភ្នំពេញ ព្រឹកថ្ងៃទី៩ ខែសីហា ឆ្នាំ ២០២១។
ប្រភពដដែល បន្តថា ការដេញថ្លៃឈ្នួលដាយត្រី ដាយត្រីលេញ និង ដាយបង្កង ត្រូវបានកំណត់ ឱ្យធ្វើអាជីវកម្មនេសាទ ក្នុងរយៈពេលពីរ រដូវនេសាទជាប់គ្នា។ ការកំណត់ថ្លៃឈ្នួល ដាយត្រី ដាយត្រីលេញ និង ដាយបង្កងដែលដាក់ឱ្យ ដេញថ្លៃ និងការឱ្យដេញថ្លៃ ដាយត្រី ដាយត្រីលេញ និងដាយបង្កង របស់អ្នកដេញថ្លៃ គឺជាឈ្នួលដាយត្រី ដាយត្រីលេញ និង ដាយបង្កង សុទ្ធសាធ សម្រាប់ធ្វើអាជីវកម្ម ក្នុងមួយ រដូវនេសាទ គឺរដូវនេសាទទី១ ហើយរដូវនេ សាទទី២ ក៏ត្រូវបង់ថ្លៃឈ្នួល ដាយត្រី ដាយត្រីលេញ និង ដាយបង្កង ដូវរដូវនេសាទទី១ ដែរ។
លើសពីនេះ រដ្ឋបាលជលផល បានបញ្ជាក់បន្ថែមថា ចំពោះអ្នកមានបំណង ចូលរួមដេញថ្លៃ ធ្វើអាជីវកម្មខាងលើនេះ ត្រូវទៅសុំយកបែប បទដេញថ្លៃ នៅតាមរដ្ឋបាលជលផល រាជធានី ខាងលើ ។ ដាយត្រីដែលត្រូវដាក់ឱ្យ ដេញថ្លៃ នៅរាជធានីភ្នំពេញ មានចំនួន១២ នៅខេត្តកណ្តាល ចំនួន២១ នៅខេត្តព្រៃវែង ដាយត្រីលេញ ចំនួន៥ និង ដាយបង្កង ចំនួន១៣៕ដោយ៖សហការី
រូបភាព៖ឯកសារ
