មានករណីបាញ់ប្រហារមួយបានកើតឡើងនៅទីក្រុង Tacoma ក្នុងរដ្ឋវ៉ាស៊ីនតោន សហរដ្ឋអាមេរិក នៅល្ងាចថ្ងៃទី២១ខែតុលា(ពេលវេលានៅអាមេរិក) បានសម្លាប់មនុស្ស៤នាក់ ។ កម្លាំងប៉ូលិសកំពុងស្វែងរកតាមចាប់ខ្លួនជនដៃដល់ ។
នៅលើបណ្តាញសង្គម Twitter ស្នងការប៉ូលិសទីក្រុង Tacoma បានឱ្យដឹងថា មានស្ត្រីពីរនាក់និងបុរសម្នាក់ស្លាប់នៅនឹងកន្លែងកើតហេតុ ចំណែកបុរសម្នាក់ទៀតបានស្លាប់ពេលបញ្ជូនទៅកាន់មន្ទីរពេទ្យដោយសាររបួសធ្ងន់ ។
កម្លាំងប៉ូលិស Tacoma បានឱ្យដឹងថា ករណីបាញ់ប្រហារកើតឡើងនៅច្រកផ្លូវតូចខាងក្រោយភូមិគ្រឹះមួយ។ នៅពេលនេះកម្លាំងប៉ូលិសមិនទាន់អាចសន្និដ្ឋានបានថា ជនដៃដល់ធ្វើសកម្មភាពតែម្នាក់ឯងឬក៏មានបក្ខពួកនោះទេ ។ មកទល់ពេលនេះមិនទាន់មានជនសង្ស័យណាមួយត្រូវបានចាប់ខ្លួននៅឡើយ។
នៅក្នុងឆ្នាំ២០២១នេះ មានមនុស្សដល់ទៅ២៧នាក់ហើយបានរងការសម្លាប់នៅក្នុងទីក្រុងដែលមានពលរដ្ឋរស់នៅតែ ២១២ពាន់នាក់ប៉ុណ្ណោះ៕ ដោយ៖សាធី

រូបភាព៖ttxvn