ភ្នំពេញ ៖ ពិតជាអាណិតអាសូរខ្លាំងណាស់ដែលគ្រួសារមួយបានបាត់បង់ប្តីនិងឪពុកជាទីស្រលាញ់ទាំងស្រស់ញញឹម គ្រាដែលបុរសរងគ្រោះឡើងទៅលើជញ្ជាំងដើម្បីពិនិត្យមើលនិងដោះដូរអំពូលភ្លើងសម្រាប់បំភ្លឺឲ្យសត្វមាន់ដេកពេលយប់ ប៉ុន្តែជាអកុសលត្រូវចរន្តភ្លើងឆក់ធ្លាក់មកខាងក្រោមបណ្តាលឲ្យដាច់ខ្យល់ស្លាប់តាមផ្លូវពេលបញ្ជូនទៅសង្គ្រោះនៅឯមន្ទីរពេទ្យ ដោយបន្យល់ទុកប្រពន្ធនិងកូន២នាក់ឱ្យរស់នៅកំព្រា។ហេតុការណ៍នេះបានកេីតឡេីងកាលពីវេលាម៉ោង១៨និង៣០នាទីថ្ងៃទី១៣ ខែសីហា ឆ្នាំ២០២១ នៅចំណុចក្នុងផ្ទះ ស្ថិតនៅតាមផ្លូវបេតុង ភូមិសាក់សំពៅ សង្កាត់សាក់សំពៅ ខណ្ឌដង្កោ រាជធានីភ្នំពេញ។
ជនរងគ្រោះ(សព)ឈ្មោះ ឡៅ ឈួន ហៅឆាយ ភេទប្រុស អាយុ៤០ឆ្នាំ មុខរបរ លក់ដូរ ស្នាក់នៅផ្ទះកើតហេតុ ។
សមត្ថកិច្ចបានឱ្យដឹងថា មុនពេលកើតហេតុកាលពីថ្ងៃទី១៣ ខែសីហា ឆ្នាំ២០២១ វេលាម៉ោងប្រហែល១៨និង៣០នាទីជនរងគ្រោះបានមកប្តូរអំពូលភ្លើងដែលដាច់នៅផ្ទះចំណុចកេីតហេតុ ដោយពេលដូរអំពូលភ្លើងដែលមានកម្ពស់ប្រហែល៤ម៉ែត្រពីដីនោះ ជនរងគ្រោះបានដាក់ជណ្ដើរឡើងដោយមិនបានបិទបារ៉ែតភ្លើងនោះទេ។ ពេលកំពុងដូរអំពូលនោះស្រាប់តែជនរងគ្រោះ(សព)ត្រូវបានខ្សែភ្លើងឆក់បណ្ដាលឲ្យធ្លាក់មកដី ហើយភ្លាមៗនោះបងប្អូនជនរងគ្រោះបានធ្វើចលនាសង្រ្គោះបឋមនិងបានបញ្ជូនជនរងគ្រោះទៅមន្ទីរពេទ្យទឹកថ្លា និងមន្ទីរពេទ្យពងទឹក តែពេទ្យមិនមានសម្ភារជួយ ក៏បានដឹកមកដល់មន្ទីពេទ្យម្លិះចំការដូង តែពេលមកដល់មន្ទីរពេទ្យ គ្រូពេទ្យបានប្រាប់ថាជនរងគ្រោះបានស្លាប់បាត់ទៅហើយនិងបានឲ្យយកសពទៅផ្ទះវិញដើម្បីធ្វើបុណ្យតាមប្រពៃណី និងបានឲ្យពេទ្យយកសំណាកជាលទ្ធផលធ្វើតេស្តពីក្រុមគ្រូពេទ្យ គឺអវិជ្ជមានជំងឺកូវីដ-១៩។
បេីតាមសន្និដ្ឋានវាយតម្លៃតាមការពិនិត្យនិងវិភាគរបស់មន្ត្រីជំនាញខណ្ឌ ជុំវិញកន្លែងកើតហេតុ ជនរងគ្រោះពិតជាស្លាប់ដោយសារត្រូវខ្សែភ្លើងឆក់ប្រាកដមែន រួចសមត្ថកិច្ចបានធ្វេីកំណត់ហេតុប្រគល់សពជូនក្រុមគ្រួសារចាត់ចែងធ្វើបុណ្យតាមប្រពៃណី ។
ជាមួយគ្នានោះដែរ សមត្ថកិច្ចជំនាញក៏បានអំពាវនាវដល់បងប្អូនប្រជាពលរដ្ឋទាំងអស់ដែលមានជំនាញជាងភ្លើងក្តី ឬ អ្នកមិនមានជំនាញក្តី ត្រូវមានការប្រុងប្រយ័ត្នខ្ពស់បំផុតជាមួយចរន្តអគ្គិសនី ប្រសិនបើធ្វេសប្រហែសតែបន្តិចគឺអាចឆក់ស្លាប់ភ្លាម ៕
ដោយ ៖ ភារ៉ា ដង្កោ
