ខេត្តបន្ទាយមានជ័យ ៖ អាជ្ញាធរក្រុងសិរីសោភ័ណបាន បន្តយកសំណាក អ្នកជាប់ពាក់ព័ន្ធនៅក្នុងផ្សារចំការគ (ផ្សាថ្មី) ដើម្បីធ្វេីតេស្តរហ័ស(Rapid Test )រកកូវីដ-១៩ ដដែលដឹកនាំដោយផ្ទាល់ លោក អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ក្រោយពីបានដំណេីរការយកសំណាកលេីអាជីវករកាលពីថ្ងៃទី២ ខែសីហាម្សិលមិញ ជិត៨០០នាក់ រកឃេីញវិជ្ជមានកូវីដ-១៩ចំនួន២២នាក់។
ដោយឡែកនៅថ្ងៃទី៣ ខែសីហានេះ អាជ្ញាធរបានបន្តយកសំណាកមួយថ្ងៃទៀត សម្រាប់បងប្អូនអាជីវករលក់ដូរនៅក្នុងផ្សារ។ រីឯលទ្ធផលនៃការយកសំណាងបងប្អូនអាជីវករនៅផ្សារចំការគរនៅថ្ងៃនេះមិនទាន់ដឹងនៅឡើយ។ យ៉ាងណាក៏ដោយក្រុមគ្រូពេទ្យនឹងបន្តយកសំណាកក្រុមអាជីវករទាំងអស់។
លោក ហ៊ឹល រ៉ាយ៉ា ប្រធានគណៈបញ្ជាការឯកភាពក្រុង ក៏បានបញ្ជាក់ថា ៖ ចំពោះបងប្អូនអាជីវករណាដែលគេចវេសពីការយកសំណាក គឺមិនអនុញ្ញាតឲ្យលក់ដូរនៅពេលផ្សារបេីកដំណេីរវិញឡេីយ។ ដូច្នេះបងបងប្អូនអាជីវករ រស់នៅក្បែរ ទល់មុខផ្សារសូមមកយកសំណាកនៅទីតាំងផ្សារ ដែលមានតែមួយថ្ងៃនេះតែប៉ុណ្ណោះ។
សូមបងប្អូនបន្តអនុវត្តវិធាន “៣ការពារ ៣កុំ “ឲ្យបានខ្ជាប់ខ្ជួនទាំងអស់គ្នា៕
ដោយ៖ សូរិយា
