ខេត្តពោធិ៍សាត់៖ សមត្តកិច្ចឃាត់ខ្លួនអ្នកយាមដីឲ្យយោធាមួយកន្លែង បានម្នាក់ក្នុងចំណោមបក្ខពួកគេ ២នាក់ បន្ទាប់ពីមានទំនាស់ពាក្យសម្ដីជាមួយអ្នកបើកគោយន្តដឹកផលអនុផលព្រៃឈើរឿងជម្លោះលុយ ៤០០០រៀល ឈានដល់ផ្ទុះអាវុធ ២គ្រាប់ធ្លាយប្រអប់ជើងពីម្ខាងទៅម្ខាង។
ហេតុការណ៏នេះបានកើតឡើងកាលពីវេលាម៉ោង១៣និង០០នាទី រសៀលថ្ងៃទី២៦ ខែមីនា ឆ្នាំ២០១៦ ត្រង់ចំណុចអូរថ្មដំរី ស្ថិតក្នុងភូមិសាយ ឃុំព្រងិល ស្រុកភ្នំក្រវាញ ខេត្តពោធិ៍សាត់។
ហេតុការណ៏នេះពិតជាបានកើតឡើងនៅលើដីស្រុកភ្នំក្រវាញមែន ប៉ុន្តែជនល្មើសនិងជនរងគ្រោះ ត្រូវបានសមត្តកិច្ចស្រុកក្រគរជាអ្នកចាប់បាន ដូច្នេះលោក វរៈសេនីយ៍ត្រី ឯម រុន អធិការនគរបាលស្រុកក្រគរប្រាប់ថាជនសង្ស័យត្រូវបានឃាត់ខ្លួនឈ្មោះ មិន ខន ភេទប្រុសអាយុ៥០ឆ្នាំ រស់នៅភូមិកណ្ដាល ឃុំឈើតុំ ស្រុកក្រគរ ខេត្តពោធិ៍សាត់។ ចំណែកជនរងរបួសមានឈ្មោះ ញន វុធ ភេទប្រុស អាយុ ៣៨ឆ្នាំ រស់នៅភូមិចាមចាស់ ឃុំឈើតុំ ស្រុកក្រគរ ខេត្តពោធិ៍សាត់ ។ លោកអធិការនគរបាលស្រុកបន្តថាបន្ទប់ពីទទួលបានព័ត៌មាននេះកម្លាំងទាំងពីស្រុកបានសហការចុះទៅដល់កន្លែងកើតហេតុ ហើយស្រាវជ្រាវចាប់បានជនសង្ស័យ ភ្លាមៗដើម្បីយកមកសួរនាំទើបដឹងរឿងរ៉ាវថាមានជនរងរបួស (ញន វុធ) និងបក្ខពួក ៣នាក់ទៀត បើកគោយន្តម្នាក់មួយដឹកផលអនុផលព្រៃឈើ (អុស) លុះមកដល់ចំណុចកើតហេតុក៏ត្រូវបានជនសង្ស័យ (មិន ខន) និងបក្ខពួកម្នាក់ទៀតឈ្មោះ សុខ ហឿន ស្ពាយកាំភ្លើងមកកាក់គោយន្ត ហើយទាលុយក្នុង១គោយន្តចំនួន៣០០០៛ ចំណែកខាងក្រុមគោយន្តប្រាប់ថា អស់លុយហើយសុំ ១គោយន្ត ចំនួន ២០០០៛ បានហើយ ការតថ្លៃមិនត្រូវរ៉ូវគ្នារឿងលុយ ៣០០០៛ និង ២០០០៛ ក៏ក្លាយទៅជារឿងទំនាស់ពាក្យសម្ដី ឈានដល់ការផ្ទុះអាវុធចំនួន ២គ្រាប់ ១គ្រាប់បាញ់ឡើងលើ និង ១គ្រាប់ទៀតបាញ់ភ្ជុចដី ធ្វើឲ្យត្រូវប្រអប់ជើងឆ្វេងធ្លាយពីម្ខាងទៅម្ខាងតែម្ដង។ លោកវេរៈសេនីយ៍ត្រីបន្តទៀតថា ការបាញ់ គឺអាវុធ AK ស្វាយបត់ ប៉ុន្តែកម្លាំងឃាត់បានតែជនដៃដល់នោះទេ ចំណែកអាវុធត្រូវបានបក្ខពួកជនដៃដល់ឈ្មោះ សុខ ហឿន ប្រមូលយកទៅឲ្យមេរបស់គេឈ្មោះ មាស ម៉មវុទ្ធ ជាយោធាអភិវឌ្ឍន៍នៃក្រសួងការពារជាតិ នៅខេត្តពោធិ៍សាត់។ លោកបញ្ជាក់ទៀតថាជនរងរបួសកំពុងព្យាបាលនៅមណ្ឌលសុខភាពឈើតុំ ចំណែកជនសង្ស័យកំពុងបំពេញសំណុំបែបបទបញ្ជូនទៅស្នងការដ្ឋាននគរបាលខេត្តដើម្បីបន្តតាមនិតិវិធី។
មតិមហាជនកំពុងរងចាំមើលការចំណាត់ការបស់ស្ថាប័នច្បាប់ចាត់ការយ៉ាងម៉ិច? ករណីផ្ទុះអាវុធដោយសារស្នាដៃជនស៊ីវិលបណ្ដាលឲ្យមានមនុស្សរងរបួសខាងលើនេះ ខណៈមានយោធាអភិវឌ្ឍន៍នៃក្រសួងការពារជាតិម្នាក់មានស័ក្តិធំនៅពីក្រោយ ម្យ៉ាងការចាំដីនោះរបៀបម៉ិចបើតំបន់នោះសុទ្ធតែព្រៃអញ្ចឹង សុំឲ្យជំនាញ ឬ ស្ថាប័នពាក់ព័ន្ធចុះពិនិត្យមើលផង ៕ប៉ឹម ពិន
