អន្តរជាតិ៖ មនុស្សសរុប ២១នាក់ រួមនឹងថ្នាំញៀនមេតំហ្វេតាមីនក្រាមចំនួនជិត១តោន និងកញ្ឆា ៨២០គីឡូក្រាម ត្រូវបានកម្លាំងប៉ូលីសថៃ បេីកប្រតិបត្តិការចុះបង្រ្កាបទ្រង់ទ្រាយធំ ចាប់ពីថ្ងៃទី១១ដល់១២ ខែសីហា ឆ្នាំ២០២១ថ្មីៗនេះ ដាច់ដោយឡែកពីគ្នានៅក្នុងខេត្តចំនួន៤ នៃប្រទេសថៃ។ នេះបេីតាមការបញ្ជាក់របស់ប្រធានការិយាល័យប៉ូលីសបង្ក្រាបគ្រឿងញៀន បានឱ្យដឹងនៅថ្ងៃសុក្រទី១៣ ខែសីហាម្សិលមិញ។
ប្រធានការិយាល័យប៉ូលីសបង្ក្រាបគ្រឿងញៀន បានថ្លែងបន្តថា ជនសង្ស័យត្រូវបានចាប់ខ្លួនជាបន្តបន្ទាប់ នៅខេត្តឡាំផាង,ខេត្តអាយុទ្យា,ខេត្តសាខុន សាខន និងខេត្តណុងបួ ឡាំភូ ចាប់ពីថ្ងៃ១១ដល់១២សីហាថ្មីៗនេះ។
គួរជម្រាបថា ក្នុងប្រតិបត្តិការឆ្មក់បង្ក្រាបខាងលេីនេះ លេីកទី១ ប៉ូលីសបានឃាត់ខ្លួនមនុស្ស១១នាក់ នៅស្ថានីយឥន្ធនៈនិងកន្លែងចតរថយន្តមួយក្នុងខេត្តឡាំផាងកាលពីថ្ងៃ១១សីហា និងខេត្តអាយុទ្យា នៅថ្ងៃ១២សីហា។ ចំណែកគ្រឿងញៀនប្រភេទមេតំហ្វេតាមីនចំនួន២០០គីឡូក្រាម ព្រមទាំងរថយន្តចំនួន ៧គ្រឿង និងទ្រព្យសម្បត្តិដទៃទៀតរួមមានលុយ ១៥លានបាត ក៏ត្រូវបានសមត្ថកិច្ចរឹបអូសផងដែរ។
ដោយឡែកនៅឯខេត្តសាខុន សាខន ប៉ូលីសថៃ បានចាប់ខ្លួនមនុស្ស៦នាក់បន្ថែមទៀត និងរឹបអូសបានកញ្ឆា២១០គីឡូក្រាម ថ្នាំមេតំហ្វេតាមីន៣,២លានគ្រាប់និងថ្នាំញៀនម៉ាទឹកកកចំនួន៥២០គីឡូក្រាម រថយន្ត៣គ្រឿងនិងទ្រព្យសម្បត្តិផ្សេងទៀត។
រីឯនៅខេត្តណុងបួ ឡាំភូ ក្រុមប៉ូលីសថៃ ក៏បានឃាត់ខ្លួនជនសង្ស័យ៤នាក់ រួមនិងកញ្ឆាចំនួន ៦១០គីឡូក្រាមផងដែរ។
គួរបញ្ជាក់ដែរថា ក្នុងប្រតិបត្តិការនោះ បុរសម្នាក់ វ័យ២៤ឆ្នាំ ក៏ត្រូវក្រុមប៉ូលីស បាញ់សម្លាប់ និងមនុស្ស ៣នាក់ទៀតត្រូវបានចាប់ខ្លួននៅខេត្តប៊ូរី រ៉ាម ខណៈដែលពួកគេប៉ះទង្គិចជាមួយប៉ូលីស បង្ក្រាបគ្រឿងញៀន កាលពីថ្ងៃសុក្រម្សិលមិញនេះ។ ចំណែកគ្រឿងញៀនប្រភេទមេតំហ្វេតាមីនចំនួន ៨.០០០គ្រាប់ និងម៉ាទឹកកក២០០ក្រាមក៏ត្រូវបានរឹបអូសពីជនសង្ស័យផងដែរ៕ដោយ៖ស តារា
