អ្នកចាត់ការទូទៅរបស់ក្រុមបិសាចក្រហមលោក Ole Gunnar Solskjaerបានចុះកុងត្រាថ្មីជាមួយក្លិបរហូតដល់ឆ្នាំ២០២៤។ ជនជាតិន័រវេសវ័យ៤៨ឆ្នាំរូបនេះបានចូលកាន់តំណែងជាអចិន្ត្រៃយ៍នៅខែមីនាឆ្នាំ ២០១៩ ដោយត្រូវបានធ្វើជាគ្រូបង្វឹកបណ្តោះអាសន្ននៅពេលដែលលោក Jose Mourinho បានចាកចេញកាលពី៣ខែមុន។

លោក Solskjaer បានដឹកនាំក្រុមបិសាចក្រហមឈរនៅលេខ២ក្នុងលីកកំពូលអង់គ្លេស Premier League កាលពីរដូវកាលមុន និងឈានដល់វគ្គផ្តាច់ព្រ័ត្រ Europa League ដែលពួកគេចាញ់ដោយសារបាល់ប៉េណាល់ទី។

តាមការចេញផ្សាយរបស់ BBC Sport លោក Solskjaer បាននិយាយថា“គាត់ពិតជារីករាយណាស់ដែលបានចុះកុងត្រាថ្មី។ អ្នករាល់គ្នាដឹងពីអារម្មណ៍ដែលខ្ញុំមានចំពោះក្លិបនេះ។ វាគឺជាពេលវេលាដ៏រំភើបមួយសម្រាប់ក្រុមបិសាចក្រហម ដែលយើងបានបង្កើតក្រុមមានតុល្យភាពល្អនៃយុវជន និងកីឡាករដែលមានបទពិសោធន៍ ស្រេកឃ្លានភាពជោគជ័យ”។

លោកបន្តថា “ខ្ញុំមានក្រុមបង្វឹកដ៏អស្ចារ្យនៅជុំវិញខ្ញុំ ហើយយើងបានត្រៀមខ្លួនរួចរាល់ដើម្បីបោះជំហានបន្ទាប់នៅលើដំណើររបស់យើង។ក្រុមបិសាចក្រហមចង់ឈ្នះពានរង្វាន់ធំបំផុត និងល្អបំផុតហើយនោះជាអ្វីដែលយើងកំពុងខិតខំ។ យើងបានធ្វើឱ្យប្រសើរឡើងទាំងនៅលើ  និងក្រៅទីលានហើយនោះនឹងបន្តនៅរដូវកាលខាងមុខនេះ” ។

អនុប្រធាននាយកប្រតិបត្តិរបស់ក្លិប Man United លោក Ed Woodward មានប្រសាសន៍ថា “យើងមានទំនុកចិត្តច្រើនជាងពេលណាទាំងអស់ក្រោមការដឹកនាំរបស់លោក Solskjaer ដែលយើងកំពុងធ្វើដំណើរទៅរកទិសដៅត្រឹមត្រូវ។ លោក Solskjaer និងបុគ្គលិករបស់គាត់បានធ្វើការដោយមិនខ្លាចនឿយហត់ដោយដាក់គ្រឹះដើម្បីទទួលបានជោគជ័យរយៈពេលវែងនៅលើទីលាន។ លទ្ធផលនោះត្រូវបានគេមើលឃើញកាន់តែខ្លាំងឡើងក្នុងរយៈពេលពីររដូវកាលកន្លងមក ហើយយើងទាំងអស់គ្នាទន្ទឹងរង់ចាំមើលក្រុមដ៏រំភើបនេះមានការរីកចម្រើនបន្ថែមទៀតនៅឆ្នាំខាងមុខ”។

លោកអនុប្រធានក្លិបរូបនេះបានបន្តថា “អ្វីដែលគួរឱ្យរីករាយជាពិសេសនោះគឺវិធីដែលការរីកចម្រើននេះត្រូវបានសម្រេចដោយការលាយបញ្ចូលគ្នារវាងយុវជនវ័យក្មេងដែលមានទេពកោសល្យ និងអ្នកជ្រើសរើសលំដាប់កំពូលដោយលេងបាល់ទាត់វាយប្រហារតាមប្រពៃណីល្អបំផុតរបស់ក្រុម Manchester United ។

លោក Solskjaer បានចំណាយពេល១១រដូវកាលក្នុងនាមជាកីឡាកររបស់ក្រុមបិសាចក្រហមដោយរកបានគ្រាប់បាល់ឈ្នះនៅវគ្គផ្តាច់ព្រ័ត្រ Champions League កាលពីឆ្នាំ១៩៩៩។ គាត់បានក្លាយជាគ្រូបង្វឹកអចិន្ត្រៃយ៍ទី៤របស់ក្លិបបិសាចក្រហមចាប់តាំងពីលោក Sir Alex Ferguson ចូលនិវត្តន៍កាលពីឆ្នាំ ២០១៣ នៅពេលដែលគាត់បានចុះកុងត្រារយៈពេល៣ឆ្នាំនៅខែមីនា ឆ្នាំ២០១៩ ។

លោក Solskjaer បានដឹកនាំក្លិបដែលមានមូលដ្ឋាននៅទឹកដី Old Trafford ឈានដល់ចំណាត់ថ្នាក់លេខ៣ក្នុងរដូវកាលដំបូងរបស់គាត់នៅពេលដែលពួកគេក៏បានឡើងទៅវគ្គពាក់កណ្តាលផ្តាច់ព្រ័ត្រនៃពានរង្វាន់ Europa League មុនពេលចាញ់ក្រុម Sevilla ។

នៅក្នុងរដូវកាល២០១៩–២០២០ ក្រុមបិសាចក្រហមបានបញ្ចប់ត្រឹមចំណាត់ថ្នាក់លេខ២ នៅពីក្រោយក្រុមម្ចាស់ជើងឯក Manchester City ក្នុងនាមជាក្រុមជើងឯករងលីកកំពូលអង់គ្លេស ហើយក្រុមនេះត្រូវបានផ្តួលដោយក្រុម Villareal ដោយបាល់ប៉េណាល់ទីក្នុងវគ្គផ្តាច់ព្រ័ត្រ Europa League

សូមបញ្ជាក់ថា ព័ត៌មាននៃកិច្ចព្រមព្រៀងថ្មីរបស់លោក Solskjaer នេះគឺបន្ទាប់ពីការបញ្ជាក់ពីការចុះហត្ថលេខារបស់ខ្សែបម្រើស្លាបសញ្ជាតិអង់គ្លេស Jadon Sancho ក្នុងតម្លៃ៧៣លានផោនពីក្លិប BorussiaDortmund ។ ក្រុមបិសាចក្រហមបានប្រកួតមិត្តភាពអន្តរជាតិចំនួន២ប្រកួតរួចមកហើយ ដោយឈ្នះ១ប្រកួតគឺឈ្នះក្រុម Derby Countyក្នុងលទ្ធផល២ទល់១ កាលពីថ្ងៃទី១៧ កក្កដា និងចាញ់ក្រុម QPR ក្នុងលទ្ធផល៤ទល់២កាលពីរាត្រីម្សិលមិញ។ សម្រាប់ការចាប់ផ្តើមរដូវកាលថ្មី២០២០–២០២១ នៅលីកកំពូលអង់គ្លេស ក្រុមបិសាចក្រហមនឹងត្រូវធ្វើជាម្ចាស់ផ្ទះទទួលស្វាគមន៍ក្រុម Leeds United នៅថ្ងៃទី១៤ ខែសីហាខាងមុខនេះ ៕

(រូបភាព ៖ BBC Sport)