ភ្នំពេញ៖ នៅក្នុងបណ្តាញទំនាក់ទំនងសង្គម កាលពីម្សិលមិញបានចែកចាយតៗគ្នាអំពីរូបភាព២សន្លឹករបស់យុវតី២នាក់ ដែលជិះម៉ូតូស្គូពី ហើយត្រូវគេអះអាងថា នៅតំបន់កោះពេជ្រ ហើយត្រូវមន្ត្រីនគរបាលឃាត់សួរនាំ ។ យ៉ាងណាក្តី មិនមានការបញ្ជាក់អំពីឈ្មោះយុវតីទាំងពីរនាក់ ដែលជិះម៉ូតូក្នុងសម្លៀកបំពាក់ដ៏សិចស៊ីនោះទេ ។
នៅក្នុងបណ្តាញទំនាក់ទំនងសង្គមហ្វេសប៊ុកបានរិះគន់ ពេបជ្រាយដល់យុវតីទាំងពីរនាក់នោះជាខ្លាំង ។ អ្នកខ្លះថា ដោយសាររដូវក្តៅទើបនាងៗស្ទើរតែមិនពាក់អាវបែបនេះ, អ្នកខ្លះថា ហួសហេតុពេកហើយ នាងអើយ, សម័យទំនើបគឺតែងតែយ៉ាងដូច្នេះឯង, កូននរណាទៅហ្ន, នគរបាលគួរតែចាត់ការ, អ្នកខ្លះថា នាងៗទាំងពីរនាក់នេះ ជាអ្នករកស៊ី(ស្ត្រីពេស្យាចារ) អ្នកខ្លះថា វាជាការប្រមានថយ៉ាងធ្ងន់ដល់វប្បធម៌ជាតិ ។
នៅក្នុងរូបភាពនេះ គេឃើញមន្ត្រីនគរបាលច្រើនរូបនៅពីក្រោយ និងប្រជាពលរដ្ឋអ្នកធ្វើដំណើរចោមរោមមើលនាង ទាំងពីរនាក់នោះ ។ អ្នកខ្លះទំនងជាបានសួរនាំ អំពីការស្លៀកពាក់មិនសមរម្យរបស់យុវតីទាំងពីរនាក់នោះ ។ នៅក្នុងរូបភាពយុវតីទាំងពីរនាក់បានឱនឈ្ងកមុខ ទំនងជាមានការអៀនខ្មាស់ខ្លះដែរ នៅគ្រាដែលមហាជនចោមរោមមើល។ បើទោះជាយ៉ាងនេះក៏ដោយ មន្ត្រីនគរបាល ឬសន្តិសុខប្រចាំការនៅកោះពេជ្រនោះ មិនបានឃាត់យុវតីទាំងពីរនាក់នោះទេ គឺគ្រាន់តែបានអប់រំណែនាំតែប៉ុណ្ណោះ នេះបើតាមបណ្តាញសង្គមហ្វេសបុក ។
រឿងស្លៀកពាក់លេចលើ លេចក្រោម សិចស៊ីហួសហេតុនេះ ក៏ធ្វើឲ្យទាក់ទាញការចាប់អារម្មណ៍ពីក្រសួងវប្បធម៌ និងវិចិត្រសិល្បៈផងដែរកាលពីពេលថ្មីៗនេះ ។ ក្រសួងនេះបានចេញសេចក្តីណែនាំដល់សិល្បការិនី មិនឲ្យស្លៀកពាក់ សិចស៊ីហួសហេតុ ព្រោះតែប្រាថ្នាទាក់ទាញភាពល្បីល្បាញនោះទេ ។ មិនថាតែរូបភាពក្នុងសិល្បៈ ឬក្នុងនៅក្នុងបណ្តាញសង្គមផ្ទាល់ខ្លួននោះទេ គឺមិនត្រូវសិចស៊ីហួសហេតុឡើយ ។ ការព្រមានរបស់ក្រសួងវប្បធម៌ចំពេលដែលសិល្បការិនីមួយចំនួនបានបង្ហោះរូបភាពនៅក្នុងបណ្តាញសង្គមរបស់ខ្លួននូវរូបភាពសិចស៊ី ហួសហេតុពេក ។ សិល្បការិនីមួយចំនួនត្រូវគេពិព័រណ៌នាថា បានបង្ហាញភាពសិចស៊ីដើម្បីដូរយកភាពល្បីល្បាញ គឺល្បីល្បាញក្នុងផ្លូវមិនល្អ ព្រមតាំងការធ្វើឲ្យប៉ះពាល់ដល់វប្បធម៌ដ៏ផូរផង់របស់ខ្មែរនោះទៀតផង ។
មិនសំដៅតែចំពោះសិល្បការិនីម្នាក់ណានោះទេ ក្រសួងវប្បធម៌ និងវិចិត្រសិល្បៈក្រើនរំលឹកជាចំហរ ចំពោះសិល្បការិនីជាទូទៅ ។ ក្នុងពេលដែលមានការអប់រំណែនាំនេះ គេឃើញមានសិល្បការិនីយ៉ាងហោចណាស់២នាក់បានបង្ហោះរូបភាពសិចស៊ីរបស់ខ្លួន ទំនងជាដើម្បីទាញយកប្រជាប្រិយភាព ។ ប៉ុន្តែយ៉ាងណាក៏ដោយ ក្រសួងវប្បធម៌ និងវិចិត្រសិល្បៈមិនបានប្រកាសចាត់វិធានការផ្លូវច្បាប់យ៉ាងណានោះទេ គឺគ្រាន់តែទទូចសុំកុំឲ្យសិចស៊ីពេកតែប៉ុណ្ណោះ ។
នៅក្នុងបណ្តាញសង្គមឯណេះវិញ អ្នកខ្លះនិយាយថា វាជាសិទ្ធិរបស់បុគ្គលម្នាក់ៗក្នុងការស្លៀកពាក់ ។ ប៉ុន្តែយ៉ាងណាក៏ដោយ សិទ្ធិនោះមិនគួរធ្វើឲ្យប៉ះពាល់ដល់វប្បធម៌ អរិយធម៌ពូជសាសន៍ជាតិឯងនោះឡើយ ។ ជាក់ស្តែងករណីយុវតី២នាក់ដែលស្លៀកពាក់សិចស៊ី ស្ទើរតែស្រាតល្វែងលើនោះ វាជាសិទ្ធិរបស់នាងពិតប្រាកដមែន គ្រាន់តែថា សិទ្ធិនោះវាធ្វើឲ្យប៉ះពាល់ដល់ផលប្រយោជន៍រួមរបស់ជាតិសាសន៍មួយ ។ ដូច្នេះ គេគួរតែមានវិធានការផ្លូវច្បាប់ឲ្យបានតឹងតែង មិនមែនត្រឹមតែជាការអប់រំណែនាំថើៗនោះទេ ៕ ហេង សូរិយា
