ភ្នំពេញ៖ រថយន្តដឹកម្សៅសុីម៉ង់ត៍របស់ក្រុមហ៊ុនKPI អ្នកបើកបរមិនប្រយ័ត្នជ្រុលទៅបុកម៉ូតូស្មាសរ៉េវ៉ូកិនពីលើបណ្តាលឲ្យខូចខាតស្ទើរទាំងស្រុងតែសំណាងល្អអ្នកបើកម៉ូតូរួចផុតពីគ្រោះថ្នាក់។

គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១០ និង១៥នាទីថ្ងៃទី៥  ខែមេសា ឆ្នាំ២០១៦ តាមបណ្តោយផ្លូវភ្នំពេញហាណូយ ភូមិពោងពាយ សង្កាត់ភ្នំពេញថ្មីី ខណ្ឌសែនសុខ។

ប្រភពពីអ្នកឃើញហេតុការណ៍បានឲ្យដឹងថា នៅមុនពេលកើតហេតុគេឃើញមានយុវជនម្នាក់ឈ្មោះ អៀម ចាន់សេរី អាយុ២៩ឆ្នាំ មុខរបរជាងបាញ់ថ្នាំគ្រឿងសង្ហារឹម ស្នាក់នៅសង្កាត់ភ្លើងឆេះរទេះ ខណ្ឌពោធិសែនជ័យ បានជិះម៉ូតូ១គ្រឿងម៉ាកស្មាសរ៉េវ៉ូ ពណ៌ខ្មៅ ពាក់ស្លាកលេខកណ្តាល1G1052 បើកបរក្នុងទិសដៅពីត្បូងទៅជើងលុះមកដល់ចំណុចកើតហេតុក៏មានរថយន្តក្រុង១គ្រឿងបានបត់ចូលទៅផ្លូវបេតុងពេលនោះជនរងគ្រោះបានឈប់ដើម្បីឲ្យរថយន្តក្រុងនោះទៅផុតសិនពេលនោះស្រាប់តែមានរថយន្តបង្ក១គ្រឿងម៉ាកហុីណូ ពណ៌ខៀវ សន្ដោងកន្ទុយដឹកម្សៅសុីម៉ង់ត៍ ពាក់ស្លាកលេខភ្នំពេញ3B-4552 បើកបរដោយយុវជនម្នាក់ឈ្មោះ ឈុន ស្រស់ អាយុ២៥ឆ្នាំ ស្នាក់នៅម្តុំបឹងក្រពើ សង្កាត់ស្ទឹងមានជ័យ ខណ្ឌមានជ័យ ក្នុងទិសដៅស្របគ្នា(ពីត្បូងទៅជើង)មកពីក្រោយក៏បុកកិនម៉ូតូជនរងគ្រោះពីលើបណ្តាលឲ្យម៉ូតូរងការខូចខាតស្ទើរទាំងស្រុងតែសំណាងល្អអ្នកបើកបរម៉ូតូលោតចេញពីផុតពីគ្រោះថ្នាក់។

ក្រោយកើតហេតុក៏មាននគរបាលចរាចរណ៍ចុះមកធ្វើការវាស់វែងយករថយន្តនិងម៉ូតូទៅរក្សារទុកនៅអធិការដ្ឋាននគរបាលខណ្ឌសែនសុខដើម្បីដោះស្រាយនៅពេលក្រោយ៕

ដោយ៖ តុង សីហា