ខេត្តពោធិ៍សាត់៖ កម្លាំងនគរបាលការិយាល័យប្រឆាំងគ្រឿងញៀន នៃស្នងការសហការជាមួយ​ កម្លាំងនគរបាលស្រុកកណ្ដៀង​ និងក្រុងពោធិ៍សាត់​ ដឹកនាំដោយលោកព្រះរាជអាជ្ញារងអមសាលាដំបូងខេត្ត​ ឃាត់ខ្លួនមុខសញ្ញាចែកចាយនិងប្រើប្រាស់សារធាតុញៀនបានម្នាក់ដកហូតបានវត្ថុតាងមួយចំនួន និងឆែកឆេលំនៅឋានផងដែរ។​

ប្រតិបត្តិការខាងលើនេះប្រព្រឹត្តឡើងកាលពីវេលាម៉ោង១១ និង០៧នាទី ថ្ងៃទី៣​ ខែមេសា​ ឆ្នាំ២០១៦​ នៅភូមិពោធិ៍កំបោរ​ ឃុំវាល​ ស្រុកកណ្ដៀង​ ខេត្តពោធិ៍សាត់។​

ប្រភពព័ត៌មានពីសមត្ថកិច្ចបានឲ្យដឹងថា ក្នុងកិច្ចប្រតិបត្តិការខាងលើកម្លាំងធ្វើការឆែកឆេលំនៅឋានរបស់ឈ្មោះ​ ឡេង​ ផល្លី​ ភេទស្រី អាយុ ៤៦ឆ្នាំ​ រស់នៅភូមិឃុំកើតហេតុ​ ក្នុងនោះរកឃើញនិងដកហូតវត្ថុតាង​ ឧបករណ៍​និងសម្ភារមួយចំនួនដូចក្នុងរូបភាពស្រាប់។​

ប្រភពបន្តថា កម្លាំងបានឃាត់ខ្លួនកូនប្រុសស្រ្តីម្ចាស់ផ្ទះជាមុខសញ្ញាចែកចាយ និងប្រើប្រាស់នូវសារធាតុញៀនបានម្នាក់ឈ្មោះ​ ងួន​ លីហួរ​ ភេទប្រុស អាយុ២៤ឆ្នាំ​ រស់នៅក្នុងបន្ទុកគ្រួសារ។​

ប្រភពបន្តទៀតថា ជនសង្ស័យត្រូវបានឃាត់ខ្លួនរួមទាំងវត្ថុតាងនិងសម្ភារ​ បានបញ្ជូនទៅការិយាល័យជំនាញនៃស្នងការដ្ឋាននគរបាលខេត្តដើម្បីបន្តតាមនីតិវិធី៕

ដោយ៖ ប៉ឹម ពិន