ភ្នំពេញៈ ច្បាប់! ច្បាប់!… មន្ត្រីតុលាការ… កំពុងវិលវល់អារម្មណ៍របស់ប្រជាពលរដ្ឋ ជាពិសេសខ្ញុំបាទ ក្នុងនាមប្រជាពលរដ្ឋម្នាក់មិនយល់ទាល់តែសោះចំពោះនីតិវិធី ក្នុងការបង្ក្រាបបទល្មើសរបស់អាជ្ញាធរមានសមត្ថកិច្ច ។ ថ្ងៃមុនអាននៅលើវេបសាយ នគរដ្រេហ្គន អត្ថបទមួយផ្សាយថា អាជ្ញាធរខណ្ឌចុះបង្ក្រាបទីតាំងហ្គេមខុសច្បាប់មួយកន្លែង ដោយមានការចូលរួមពីព្រះរាជអាជ្ញារង អមសាលាដំបូងរាជធានីភ្នំពេញ…។ ខ្ញុំឆ្ងល់ថា គ្រាន់តែបង្ក្រាបទូហ្គេមប៉ុណ្ណឹង ហេតុអីក៏ចាំបាច់មានវត្តមានមន្ត្រីតុលាការ? ក្នុងនាមមន្ត្រីនគរបាលយុត្តិធម៌ថ្នាក់ប៉ុស្តិ៍និងខណ្ឌ មិនអាចបង្ក្រាបបានទេឬ?
វាក្លាយទៅជាទម្លាប់នៃបញ្ហាផលប្រយោជន៍ ព្រោះភាគច្រើនករណីទូហ្គេមនៅក្នុងមូលដ្ឋានជាឆ្នាំងបាយរបស់អាជ្ញាធរដែនដី ។ បើទោះជាមិនទាំងអស់ វាក៏លើកលែងចំពោះទីតាំងទូហ្គេមខ្លះ ដែលម្ចាស់មានខ្នងបង្អែកក្រាស់ ។ នៅពេលដែលម្ចាស់ទីតាំងហ្គេមមានខ្នងបង្អែកក្រាស ការបង្ក្រាបទីតាំងបែបនេះ តាមបញ្ជាពីមជ្ឈដ្ឋានណាមួយ ទំនងជារកអន្តរាគមន៍ដៃទី៣ គឺមន្ត្រីតុលាការនោះហើយទើបអាចបង្ក្រាបបាន។ រឿងមន្ត្រីតុលាការ មានអំណាចមហាសាលប៉ុនមេឃ ចុះបង្ក្រាបទូហ្គេមកំប៉ិចកំប៉ុក ជារឿងដ៏អស់សំណើចមួយ ។ យ៉ាងណាក៏ដោយ មន្ត្រីតុលាការ ឋានៈជាព្រះរាជអាជ្ញារងធ្លាប់បានបញ្ជាកម្លាំងយោងតាមកិច្ចសហប្រតិបត្តិការ បង្ក្រាបបានទូហ្គេម១ ឬ២ទូ ថែមទាំងឃាត់ក្មេងៗបាន២-៣នាក់ថែមទៀតផង ។
មិនមែនត្រឹមតែព្រះរាជអាជ្ញារងដឹកនាំកម្លាំងបង្ក្រាបទូហ្គេមខុសច្បាប់ប៉ុណ្ណោះទេ ពេលខ្លះ លោកព្រះរាជអាជ្ញារងអមសាលាដំបូង ខេត្ត រាជធានីខ្លះ ដឹកនាំកម្លាំងបង្ក្រាបសង្វៀនជល់មានទៀតផង ។ សម្រាប់ខ្ញុំបាទនៅតែមិនយល់ថា ហេតុអ្វីបានជាសមត្ថកិច្ចអាជ្ញាធរមូលដ្ឋានគ្មានសមត្ថភាពបង្ក្រាប ដោយរង់ចាំមន្ត្រីតុលាការចុះមកបញ្ជា? ជាការពិត ការបង្ក្រាប ចំណុចអសកម្មដែលខុសទៅនឹងច្បាប់ទាំងឡាយនោះជាភារកិច្ចរបស់មន្ត្រីនគរបាលយុត្តិធម៌នៅមូលដ្ឋានដោយមិនចាំបាច់រង់ចាំការ«ចង្អុលបង្ហាញ» ឬក៏ចូលរួមពីព្រះរាជអាជ្ញានោះឡើយ ។ ដោយសារតែបញ្ហាបែបនេះ ទើបធ្វើឲ្យចំណុចអសកម្មកើតមាននៅស្ទើរគ្រប់ទីកន្លែង ។ រីឯមន្ត្រីតុលាការក៏ចូលចិត្តយកមុខជាមួយនឹងទូហ្គេមពីរបីគ្រឿង ក្មេងពីរ បីនាក់នោះដែរ ។ រឿងប៉ុណ្ណឹង មន្ត្រីនគរបាលប៉ុស្តិ៍អាចធ្វើបានទេតើ ៕ ប្រជាពលរដ្ឋម្នាក់
