ភ្នំពេញ៖ រថយន្តវីហ្គោមួយគ្រឿង បើកបរដោយបុរសម្នាក់និងមានមនុស្សស្រី៣នាក់រួមដំណើរជាមួយ បើកក្នុងល្បឿនយ៉ាងលឿន ខណៈមកដល់ចំណុចកើតហេតុបានរេចង្កូតជ្រុលទៅបុករះម៉ូតូ២គ្រឿងដែលចតចោលមុខផ្ទះនិងដើមឈើមួយដើមរងការខូចខាត ហើយធ្វើឲ្យបុរសម្នាក់ដែលជាម្ចាស់រងរបួសធ្ងន់ ត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យភ្លាមៗ។

ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១០ និង២០នាទីយប់ថ្ងៃទី២៧ ខែមីនា ឆ្នាំ២០១៦ នៅចំណុចក្រោយជាប់និងរបងមន្ទីរពេទ្យរុស្សីុ តាមបណ្ដោយផ្លូវ៤៣០ ស្ថិតក្នុងសង្កាត់ទំនប់ទឹក ខណ្ឌចំការមន។

ប្រភពព័ត៌មានពីប្រជាពលរដ្ឋដែលរស់នៅក្បែរកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្តបង្កម៉ាក តូយូតាវីហ្គោ ពណ៌ខ្មៅ ពាក់ស្លាកលេខភ្នំពេញ2L-4491 បើកបរដោយបុរសម្នាក់និងមនុស្សស្រី៣នាក់រួមដំំណើរជាមួយ បានធ្វើដំណើរតាមបណ្ដោយផ្លូវ៤៣០ ទិសដៅពីត្បួងទៅជើងក្នុងល្បឿនលឿន ខណៈមកដល់ចំណុចកើតហេតុក៏បានរេចង្កូតជ្រុលទៅបុករះម៉ូតូ២គ្រឿងនិងដើមឈើមួយដើម បណ្ដាលឲ្យរថយន្តបង្ករងការខូចខាតខាងមុខទាំងស្រុង ហើយអ្នកបើកបរក៏រងរបួសធ្ងន់ផងដែរ។

ក្រោយពេលកើតហេតុជនរងគ្រោះដែលជាម្ចាស់រថយន្តបង្កនោះ ត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗចំណែករថយន្តបង្កនិងម៉ូតូត្រូវបានសមត្ថកិច្ចមូលដ្ឋានសហការជាមួយជំនាញធ្វើការវាស់វែងស្ទូចកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីរងចាំដោះស្រាយតាមផ្លូវច្បាប់៕

ដោយ៖ ជីម ភារ៉ា ដង្កោ