ខេត្តឧត្តរមានជ័យ៖ បេីយោងតាមសេចក្តីប្រកាសព័ត៌មានរបស់រដ្ឋបាលខេត្តឧត្ដរមានជ័យ នៅយប់ថ្ងៃអង្គារទី០៣ ខែសីហា ឆ្នាំ២០២១នេះថា អាជ្ញាធរខេត្ត បានចេញសេចក្ដីសម្រេចស្ដីពីការកំណត់ភូមិអូរស្មាច់ ភូមិរួតចំប៉ី ភូមិអភិវឌ្ឍន៍ ភូមិគិរីមង្គល ភូមិដើមជ្រៃ និងភូមិ ចំការចេក នៃសង្កាត់អូរស្មាច់ ក្រុងសំរោង ខេត្តឧត្តរមានជ័យ ជា “តំបន់ក្រហម”ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ក្នុងខេត្តឧត្តរមានជ័យ។
ជាមួយគ្នានេះ អាជ្ញាធរខេត្ត ក៏បានចេញសេចក្តីសម្រេចកំណត់ភូមិអូខ្លាឃ្មុំ និងភូមិស្រះទឹក នៃសង្កាត់អូរស្មាច់ ក្រុងសំរោង ខេត្តឧត្តរមានជ័យ ជា “តំបន់លឿងទុំ” ដើម្បីទប់ស្កាត់ការឆ្លងរាលដាលនៃជំងឺកូវីដ១៩ ក្នុងខេត្តឧត្តរមានជ័យផងដែរ។
ដើម្បីចូលរួមទប់ស្កាត់នូវការចម្លងជំងឺកូវីដ-១៩ ឱ្យកាន់តែមានប្រសិទ្ធភាព រដ្ឋបាលខេត្តឧត្ដរមានជ័យ សូមជំរុញឱ្យប្រជាពលរដ្ឋគ្រប់រូប ចងចាំ និងចូលរួមអនុវត្តឱ្យបានខ្ជាប់ខ្លួនជានិច្ចនូវវិធានការការពារខ្លួនសាមញ្ញៗ និងត្រូវបន្ដប្រុងប្រយ័ត្នផ្ទាល់ខ្លួនពីការឆ្លងជំងឺកូវីដ-១៩ ដោយអនុវត្តឱ្យខាងតែបាននូវវិធានការ «បីកុំ និង បីការពារ» ។
គួរជម្រាបថា រដ្ឋបាលខេត្តឧត្តរមានជ័យ នៅថ្ងៃអង្គារទី០៣ សីហានេះដែរ បានរកឃើញករណីវិជ្ជមានកូវីដ-១៩ចំនួន៧៩ ករណី បន្ថែមទៀត។ ដោយគិតត្រឹមម៉ោង១៧ និង៣០នាទី ថ្ងៃទី ០៣ ខែសីហា ឆ្នាំ២០២១នេះ ខេត្តឧត្តរមានជ័យ រកឃើញអ្នកវិជ្ជមានជំងឺកូវីដ១៩ ចំនួន៥.០៣២ ករណី ក្នុងនោះករណីនាំចូលពីក្រៅប្រទេសចំនួន ៤.៥២៩ករណី និងករណីឆ្លងក្នុងសហគមន៍ ២០កុម្ភៈ ចំនួន ៥០៣ ករណី និងបានព្យាបាលជាសះស្បើយចំនួន ៩៨៧ នាក់ កំពុងសម្រាកព្យាបាលចំនួន ៤.០៣៦ នាក់ និងស្លាប់ចំនួន ០៩នាក់៕ដោយ៖សហការី
សូមអានព័ត៌មានលម្អិតនៅក្នុងលិខិតរបស់រដ្ឋបាលខេត្ត មានដូចខាងក្រោម៖
