ខេត្តព្រះសីហនុ៖ នេះបេីយោងតាមប្រភពព័ត៌មានពីរដ្ឋបាលខេត្តព្រះសីហនុ បានឱ្យដឹងថា លោក គួច ចំរើន អភិបាល នៃគណៈអភិបាលខេត្តព្រះសីហនុ នៅព្រឹកថ្ងៃអង្គារ ៨កើត ខែភទ្របទ ឆ្នាំឆ្លូវ ត្រីស័ក ព.ស.២៥៦៤ ត្រូវនឹងថ្ងៃទី១៤ ខែកញ្ញា ឆ្នាំ២០២១នេះ បានដឹកនាំមន្ត្រីអញ្ជើញចុះពិនិត្យមើលដំណើរការអាងប្រព្រឹត្តិកម្មចម្រោះទឹកកខ្វក់មួយកន្លែងនៅបណ្តោយឆ្នេរឯករាជ្យជិតពយកំពេញក្នុងសង្កាត់លេខ៣ក្រុងព្រះសីហនុ ដើម្បីផ្ទៀងផ្ទាត់ពីប្រសិទ្ធិភាពនៃការចម្រោះទឹកកខ្វក់ មុនបង្ហូរចូលទៅក្នុងសមុទ្រ។
បេីតាមមន្ត្រីបច្ចេកទេស បានឱ្យដឹងថា បច្ចុប្បន្នអាងប្រព្រឹត្តិកម្មមួយនេះ បានដំណើរការដោយជោគជ័យហើយ ក្នុងការចម្រោះទឹកកខ្វក់ បម្លែងអោយទៅជាទឹកមិនមានការបំពុលបរិស្ថានមុននឹងបង្ហូរចូលទៅក្នុងសមុទ្រ។
សូមបញ្ជាក់ថា៖ បច្ចុប្បន្ននេះនៅក្រុងព្រះសីហនុ មានអាងប្រព្រឹត្តិកម្មចម្រោះទឹកកខ្វក់ចំនួន២កន្លែងដែលកំពុងដំណើរការ ហើយតាមគម្រោង អាងចម្រោះទឹកកខ្វក់ទី៣ ក៏គ្រោងនឹងរៀបចំឆាប់ៗនេះដែរ ដើម្បីទប់ស្កាត់ទឹកកខ្វក់មិនអោយហូរចូលទៅក្នុងសមុទ្រ ៕
ដោយ៖សហការី
