ភ្នំពេញ៖ ទីតាំងអ៊ីនធើណេត ស្ទើរ៩៩ភាគរយទៅហើយ ជាកន្លែងបើកល្បែងស៊ីសង និងជាទីជម្រកផ្តល់មធ្យោបាយឲ្យជនល្មើសជ្រកកោនក្នុងការធ្វើសកម្មភាព ចរាចរណ៍ ចែកចាយ ប្រើប្រាស់ថ្នាំញៀន ខណៈទីតាំងអ៊ីនធើណេតបើកបម្រើការក្នុងរយៈ២៤ម៉ោងលើ២៤ម៉ោង ។
ក្រុមយុវជនភាគច្រើន ដែលគេចសាលា វក់វីគ្រឿងញៀន ក្បត់ទំនុកចិត្តឪពុកម្តាយ លួចទ្រព្យសម្បត្តិ ឆបោកមិត្តភក្តិ ឬយកម៉ូតូបងប្អូនទៅលក់ បញ្ចាំ ពួកគេពិតជាមិនទៅណាឆ្ងាយពីជម្រកដ៏សុខសានរបស់ពួកគេនោះទេ គឺទីតាំងអ៊ីនធើណេត លេងល្បែងក្នុងទីនោះផង ប្រើប្រាស់ថ្នាំញៀនផង ចរាចរណ៍ ចែកចាយផង ដ៏ពពាក់ពពូន យ៉ាងអនាធិបតេយ្យ ទាំងស្រីទាំងប្រុស ប្រឈមទៅនឹងការប៉ះពាល់អនាគតដ៏ថ្លៃថ្លារបស់ពួកគេ ប្រសិនបើសមត្ថកិច្ច និងអាជ្ញាធរ គ្រប់គ្រងមូលដ្ឋានទាំងនោះកំពុងឆ្លៀតឱកាសប្រមូលប្រយោជន៍ពីឈ្មួញបើករបរទុច្ចរិតនេះ ។
អ៊ីនធើណេត២៤ម៉ោងលើ២៤ម៉ោង ដែលមានឡូហ្គោ សញ្ញារូបសេះ និងអក្សរឡាតាំង B បានពង្រាយគ្រប់ទីកន្លែងនៅក្នុងរាជធានីភ្នំពេញយ៉ាងតិចក្នុងមួយខណ្ឌមាន៣ទៅ៥កន្លែង ត្រូវបានគេរាយការណ៍មកថា ជួលមនុស្សជាជើងកាង ជួលអ្នកធំធ្វើជាខ្នងបង្អែក ចំណាយលុយរត់ការបើកទីតាំងនីមួយៗ ចាយតាំងពីថ្នាក់មូលដ្ឋាន សង្កាត់ ប៉ុស្តិ៍ ខណ្ឌ និងស្ថាប័នជាច្រើនទៀត ដោយសារទីតាំងអ៊ីនធើណេតរបស់ពួកគេ មានតែច្បាប់សម្រាប់បើកអ៊ីនធើណេត ប៉ុន្តែ ពួកឈ្មួញទុច្ចរិតទាំងនេះបានបង្កើតជាល្បែងស៊ីសង ដូចជាកាស៊ីណូសុទ្ធសាធ ចាញ់ឈ្នះ ស៊ីសងភ្លាមៗ ហើយការបើកអ៊ីនធើណេត គ្រាន់តែជារូបភាពបិទបាំងតែប៉ុណ្ណោះ ។
ទីតាំងអ៊ីនធើណេត ដែលមានឡូហ្គោរូបសេះ អក្សរឡាតាំង B ច្រើនដាក់ជាប្រភេទ ៦៨ណែត AA 2888, 66 ណែត ដាក់ជាច្រើនកន្លែង មាននៅក្នុងខណ្ឌពោធិ៍សែនជ័យ ខណ្ឌចំការមន ខណ្ឌមានជ័យ ខណ្ឌទួលគោក ខណ្ឌ៧មករា ខណ្ឌដូនពេញ ដោយមួយខណ្ឌមានយ៉ាងតិច៣ទៅ៥កន្លែង ។ គេកំពុងមានចម្ងល់ថា តើម្ចាស់ល្បែងស៊ីសង ប្រភេទកាស៊ីណូ និងជាទីតាំងជនល្មើសជ្រកកោន ចរាចរណ៍ ចែកចាយ ប្រើប្រាស់ថ្នាំញៀន សុទ្ធតែជាបទល្មើស ទាំងអាជ្ញាធរ និងសមត្ថកិច្ច ទទួលយកនូវសេវាប៉ុន្មានៗក្នុងមួយខែនោះទេ ។ ជាក់ស្តែង ជាទូទៅច្រើនម៉ោង២រំលងអធ្រាត្រឡើងទៅ គេបានឃើញក្រុមយុវជន ដែលគ្មានអត្តសញ្ញាណ និងមុខរបរពិតប្រាកដ ដែលសម្ងំក្រេបសេពគ្រឿងញៀន នៅតាមអ៊ីនធើណេតនីមួយៗ ចេញធ្វើសកម្មភាពទាំងហ្វូងៗ វាយអ្នកដំណើរយកប្រាក់ ទ្រព្យសម្បតិ្ត និងប្លន់ម៉ូតូជាដើម ។ នៅក្នុងទឹកដីខណ្ឌខ្លះ មួយសង្កាត់ ឬគ្រាន់តែផ្លូវតែមួយ ដាក់បន្តកន្ទុយគ្នានៅចំពោះមុខសមត្ថកិច្ច អាជ្ញាធរមូលដ្ឋាន ប្រឈមនឹងគ្រោះថ្នាក់បំផុត ដល់សេចក្តីសុខសង្គម ជាពិសេស បទល្មើស ការពង្វក់ស្មារតីយុវជនជាទំពាំងស្នងឫស្សីនោះ ឲ្យរងគ្រោះបាត់បង់អនាគត ឪពុកម្តាយ អាណាព្យាបាលខកចិត្ត អ្នកខ្លះទុក្ខធំប៉ុនភ្នំ ដោយសារតែកូនមិនគោរពតាមដំបូន្មាន លួចទ្រព្យសម្បត្តិ សេពគ្រឿងញៀន សេពគប់ជាមួយមិត្តភក្តិ សុទ្ធតែម
នុស្សមិនមានអត្តសញ្ញាណច្បាស់លាស់ ពិសេសញៀននឹងល្បែងស៊ីសង ដែលទម្លាប់លាក់ខ្លួននៅតាមទីតាំងអ៊ីនធើណេតនីមួយៗ ពោរពេញទៅដោយសុវត្ថិភាពពួកគេ មានអ្នកយាមកាម ដោយសារទីតាំងល្បែងអ៊ីនធើណេតនេះ ប្រមូលប្រភពសេដ្ឋកិច្ចពីគ្រប់មជ្ឈដ្ឋាន ពិសេសក្រុមជនប្រព្រឹត្តបទល្មើស ។
ជាទូទៅ និងយូរៗម្តង អាជ្ញាធរ និងសមត្ថកិច្ចមូលដ្ឋានតាមបណ្តាខណ្ឌនីមួយៗ ច្រើនបង្ក្រាបចាប់ទូហ្គេមតុក្កតា ទូហ្គេមបាញ់ត្រី វាយកម្ទេចចោល ដោយសំអាងលើហេតុផលថា ទូហ្គេមតុក្កតា ពង្វក់ក្មេងៗឲ្យភ្លេចសាលា ដោយឡែកទីតាំងហ្គេមបាញ់ត្រី ជាប្រភេទល្បែងស៊ីសង ខុសច្បាប់ ដូច្នេះ ត្រូវតែវាយកម្ទេចចោល និងបង្ហាញជារូបភាពឲ្យឃើញជាសាធារណៈ ។ សកម្មភាពទាំងនេះ ពិតជាមានការគាំទ្រចំពោះឆន្ទៈអាជ្ញាធរ ដែលជាគណៈបញ្ជាការ ឯកភាពខណ្ឌនីមួយៗ ប៉ុន្តែការមន្ទិលសង្ស័យ ការខកចិត្តចំពោះមជ្ឈដ្ឋានប្រជាពលរដ្ឋ ឪពុកម្តាយ អាណាព្យាបាល របស់យុវជន ដែលក្បត់ទំនុកចិត្ត វក់វីនឹងល្បែងស៊ីសង សេពគ្រឿងញៀន បានសម្តែងនូវការខកចិត្តយ៉ាងខ្លាំង ត្រង់ថា ហេតុអ្វី បានជាអាជ្ញាធរ និងសមត្ថកិច្ចមូលដ្ឋាន មិនត្រូវបានគិតគូរទាល់តែសោះ បង្ក្រាប លុបបំបាត់ទៅលើទីតាំងបើកអ៊ីនធើណេតបង្កប់ល្បែងស៊ីសង គ្រប់ប្រភេទ និងជាជម្រកសម្រាប់ក្រុមអ្នកសេពថ្នាំញៀន ចរាចរណ៍ចែកចាយ ប្រើប្រាស់គ្រប់ប្រភេទនោះ? ពិសេស ប្រភពនៃបទល្មើស បានកើត និងផ្តើមចេញពីទីតាំងល្បែងស៊ីសងទាំងនោះ ។ ប៉ុន្តែជាទម្លាប់នៃឈ្មួញទុច្ចរិត ពេលដែលទទួលបានលិខិតអនុញ្ញាតឲ្យបើកអ៊ីនធើណេតជាប្រភេទមិនមែនជាល្បែង ស៊ីសង បែរជាគេយកទៅធ្វើជាមធ្យោបាយបង្កើតល្បែងគ្រប់ប្រភេទទៅវិញ ។
នៅក្នុងខណ្ឌ៧មករា ជាពិសេសសង្កាត់វាល់វង់ មានទីតាំងអ៊ីនធើណេតបើកល្បែងស៊ីសងជាច្រើនតាមផ្លូវធំៗ ជាលក្ខណៈចំហរ និងមានអ្នកសេពថ្នាំញៀន ចែកចាយ យ៉ាងអនាធិបតេយ្យផងដែរនៅក្នុងទីតាំងនីមួយៗ ពិសេស ទីតាំងអ៊ីនធើណេត ដែលមានយីហោរូបសញ្ញាសេះ និងអក្សរឡាតាំង B អ្នកមើលការខុសត្រូវ ឬអ្នកគ្រប់គ្រង គ្រប់កន្លែងទាំងអស់ ដូចជានៅក្នុងខណ្ឌពោធិ៍សែនជ័យ ខណ្ឌសែនសុខ ខណ្ឌមានជ័យ ខណ្ឌចំការមន និងខណ្ឌ៧មករា នេះមិនទាន់ទាំងរៀបរាប់ពីសតិបន្ថែមទៀតនៅតាមបណ្តាខណ្ឌផ្សេង គឺម្ចាស់ទីតាំង ច្រើនតែមានអំនួតមិនខ្លាចរអារ ជាមួយសមត្ថកិច្ចថ្នាក់ក្រោមៗ ដោយសារគេស្គាល់យ៉ាងតិច និងទាបបំផុតចាប់ពីអធិការ ចៅហ្វាយខណ្ឌឡើងលើ មិនដឹងថា មេល្បែងទុច្ចរិតទាំងអស់នេះ មានឥទ្ធិពល ជះទឹកប្រាក់ក្នុងកម្រិតណាទេ ទើបពួកគេនៅតែមានឱកាស ក្នុងការបើកបនល្បែង ចិញ្ចឹមបទល្មើសឲ្យកើតមានក្នុងសង្គម ។
លោក លីម សុធា អភិបាលនៃគណៈអភិបាលខណ្ឌ៧មករា នាព្រឹកថ្ងៃទី២៣ ខែមីនា ឆ្នាំ២០១៦ បានប្រាប់ឲ្យដឹងថា នៅក្នុងសង្កាត់វាលវង់ ដូចជាគ្មានទេ ទីតាំងអ៊ីនធើណេតល្បែងស៊ីសង តែបើមាន លោកនឹងឲ្យមន្ត្រីចុះទៅមើលភ្លាមៗ និងមិនអនុញ្ញាតឲ្យមានជាដាច់ខាត ។
ដោយឡែកនៅតាមបណ្តោយផ្លូវសហព័ន្ធរុស្ស៊ី ក្នុងសង្កាត់កាកាប ឬនៅតាមបណ្តោយផ្លូវជាតិលេខ៤ សង្កាត់ចោមចៅ ខណ្ឌពោធិ៍សែនជ័យ ក៏ដូចជាតាមបណ្តោយផ្លូវ២៧១ សង្កាត់បឹងត្របែក ខណ្ឌចំការមន ខណ្ឌមានជ័យ ជាមួយនឹងផ្លូវជាតិលេខ២ ក្នុងសង្កាត់ចាក់អង្រែលើ ចាក់អង្រែក្រោម គឺឈ្មួញទុច្ចរិតហ៊ានបើកស្ទើរតែជាប់ៗគ្នា ក្លាយទៅជាទីតាំង ប្រណាំងប្រជែងពាណិជ្ជកម្មផ្នែកទុច្ចរិត នៃល្បែងស៊ីសង ទីតាំងសេពគ្រឿងញៀន ចែកចាយនេះ ជាដើម ។ នៅក្នុងខណ្ឌដូនពេញ មានជាច្រើនកន្លែង និងសម្បូរណ៍បែប ពិសេសនៅពេលយប់ កុំថាឡើយតែយុវជន សូម្បីតែជនជាតិបរទេស ក៏បានប្រមូលផ្តុំគ្នាទៅលេងល្បែង ទៅសេពគ្រឿងញៀន ចែកចាយ និងជារឿងសាមញ្ញសម្រាប់អាជ្ញាធរមូលដ្ឋាន ព្រោះអាចទាញយកប្រភពសេដ្ឋកិច្ចខ្លះដែរ ដើម្បីក្រពះ ដើម្បីមធ្យោបាយសាំង និងដោះស្រាយផលលំបាកខ្លះៗ សម្រាប់ការងារមូលដ្ឋាន ។ ប្រសិនបើ អាជ្ញាធររាជធានីភ្នំពេញ មិនបារិតបន្តឹង ឬរឹតបន្តឹងហើយ តែថ្នាក់ក្រោមឆ្លៀតឱកាស យុវជន ដែលជាទំពាំងស្នងឫស្សី ប្រឈមនឹងគ្រោះថ្នាក់ ការបាត់បង់អនាគត វាយលុកដោយថ្នាំញៀន បង្កើតឲ្យមាននូវបទល្មើសក្នុងសង្គមកាន់តែធ្ងន់មិនខានឡើយ ៕
ដោយ៖ សុខ ខេមរា
