ភ្នំពេញ៖ ជនសង្ស័យម្នាក់ក្នុងចំណោមបក្ខពួក៣នាក់ ត្រូវបានបុរសនិងស្រ្តីជនជាតិបាំរាំង២នាក់ដេញតាមចាប់ខ្លួនយកប្រគល់ឲ្យសមត្ថកិច្ចនគរបាលប៉ុស្តិ៍ផ្សារកណ្ដាលទី១ បន្ទាប់ពីជនសង្ស័យរូបនេះ បានធ្វើសកម្មភាពឆក់កាបូបស្ពាយបានសម្រេចហើយ ព្យាយាមរត់គេចខ្លួនតែត្រូវបុរសដែលជាសង្សារស្ត្រីរងគ្រោះដេញតាមចាប់បានម្នាក់ ចំណែកឯបក្ខពួក២នាក់ទៀតរត់គេចខ្លួនបាត់ ។

ករណីឃាត់ខ្លួនជនសង្ស័យខាងលើនេះ បានកើតឡើងនៅវេលាម៉ោង៤ និង៣០រសៀលថ្ងៃទី២១ ខែមិនា ឆ្នាំ ២០១៦ នៅចំណុចលើសួនច្បារមាត់ទន្លេ តាមបណ្ដោយផ្លូវព្រះសុីសុវត្តិ សង្កាត់ផ្សារកណ្ដាលទី១ ខណ្ឌដូនពេញ ។

តាមប្រភពព័ត៍មានពីសមត្ថកិច្ចបានឲ្យដឹងថា ជនសង្ស័យដែលត្រូវឃាត់ខ្លួនឈ្មោះ អឹុម សុភ័ក្រ្ត ភេទប្រុស អាយុ១៨ឆ្នាំ មុខរបរនិងទីកន្លែងស្នាក់នៅមិនពិតប្រាកដ និងបក្ខពួក២នាក់ទៀតដែលរត់គេចខ្លួននោះមិនត្រូវបានស្គាល់ឈ្មោះ ។ រីឯវត្ថុតាំងមានដកហូតបានកាបូបស្ពាយ១មកវិញ ។ ចំណែកឯស្រ្តីរងគ្រោះឈ្មោះ Sabadem Bourj អាយុ២៤ឆ្នាំ ជនជាតិបារាំង មុខរបរទេសចរណ៍ ស្នាក់នៅផ្ទះក្នុងសង្កាត់ស្រះចក ខណ្ឌដូនពេញ ។

ប្រភពដដែរ បានបន្តទៀតថា នៅមុនពេលកើតហេតុគឺ ស្ត្រីរងគ្រោះនិងមិត្តប្រុសជាជនជាតិបារាំងបាននាំគ្នាទៅអង្គុយលេងនៅមាត់ទន្លេ ហើយពេលនោះស្ត្រីរងគ្រោះ បានដាក់កាបូបស្ពាយនៅលើថ្មម៉ាត ស្រាប់តែពេលនោះគេឃើញមានជនសង្ស័យ៣នាក់ ដើរមកក្បែររួចធ្វើសកម្មភាពឆក់កាបូបស្ពាយនោះបានសម្រេចហើយ ពួកគេព្យាយាមរត់គេចខ្លួន ភ្លាមៗបុរសជាសង្សារស្ត្រីរងគ្រោះបានដេញតាមជនសង្ស័យដោយចាប់បានម្នាក់ ចំណែកឯ២នាក់ទៀតភ័យក៏បានបោះកាបូបនោះចោលរត់គេចខ្លួនបាត់តែម្តង ។

ក្រោយឃាត់ខ្លួនជនសង្ស័យនេះរួចគេឃើញនគរបាលប៉ុស្តិ៍ផ្សារកណ្ដាលទី១ ចុះមកដល់កន្លែងកើតហេតុបាននាំជនសង្ស័យកមកសាកសួរនៅប៉ុស្តិ៍រួចបញ្ចូនបន្តទៅឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌដូនពេញ ចាត់ការតាមច្បាប់ ៕

ដោយ៖ ស ដារ៉ា