ខេត្តកណ្តាល៖ រថយន្តហ៊ីយ៉ាន់ដាយបើកបោះពួយយ៉ាងលឿនបុកម៉ូតូបើកច្រាស់ទិសគ្នាពេញទំហឹង បណ្តាល​ឲ្យមនុស្ស២នាក់រងរបួសយ៉ាងធ្ងន់ធ្ងរ ។ ដោយឡែកអ្នកបើកបររថយន្តបង្កបានរត់គេចខ្លួនបាត់ស្រមោល ។

ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើង កាលពីវេលាម៉ោង២ និង៣០នាទីទៀបភ្លឺ ថ្ងៃទី២៧ ខែមីនា ឆ្នាំ២០១៦ នៅលើកំណាត់ផ្លូវជាតិលេខ៥ ត្រង់ចំណុចចន្លោះគីឡូម៉ែត្រលេខ៣១-៣២ ស្ថិតក្នុងភូមិទួលងោក ឃុំកំពង់លួង ស្រុកពញាឮ ។

មន្ត្រីនគរបាលចរាចរណ៍ស្រុកពញាឮបានឲ្យដឹងថា រថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខ កណ្តាល2A-3684 ជាប្រភេទរថយន្តដឹកទំនិញបើកបរដោយជនមិនស្គាល់អត្តសញ្ញាណ ក្រោយពីកើតហេតុរត់គេវខ្លួណបាត់ស្រមោល ។ ជនរងគ្រោះដែលរងរបួសធ្ងន់នោះទី១-ឈ្មោះ ឌឹម ពន្លក ភេទប្រុស អាយុ២៦ឆ្នាំ(ជាអ្នកបើកបរ) ទី២-ឈ្មោះ រ៉េម ភេទប្រុស អាយុ២៥ឆ្នាំ (ជាអ្នករួមដំណើរ) ។ ទាំង២នាក់នេះមានទីលំនៅក្នុងភូមិសសី ឃុំកោះចិន ស្រុកពញាឮ ជិះម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខភ្នំពេញ1CE-5563 ។

សាក្សីនិយាយថា នៅមុនពេលកើតហេតុគេបានឃើញជនរងគ្រោះទាំង២នាក់ជិះម៉ូតូឌុបគ្នាតាមបណ្តោយផ្លូវជាតិលេខ៥ ក្នុងទិសដៅពីភ្នំពេញឆ្ពោះទៅខេត្តកំពង់ឆ្នាំងដោយល្បឿនលឿន ខណៈជិះដល់ចំណុចកើតហេតុក៏បានបុកគ្នាជាមួយរថយន្តខាងលើនេះពេញមួយទំហឹង បណ្តាលឲ្យរងរបួសយ៉ាងធ្ងន់ធ្ងរទាំង២នាក់តែម្តង ។ ក្រោយពីមានហេតុការណ៍កើតឡើងអ្នកបើកបររថយន្តបង្កបានរត់គេចខ្លួនបាត់ស្រមោល ។ ចំណែកឯជនរងគ្រោះទាំង២នាក់ ត្រូវបានរថយន្តសាមុយដឹកបញ្ជូនទៅសង្គ្រោះនៅមន្ទីរពេទ្យ ។

បច្ចុប្បន្នរថយន្តនិងម៉ូតូ ត្រូវបានសមត្ថកិច្ចនគរបាលជំនាញចរាចរណ៍ស្រុកពញាឮធ្វើការដកហូតនាំយកទៅរក្សាទុកនៅអធិការដ្ឋាន ដើម្បីចាត់ការតាមច្បាប់ ៕

ដោយ៖ ស្អាងជ័យ