ភ្នំពេញ, នារសៀលថ្ងៃទី២៦ ខែតុលា ឆ្នាំ២០២១ នេះ សហភាពសហព័ន្ធយុវជនកម្ពុជា បានបើកកិច្ចប្រជុំតាមដាន វឌ្ឍនភាពការងារ និងទិសដៅអនុវត្តបន្តរបស់សមាជិកនីតិបុគ្គល និងអង្គការ សមាគម ចំណុះគណៈកម្មាធិការកណ្តាល ស.ស.យ.ក. តាមរយៈប្រព័ន្ធវីដេអូអនឡាញ Zoom meeting ក្រោមអធិបតីភាព លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា។

សូមបញ្ជាក់ថា, កិច្ចប្រជុំនេះមានគោលបំណងស្តាប់នូវរបាយការណ៍ការងារអនុវត្តកន្លងទៅរបស់សមាជិកនីតិបុគ្គល និងអង្គការ សមាគម ចំណុះគណៈកម្មាធិការកណ្ដាលស.ស.យ.ក.។

លោក ហ៊ុន ម៉ានី បានថ្លែងកោតសរសើរ និងវាយតម្លៃខ្ពស់ចំពោះកិច្ចការងារដែលបានសម្រេចបាន និងកំពុងបន្ដអនុវត្ត។ ជាមួយគ្នានេះដែរ លោកក៏បានជំរុញឲ្យសមាជិកនីតិបុគ្គល និងអង្គការ សមាគម ចំណុះគណៈកម្មាធិការ ស.ស.យ.ក. បន្ដពង្រឹង និងពង្រីកសកម្មភាពការងាររបស់ខ្លួន ដោយរក្សាឲ្យបាននូវសាមគ្គីភាព ឯកភាព និងបំពេញឲ្យគ្នាទៅវិញទៅមកក្នុងការអនុវត្តផែនការការងារដើម្បើបម្រើប្រជាពលរដ្ឋ និងសង្គមជាតិ ។ លោកក៏បានលើកទឹកចិត្តឲ្យសមាជិក សមជិកា ចូលរួមអបអរសាទររួម ឆ្ពោះទៅខួបទី ៤៣ឆ្នាំ ថ្ងៃបង្កើតស.ស.យ.ក. និងបណ្តាកិច្ចប្រជុំដែលកម្ពុជាធ្វើជាម្ចាស់ផ្ទះដូចជា កិច្ចប្រជុំកំពូលអាស៊ី-អឺរ៉ុប ASEM និងការប្រកួត SEA Game ឆ្នាំ២០២៣ ខាងមុខ។

សមាជិកនីតិបុគ្គល អង្គការ សមាគម ចំណុះគណៈកម្មាធិការកណ្តាល ស.ស.យ.ក. បាន និងកំពុងបន្ដសកម្មភាពមនុស្សធម៌ សប្បុរសធម៌ ក៏ដូចជាសកម្មភាពសង្គមនានាដែលបម្រើដល់សុខុមាលភាពប្រជាពលរដ្ឋជាពិសេសក្នុងដំណាក់កាលនៃការឆ្លងរាលដាលជំងឺកូវីដ-១៩ ដែលប្រជាពលរដ្ឋជាច្រើនរងផលប៉ះពាល់៕

ដោយ, សិលា