ភ្នំពេញ ៖ ទីតាំងតារាងបាល់មួយកន្លែងក្នុងមូលដ្ឋានខណ្ឌទួលគោក ដែលបង្កប់ល្បែងសុីសងខុសច្បាប់ បង្កឲ្យមានសម្លេងខ្លាំងៗធ្វេីឱ្យប៉ះពាល់ដល់អ្នកជិតខាងត្រូវបានកម្លាំងសមត្ថកិច្ចចុះបង្រ្កាបរហូតឃាត់មនុស្ស២នាក់ភ្លាមៗ។
ប្រតិបត្តិការចុះបង្រ្កាបនេះ ធ្វើឡើងកាលពីរសៀល ថ្ងៃទី២០ ខែកញ្ញា ឆ្នាំ២០២១ ស្ថិតតាមបណ្តោយផ្លូវបេតុង ក្នុងភូមិ៣ ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
បេីតាមប្រភពព័ត៌មានពីលោកវរសេនីយ៍ឯក ពុំ ទូច នាយផ្នែកព្រហ្មទណ្ឌខណ្ឌទួលគោក បានឱ្យដឹងនៅរសៀលថ្ងៃចន្ទ ទី២០ ខែកញ្ញា ឆ្នាំ២០២១នេះថា៖ កម្លាំងសមត្ថកិច្ចជំនាញ ដឹកនាំដោយលោក សឿ ឡងឌី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះឃាត់ខ្លួនមនុស្សស្រីចំនួន២នាក់ យកមកសាកសួរនៅអធិការដ្ឋាននគរបាលខណ្ឌ ដេីម្បីបន្តនីតិវិធី បន្ទាប់ពីមានប្រជាពលរដ្ឋរាយការណ៍ថាទីតាំងមួយនេះរំខានសម្លេងខ្លាំងៗធ្វេីឱ្យប៉ះពាល់ដល់អ្នកជិតខាង។
ដោយឡែកជុំវិញបញ្ហានេះដែរ លោកវរសេនីយ៍ឯក សុខ ហេង អធិការនគរបាលខណ្ឌទួលគោក ក៏បានឱ្យដឹងដែរថា ចំពោះការឃាត់ខ្លួនមនុស្ស២នាក់ ដែលជាប់ពាក់ព័ន្ធនឹងករណីឆ្នោតឡូតូនេះ ចាំមេីលគោលការរបស់លោក សឿ ឡងឌី ព្រះរាជអាជ្ញារងសាលាដំបូងរាជធានីភ្នំពេញ អនុវត្តវិធានការយ៉ាងម៉េចបន្តទៀត។
បច្ចុប្បន្នជនសង្ស័យដែលត្រូវបានកម្លាំងសមត្ថកិច្ចឃាត់ខ្លួន ត្រូវបានបញ្ជូនទៅកាន់អធិការដ្ឋាននគរបាលខណ្ឌទួលគោក ដើម្បីធ្វើការសាកសួរបន្ត៕ ដោយ រ៉ារ៉ា
