ភ្នំពេញ៖ បុរសម្នាក់ស្រវឹងស្រាជិះម៉ូតូដេញធាក់គេឯង ធ្វើឲ្យមនុស្ស២នាក់កំពុងតែជិះម៉ូតូឌុបគ្នារេចង្កូតទៅបុកកន្លែងលក់ត្រីអាំង សាច់មាន់អាំង ពង់ទា កំពប់ពាសពេញផ្លូវរងការខូចខាត តែមិនមានអ្នករងរបួស ដែលហេតុការណ៍នេះកើតឡើងនៅវេលាម៉ោង១និង១៥រំលងអាធ្រាត្រឈានចូលថ្ងៃទី២៣ ខែមីនា ឆ្នាំ២០១៦ នៅទល់មុខវត្តសន្សំកុសល ផ្លូវ២៧១ សង្កាត់ផ្សារដើមថ្កូវ ខណ្ឌចំការមន ។
តាមសម្តីខាងម៉ូតូរងគ្រោះបានឲ្យដឹងថា ពួកគេមានគ្នា៥នាក់ ប្រុស៤នាក់និងស្រី១ម្នាក់ ជិះម៉ូតូ៣គ្រឿង ទី១ម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ 1FN-5020 ទី២ម៉ូតូម៉ាកវ៉េវ ពណ៌ខ្មៅពាក់ស្លាកលេខ ភ្នំពេញ1BK-1301 និងមួយគ្រឿងទៀត ម៉ាក ធូដេ ពណ៌ខ្មៅ អត់មានស្លាកលេខ ចេញពីផ្ទះគោលបំណងទៅលេងនៅ ខូលក្លឹប ដែលស្ថិតនៅផ្លូវ២៧១ សង្កាត់ផ្សារដើមថ្កូវ ខណ្ឌចំការមន ដោយធ្វើដំណើរតាមផ្លូវ២៧១ទិសដៅ ពីជើងទៅត្បូង លុះមកដល់ចំណុចកើតហេតុ ក៏ស្រាប់តែមានបុរសម្នាក់ អាយុ៣៥ឆ្នាំ ជិះម៉ូតូ ម៉ាកPCX ពណ៌ខ្មៅ អត់មានស្លាកលេខ ធ្វើដំណើរស្របទិសគ្នា ក្នុងស្ថានភាពស្រវឹងជិះមកពីក្រោយ និងបានដេញតាមធាក់ម៉ូតូពួកគេធ្វើឲ្យម៉ូតូហុងដាឌ្រីម ដែលជិះគ្នា២នាក់បានជ្រុលទៅបុកកន្លែងលក់ត្រីអាំង មាន់អាំង សាច់ក្រក ងៀតគោ បណ្តាលឲ្យកំពប់ពាសពេញផ្លូវ តែមិនបង្កគ្រោះថ្នាក់ដល់មនុស្សនោះទេ។ ភ្លាមៗខាងម៉ូតូបង្កបម្រុងរករឿងវាយទៅខាងម៉ូតូដែលមានគ្នាច្រើន តែត្រូវបានសមត្ថកិច្ចមូលដ្ឋានចុះទៅដល់ ទើបពួកគេទាំងសងខាង ធ្វើសម្របសម្រួលគ្នា ដោយខាងម៉ូតូដែលមានគ្នាច្រើន សុំយករួចខ្លួនទុកនៅខាងម៉ូតូPCXដែលជិះម្នាក់ឯង នៅដោះស្រាយជាមួយអ្នកលក់ត្រីអាំង ។
ក្រោយពេលកើតហេតុអ្នកលក់ត្រីអាំងកំពប់ត្រីអាំងអស់រលីងបានទារសំនង១០០ដុល្លារតែខាងម៉ូតូ PCX ឲ្យ១០ម៉ឺនរៀល អ្នកលក់ត្រីអាំងមិនព្រម បានចុះមកនៅ២០ម៉ឺនរៀល តែដោយការសម្របសម្រួល ពីសមត្ថកិច្ចខាងម៉ូតូPCXសុំសង១៥ម៉ឺនរៀល រួចខាងលក់ត្រីអាំង ក៍ព្រមយកដើម្បីបញ្ចប់រឿងតែម្ដង ៕
...
ដោយ៖ ជីម ភារ៉ា ដង្កោ
