ស្ថានទូតចិនប្រចាំកម្ពុជា: វ៉ាក់សាំងចិនចំនួន ៣ លានដូសបន្ថែមទៀតដែលជាការបញ្ជាទិញរបស់ភាគីកម្ពុជាបានមកដល់

ចែករំលែក៖

ភ្នំពេញ, នៅយប់ថ្ងៃទី១២ ខែសីហានេះ ស្ថានទូតចិនប្រចាំកម្ពុជា បានបង្ហោះលើផេកផ្លូវការរបស់ខ្លួនថា, នាព្រឹកថ្ងៃទី១២ ខែសីហា វ៉ាក់សាំងចិនស៊ីណូវ៉ាក់ចំនួន ៣ លានដូសបន្ថែមទៀតដែលជាការបញ្ជាទិញរបស់រាជរដ្ឋាភិបាលកម្ពុជាបានមកដល់អាកាសយានដ្ឋានអន្តរជាតិភ្នំពេញ។ លោកស្រី យក់ សម្បត្តិ រដ្ឋលេខាធិការក្រសួងសុខាភិបាលកម្ពុជាបានអញ្ជើញទទួលក្នុងអាកាសយានដ្ឋាន។ គិតមកត្រឹមថ្ងៃទី១២ ខែសីហានេះ ភាគីចិនបានប្រគល់វ៉ាក់សាំងកូវីដចំនួន ២១.៧ លានដូសជូនដល់ភាគីកម្ពុជា ដែលក្នុងនោះ ៣.២ លានដូសជាជំនួយឥតសំណង និង ១៨.៥ លានដូសផ្សេងទៀតជាការបញ្ជាទិញរបស់កម្ពុជា។

យោងតាមតួលេខរបស់គណៈកម្មការចំពោះកិច្ចចាក់វ៉ាក់សាំងកូវីដ-១៩ក្នុងក្របខណ្ឌទូទាំងប្រទេសបានឱ្យដឹងថា គិតមកត្រឹមថ្ងៃទី១០ ខែសីហា ចំនួនអ្នកចាក់វ៉ាក់សាំងកូវីដក្នុងប្រទេសកម្ពុជាសរុបប្រហែល ៨.៣៩៦ លាននាក់ ក្នុងនោះ ៦.៤៣៨ លាននាក់បានចាក់ដូសទី២រួច។ ការចាក់វ៉ាក់សាំងជូនក្មេងជំទង់អាយុចាប់ពី ១២ ឆ្នាំឡើងនិងសម្រាប់មនុស្សពេញវ័យក៏កំពុងដំណើរការយ៉ាងរលូនល្អប្រសើរ៕