ខេត្តរតនគិរី៖ ដើម្បីជួយសម្រាលការលំបាកផ្នែកជីវភាពរបស់ប្រជាពលរដ្ឋរងគ្រោះដោយសារខ្យល់កន្ត្រាក់ នៅព្រឹកថ្ងៃទី២៤ ខែសីហា ឆ្នាំ២០២១នេះលោក ថង សាវុន ប្រធានគណៈកម្មាធិការសាខាកាកបាទក្រហមកម្ពុជាខេត្តរតនគិរី និងសហការី បាននាំយកអំណោយមនុស្សធម៌ ចុះសួរសុខទុក្ខប្រជាពលរដ្ឋដែលរងគ្រោះដោយ សារខ្យល់កន្ត្រាក់ ចំនួន ១២ គ្រួសារ នៅ ឃុំបាតាង ១០ គ្រួសារ ឃុំជ័យឧត្តម ១គ្រួសារ និងឃុំសេដា ១គ្រួសារ ដែលពិធីនេះប្រព្រឹត្តទៅនៅភូមិព្រួ ឃុំបាតាង ស្រុកលំផាត់ ខេត្តរតនគិរី។
នៅក្នុងឱកាសចុះសួរសុខទុក្ខនោះលោក ថង សាវុន ប្រធានគណៈកម្មាធិការសាខា បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្តាំផ្ញើសួរសុខទុក្ខ ក្តីអាណិតអាសូរ និងចូលរួមសោកស្តាយចំពោះ ឧប្បទ្ទវហេតុដែលបានកើតឡើង។
ជាមួយគ្នានេះ លោកប្រធាន បានអំពាវនាវសូមបងប្អូនទាំងអស់ ប្រុងប្រយ័ត្នចំពោះបាតុភូតធម្មជាតិ ដែលបង្ករឱ្យមានគ្រោះថ្នាក់គ្រប់ពេលវេលា ហើយប្រឹងប្រែងប្រកបមុខរបរទទួលទាននៅក្នុងខេត្ត ឱ្យបានច្រើនកុំចំណាកស្រុក ដែលបណ្តាលឱ្យមានហានិភ័យក្នុងចម្លងមេរោគកូវីដ-១៩ ដល់ខ្លួនឯង ដល់គ្រួសារ និងសហគមន៍ផងដែរ និងបន្តអនុវត្តតាមវិធានការនានារបស់ក្រសួងសុខាភិបាល ដើម្បីទប់ស្កាត់ការរីករាលដាលនៃជំងឺកូវីដ-១៩តាមវិធី«រស់នៅធម្មតា តាមបែបគន្លងថ្មី » អនុវត្តវិធានការ ៣កុំ ៣ការពារ ហើយសូមបងប្អូនទាំងអស់រួមទាំងកុមារ ដែលគ្រប់អាយុទទួលវ៉ាក់សាំង សូមទៅចាក់វ៉ាក់សាំងការពារជំងឺកូវីដ អោយបានគ្រប់ៗគ្នា។
ទន្ទឹមនឹងនេះ សូមប្រជាពលរដ្ឋទាំងអស់ យកចិត្តទុកដាក់គិតគូរថែទាំសុខភាព ឱ្យបានល្អ ត្រូវរស់នៅមានអនាម័យ និងពិសាទឹកដាំឆ្អិន ដើម្បីជៀសផុតពីជំងឺផ្សេងៗ ។ ម្យ៉ាងវិញទៀត បញ្ហា គ្រោះថ្នាក់ចរាចរណ៍ នៅតែបង្កឱ្យមានអ្នកស្លាប់និងរងរបួសជារៀងរាល់ថ្ងៃ ដូចនេះសូមប្រជាពលរដ្ឋយកចិត្តទុកដាក់គិតគូរពីសុវត្ថិភាពរាល់ពេលធ្វេីដំណេីរ ត្រូវគោរពច្បាប់ចរាចរណ៍ ឱ្យបានខ្ជាប់ខ្ជួន។
ដោយឡែកក្នុងអំណោយចូលរួមសម្រាលទុក្ខលំបាករបស់គ្រួសារងគ្រោះនាពេលនេះក្នុង១គ្រួសារទទួលបាន៖ អង្ករ ៣០ គីឡូក្រាម មី ១កេស ត្រីខ ១យួរ មុង១ ភួយ១ សារុង១ ក្រមា១ កៅស៊ូតង់១ និងថវិកាសរុបទាំងអស់ ១លាន ម្ភៃប្រាំម៉ឺនរៀល៕
ដោយ៖សហការី
