ខេត្តកំពត៖ នេះជាលេីកទី២ហេីយដែលសហភាពសហព័ន្ធយុវជនកម្ពុជាក្រុងកំពតបានផ្តល់ផ្ទះចំនួន១ខ្នងផ្តល់ជូនប្រជាពលរដ្ឋខ្វះជម្រក នៅភូមិស្រែ
សង្កាត់ត្រេីយកោះ ក្រុងកំពត ខេត្តកំពត។
ពិធីនេះបានធ្វើឡើងនៅព្រឹកថ្ងៃសៅរ៍ ទី១៤ ខែសីហា ឆ្នាំ២០២១ ក្រោមអធិបតីភាពលោកអែត សារិទ្ធិ អភិបាលរងតំណាង លោក លាង រឿនសុធី អភិបាលនៃគណៈអភិបាលក្រុងកំពត និងជាប្រធាន ស.ស.យ.ក. ក្រុងកំពត លោក អែត សារិទ្ធិ អភិបាលរងក្រុងកំពត និងមានការអញ្ជើញចូលរួមពីលោក សាន ផល្លា អនុប្រធានប្រចាំការ ស.ស.យ.ក.ក្រុងកំពត លោក លី សាលីម តំណាងមូលនិធិអាស៊ានដើម្បីការអប់រំ និងអភិវឌ្ឍន៍ រួមជាមួយលោកចៅសង្កាត់រងទី២ លោកស្រីមេភូមិ -អនុភូមិ សមាជិក សមាជិកាក្រុមការងារ ស.ស.យ.ក. ក្រុងកំពត និងសង្កាត់ត្រេីយកោះ បានប្រគល់ផ្ទះមួយខ្នងទំហំ៤ម៉ែត្រx៧ ម៉ែត្រ ដែលបានសាងសង់អស់ថវិកាចំនួន ២,៣០០ ដុល្លារ ផ្តល់ជូនលោកស្រី មេីុត រ៉ូគីយ៉ាស់ ដែលជួបជីវភាពខ្វះខាតទីទាល់ក្រខ្លាំងបំផុត ស្ថិតនៅភូមិស្រែ សង្កាត់ត្រើយកោះ ក្រុងកំពត ខេត្តកំពត ដែលជាការជួយឧបត្ថម្ភពីមូលនិធិអាស៊ានដើម្បីការអប់រំ និងអភិវឌ្ឍន៍ តាមរយៈស.ស.យ.ក.ក្រុងកំពត។
ក្នុងពេលជាមួយគ្នានោះដែរ លោកអភិបាលរងក្រុងកំពត បាននាំនូវការផ្តាំផ្ញេីសួរសុខទុក្ខពីលោកអភិបាលក្រុងកំពតដែលបានគិតគូរពីទុក្ខលំបាកបងប្អូនប្រជាពលរដ្ឋនៅក្នងមូលដា្ឋនផងដែរ ព្រមទាំងបានផ្តល់ថវិកាផ្ទាល់ខ្លួនចំនួន ២០០,០០០រៀល ថវិកាចូលរួមរបស់សង្កាត់ និងភូមិចំនួន ៩០,០០០រៀល ថវិកាក្រុមការងារស.ស.យ.ក. ៧០,០០០រៀល សរុបទាំងអស់មានចំនួន៣៦០,០០០រៀល ដើម្បីជួយសម្រួលដល់ជីវភាពរស់ប្រចាំថ្ងៃក្នុងគ្រួសាររបស់គាត់ផងដែរ។
បន្ទាប់ពីប្រគល់ផ្ទះជូនប្រជាពលរដ្ឋរួចមកលោក អែត សារិទ្ធិ អភិបាលរងក្រុងកំពត រួមជាមួយ លោក សាន ផល្លា អនុប្រធានប្រចាំការ សសយកក្រុងកំពត បានចុះជួបសំណេះសំណាលសួរសុខទុក្ខ គ្រូពេទ្យ ព្រមទាំងក្រុមការងារ សម្របសម្រួល និងបងប្អូនប្រជាពលរដ្ឋ ដែលបានអញ្ជេីញចូលរួមចាក់វ៉ាកសាំងបង្ការជំងឺកូវីដ-១៩ សម្រាប់ដូសទី២ នៅសាលាបឋមសិក្សា ហ៊ុន សែន១មករា និងបានជូនថវិកាមួយចំនួនដល់បងប្អូនដែលជួយរក្សាសុវត្តិភាព និងសន្តិសុខសណ្តាប់ជូនប្រជាពលរដ្ឋនៅទីនោះទៀតផង៕
ដោយ៖ ចន្ទ លីហ្សា
