ខេត្តសៀមរាប៖ បើតាមការបញ្ជាក់ពីប្រធានសហគមន៍ទេសចរណ៍ខេត្តសៀមរាប លោក គង់ មង្គល បានថ្លែងថា បច្ចុប្បន្ននេះយេីងសង្កេតឃេីញថាសត្វស្លាបទឹកច្រើនប្រភេទ បានបង្ហាញខ្លួនក្នុងបឹងពារាំងវិញហើយ បន្ទាប់ពីបានចាកចេញពីបឹងនេះ កាលពីរដូវប្រាំងនាពេលកន្លងទៅ។
ប្រធានសហគមន៍ទេសចរណ៍រូបនេះ បានថ្លែងឱ្យដឹងនៅថ្ងៃទី១៩ ខែកក្កដា ឆ្នាំ២០២១នេះថា៖ ក្រោយបញ្ចប់ពិធីប្រុងពលីបួងសួងសុំសេចក្តីសុខ ក្នុងការបើកការដ្ឋានជីកស្តារបឹងនៅកោះលោកយាយនៃបឹងពារាំង កាលពីថ្ងៃទី១៧ខែកក្កដាថ្មីៗនេះ នារដូវប្រាំងទឹកក្នុងបឹងនេះរីងហួតអស់ស្ទើទាំងស្រុង សត្វស្លាប់រាប់រយប្រភេទ បានចាកចេញពីបឹងនេះឆ្ពោះទៅបឹងទន្លេសាប និងបឹងផ្សេងៗដែលមានទឹក។
លោក គង់ មង្គល ថ្លែងបន្តទៀតថា ចំណែកត្រីមេពូជបានងាប់ជាបន្តបន្ទាប់រៀងរាល់ថ្ងៃស្ទើតែដាច់ពូជ។ រីឯប្រភេទសត្វល្មូន ក៏បាត់វត្តមានមួយចំនួនផងដែរ។ ប៉ុន្តែនៅដើមរដូវវស្សានេះ ដោយមើលឃើញថាចាំបាច់ត្រូវសង្គ្រោះបន្ទាន់ ទាំងបច្ចុប្បន្ន និងទៅអនាគត អាជ្ញាធរក្រុង ខេត្ត និង អាជ្ញាធរពាក់ពន្ធ័ ពិសេសរដ្ឋមន្ត្រីក្រសួងកសិកម្ម សម្រេចផ្តល់សិទ្ធិអោយមាន ការជីកស្តារបឹងដើម្បីរក្សាទឹកផ្តល់ជាជម្រកត្រីនិងសត្វគ្រប់ប្រភេទយើងប្រទះឃើញហ្វូងសត្វស្លាបទឹកបង្ហាញខ្លួន មកវិញជាបណ្តើរៗហើយ។ ក្រៅពីនោះត្រីមេពូជដែលនៅសល់ពីការងាប់ ក៏ចាប់ផ្តើមបង្កើតពងនិងកូនជាបណ្តើរៗ ដូចគ្នាផងដែរ។
បន្ថែមពីនេះ ប្រធានសហគមន៍រូបនេះ អះអាងទៀតថា ការជីកស្តារបឹងនេះ អាជ្ញាធរសម្រេចឱ្យជីកប្រមាណ៩០ហិកតា។ តែក្នុងជំហានដំបូងជីក១០ហិកតាសិន ត្បិតរដូវវស្សាចូលមកដល់ ពុំទាន់អាចសម្រេចបានទាំងស្រុង។ ប៉ុន្តែបឹងពារាំង និងក្លាយជាទីជម្រកសត្វស្លាបទឹក ប្រ ភេទសត្វល្មូន និងត្រីមេពូជដ៏សំខាន់។ ក្រៅពីនោះបឹងធម្មជាតិមួយនេះក៏នឹងក្លាយជាតំបន់ទេសចរធម្មជាតិមួយទៀត តាមរយៈផ្ទៃទឹកល្វឹងល្វើយ និងទេស ភាពព្រៃលិចទឹកខៀវស្រងាត់ បន្ទាប់ពីជីកស្តារនិងរៀប ចំរួចរាល់តាមលក្ខណ:ស្តង់ដារ។
សូមជម្រាបថា បឹងពារាំងមួយនេះ ជាបឹងធម្មជាតិធំមួយស្ថិតក្នុងមូលដ្ឋានសង្កាត់ជ្រាវ ក្រុងសៀមរាប។ នៅផ្នែកខាងត្បូងជាប់ជាយផ្ទៃបឹងទន្លេសាប និងមានចម្ងាយប្រមាណប្រាំពីរគីឡូម៉ែត្រពីទីប្រជុំជនសង្កាត់ជ្រាវផងដែរ។
ជាចុងក្រោយ លោក គង់ មង្គល បានសង្កត់ធ្ងន់ថា៖ ដោយមានការអនុញ្ញាតិច្បាប់យ៉ាងត្រឹមត្រូវក្នុងការជីកស្តារ ទើបរូបលោក រួមទាំងមន្ទីរពាក់ពន្ធ័ អាជ្ញាធរសង្កាត់.ក្រុង និងតំណាងក្រុមហ៊ុនគ្រឿងចក្រ សម្រេចធ្វើពិធីប្រុងពលី សុំសេចក្តីសុខក្នុងការបើកការដ្ឋានជីកស្តារបឹងពារាំងបែបនេះ៕ដោយ៖សហការី
