ភ្នំពេញ, ការដ្ឋានសំណង់អគារដ៏ធំមួយកន្លែងស្ថិតនៅ ទីតាំងលើផ្លូវលេខ៥៩៦ សង្កាត់បឹងកក់ទី២ ជាប់នឹងសាលាខណ្ឌទួលគោក តែម្តង បានយកផ្លូវសាធារណៈជាងពាក់កណ្តាល ធ្វើជាកន្លែងចាក់បេតុង បង្កផលលំបាកដល់អ្នកដំណើរ , ការហ៊ុំព័ទ្ធការដ្ឋានមិនត្រឹមត្រូវតាមលិខិតអនុញ្ញាត , យកផ្លូវសាធារណៈ ដាក់ថ្ម ខ្សាច់ ដែក គ្មានសណ្តាប់ធ្នាប់, ខ្សែរ៉តយោងសម្រាប់លើកដែក ថ្ម ខ្សាច់ ដាក់ចំពីលើផ្លូវសាធារណៈ អាចបង្កហានិភ័យខ្ពស់បំផុត គ្រោះថ្នាក់កើតឡើងជាយថាហេតុណាមួយ ប្រសិនបើ ជ្រុះធ្លាក់ដែក ថ្ម ឬដាច់ នេះជាដើម។
បើតាមការលើកឡើងពីមន្ត្រីមូលដ្ឋាន បានបញ្ជាក់ថា, សំណង់នេះសង់កម្ពស់ ២៨ជាន់ មានច្បាប់អនុញ្ញាតត្រឹមត្រូវ ប៉ុន្តែគ្រាន់តែការសាងសង់ គឺយកផ្លូវសាធារណៈស្ទើរទាំងស្រុងសម្រាប់ជាទីតាំងដំណើរការរបស់ខ្លួន ប៉ះពាល់ផលប្រយោជន៍សាធារណៈរួមរបស់ប្រជាពលរដ្ឋ ហើយអាជ្ញាធរមិនបានគិតគូរសោះ ។
ប្រជាពលរដ្ឋបានលើកឡើងថា, ការដ្ឋាននេះនៅមិនឆ្ងាយពីសាលាខណ្ឌទេ គឺជាប់សាលាខណ្ឌតែម្តង គួរណាស់មន្ត្រីជំនាញ អាជ្ញាធរ ពិសេសលោកអភិបាលនៃគណៈអភិបាលខណ្ឌទួលគោក មេត្តាជួយពិនិត្យរៀបចំសណ្តាប់ធ្នាប់អោយបានត្រឹមត្រូវផង។
សូមជម្រាបជូនថា, កន្លងមកការដ្ឋានសាងសង់ ដែលគ្មានការហ៊ុំព័ទ្ធការដ្ឋានអោយបានត្រឹមត្រូវ ការយកផ្លូវសាធារណៈ ជាកន្លែងដាក់សំភារៈបម្រើអោយការងារសំណង់ គឺលោក ឃួង ស្រេង អភិបាលនៃគណៈអភិបាល រាជធានីភ្នំពេញ បញ្ជាអោយផ្អាក ដើម្បីអនុវត្តអោយបានត្រឹមត្រូវតាមលិខិតអនុញ្ញាត។ ដោយឡែកសំណង់ខាងលើនេះ តើអភិបាលខណ្ឌទួលគោក លោក ជា ពិសី ទើបមកកាន់តំណែងថ្មី មានវិធានការដែរ ឬមួយយ៉ាងណា ?
ពាក់ព័ន្ធករណីសំណង់ខាងលើយកផ្លូវសាធារណៈធ្វើជាកន្លែងដាក់ដែក ថ្ម ខ្សាច់ ដាក់ឡានចាក់បេតុង ដោយគ្មានសណ្តាប់ធ្នាប់នោះ លោក ភក្ត្រា ជាមេការសំណង់ បានប្រាប់អង្គភាព”នគរដ្រេហ្គន”តាមទូរស័ព្ទនៅរសៀលថ្ងៃទី២៧ ខែកញ្ញា ឆ្នាំ២០២១ ថា, លោកទទួលស្គាល់លើបញ្ហានេះមែន តែចំពោះការរៀបចំអោយបានល្អ ឬបញ្ចៀសការប៉ះពាល់ផ្លូវសាធារណៈ លោកអះអាងថា ចាំលោកសួរមេធំរបស់គាត់សិន ។
ដោយឡែក លោក ជា ពិសី អភិបាលនៃគណៈអភិបាលខណ្ឌទួលគោក មិនអាចធ្វើការទំនាក់ទំនងបាន ដោយសារទូរស័ព្ទចូលគ្មានអ្នកទទួល ៕
ដោយ, សុខ ខេមរា
