អន្តរជាតិ៖ បេីយោងតាមវេបសាយ bangkokpost បានចុះផ្សាយនៅថ្ងៃពុធទី០១ ខែកញ្ញា ឆ្នាំ២០២១នេះថា៖ ក្រុមប៉ូលីសថៃ បានបេីកប្រតិបត្តិការបង្ក្រាប និងឃាត់ខ្លួនមនុស្សចំនួន១៨នាក់ កាលពីយប់ថ្ងៃអង្គារ៍ទី៣១ ខែសីហាម្សិលមិញនេះ បន្ទាប់ពីក្រោយពីពួកគេបានជួបជុំគ្នាផឹកស៊ីក្នុងកម្មវិធីជប់លាងមួយនៅក្នុងផ្ទះ ស្ថិតនៅស្រុក Bang Lamung នៃខេត្តឈុនបុរី ប្រទេសថៃ ។
ប៉ុន្តែអ្វីដែលគួរឱ្យហួសចិត្តបំផុតនោះ មិនត្រឹមតែការជួបជុំផឹកស៊ីពពាក់ពពួនគ្នានោះទេ ថែមទាំងរំលោភលើបម្រាមជួបជុំផឹកស៊ីនាច្បាប់ស្តីពី គ្រាអាសន្ន និងច្បាប់គ្រប់គ្រងជំងឺឆ្លងកូវីដ-១៩។ មិនតែប៉ុណ្ណោះ ម្ចាស់ផ្ទះដែលហៅគេឯងចូលផឹកស៊ីនោះ គឺធ្លាប់កើតជំងឺកូវីដ-១៩ និងទើបព្យាបាលជាសះស្បើយថ្មីៗ។
បេីតាមការបញ្ជាក់ពីអធិការនគរបាលក្រុង Nong Prue លោកវរសេនីយ៍ទោ Chiddecha Songhong បាននិយាយថា ក្នុងប្រតិបត្តិការនេះ ក្រុមប៉ូលីសបានសម្រុកចូលផ្ទះលេខ ២២៤ នៅរមណីយដ្ឋាន Pool Villa ប្រហែលម៉ោង១១យប់មិញ បន្ទាប់ពីទទួលបានពាក្យបណ្តឹងពីអ្នកជិតខាង។
ជាមួយគ្នានេះ ប៉ូលីសថៃ ក៏បានរកឃើញបុរស១៦នាក់ និងស្ត្រី២នាក់កំពុងជប់លៀងនៅក្នុងផ្ទះដោយរីករាយជាមួយតន្ត្រី និងភេសជ្ជៈមានជាតិអាល់កុលផងដែរ។ ក្នុងនោះមានជនជាតិថៃចំនួន១១នាក់ និងជនជាតិឡាវចំនួន៧នាក់ ត្រូវបានឃាត់ខ្លួន និងឆែកឆេររកឃើញថ្នាំមេតំហ្វេតាមីនគ្រីស្តាល់ ០.៥១ ក្រាម, កេតាមីន ០.២៥ ក្រាម និងថ្នាំគ្រាប់អេកស្តាស៊ីចំនួន ៤គ្រាប់ទៀត ក្នុងប្រតិបត្តិការនេះ។
អធិការនគរបាលក្រុង Nong Prue បាននិយាយបន្ថែមថា ក្រោយឃាត់ខ្លួនអ្នកទាំង ១៨នាក់នេះ គឺគ្មាននរណាម្នាក់បានចាក់វ៉ាក់សាំងប្រឆាំង Covid-19 នោះទេ។ ហើយអ្នកខ្លះមកពីខេត្តសាមុតសាខន ជាខេត្តមួយដែលស្ថិតនៅក្នុងតំបន់ក្រហម-ខ្មៅផងដែរ។
គួរបញ្ជាក់ថា ការជួបជុំគ្នាផឹកស៉ីខាងលេីនេះ គឺជាពិធីជប់លៀងខួបកំណើតបុរសជនជាតិថៃឈ្មោះ Sanong ធ្លាប់បានឆ្លងជំងឺកូវីដ-១៩ កាលពីខែមេសាឆ្នាំមុន ប៉ុន្តែក៏បានព្យាបាលជាសះស្បើយផងដែរ។ ក្រោយប្រតិបត្តិការចប់ សមត្ថកិច្ចបាននាំខ្លួនភាគីបង្កមកប៉ុស្តិ៍នគរបាលនងព្រូ ដើម្បីចាត់ការតាមនីតិវិធីច្បាប់៕
ដោយ៖សហការី
