ភ្នំពេញ៖ បុរសម្នាក់ផឹកស្រាស្រវឹងឡើងជោកជាំ បានបើករថយន្តព្រុស បុកជាមួយរថយន្តឡិចស៊ីសLX 470 ត្រង់ទិសដៅបញ្ច្រាស់ទិសគ្នា បណ្ដាលឲ្យរងការខូចខាតទាំងសងខាង ។
ហេតុការណ៍នេះបានកើតឡើងកាលពីវេលាម៉ោង1និង២០នាទីរំលងអធ្រាត្រ ឈានចូលថ្ងៃទី៣១ ខែមីនា ឆ្នាំ២០១៦ នៅចំណុចមុខ ប៉ុស្តិ៍នគរបាលរដ្ឋបាល ទន្លេបាសាក់ តាមបណ្ដោយផ្លូវសុធារស ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
មន្ត្រីសមត្ថកិច្ចប៉ុស្តិ៍ទន្លេបាសាក់បានប្រាប់ឲ្យដឹងថា រថយន្តបង្កម៉ាកព្រូស ពណ៌ស្ក ពាក់ស្លាកលេខ ភ្នំពេញ 2W-6133 បើកបរដោយបុរសម្នាក់ស្រវឹងស្រាឡើងជោកជាំ ហើយបើកក្នុងល្បឿនលឿន ខណៈមកដល់ចំណុចកើតហេតុ ក៏បានរេចង្កូតជ្រុលទៅបុករថយន្តឡិចស៊ីស LX470 ពណ៌ស ពាក់ស្លាកលេខភ្នំពេញ2N-4427 ដែលបើកបរដោយបុរសម្នាក់ក្នុងល្បឿនល្មម និងបើកក្នុងទិសដៅបញ្ច្រាស់គ្នានោះពេញទំហឹងបណ្ដាលឲ្យរងរថយន្តទាំង២ រងការខូចខាតផ្នែកខាងមុខទាំងស្រុង ។
ក្រោយកើតហេតុសមត្ថកិច្ចជំនាញបានធ្វើការវាស់វែង និងយករថយន្តទាំង២គ្រឿងនោះទៅរក្សាទុកនៅអធិការដ្ឋាននគរបាលខណ្ឌចំការមន រងចាំដោះស្រាយគ្នាតាមនីតិវិធីច្បាប់ ៕
ដោយ៖ ជីម ភារ៉ា ដង្កោ
