ភ្នំពេញ៖ ស្ត្រីអាជីវកម្នាក់រត់ទៅប្តឹងសមត្ថកិច្ចប៉ុស្តិ៍ចោមចៅបន្ទាប់ពីមានអាជីវក៦នាក់ទៀតក្នុងនោះមានប្រុស២នាក់បានព្រួតវាយបណ្តាលឲ្យរងរបួសដោយសារតែមានទំនាស់ក្នុងរឿងលក់ដូរ។
ហេតុការណ៍នេះបានកើតឡើងកាលពីវេលាម៉ោង៣ និង៣០នាទីរសៀលថ្ងៃទី៥ ខែមេសា ឆ្នាំ២០១៦ នៅចំណុចជម្ពូវ័ន ផ្លូវជាតិលេខ៤ ភូមិជម្ពូវ័ន សង្កាត់ចោមចៅ ខណ្ឌពោធិ៍សែន។
ជនបង្កទាំងនោះទី១ឈ្មោះនឿន ភេទប្រុស ទី២ឈ្មោះវណ្ណា ភេទប្រុស ទី៣ឈ្មោះស្រី ណា ភេទស្រី ទី៤ឈ្មោះ ស្រីមាន ភេទស្រី និង២នាក់ទៀតនៅមិនទៀតស្គាល់ឈ្មោះនោះទេបានព្រួតគ្នាវាយទៅលើស្ត្រីរងគ្រោះខាងលើ។
តាមសម្ដីជនរងគ្រោះឈ្មោះហ៊ី ចន្ថា អាយុ៣២ឆ្នាំ មុខរបរលក់ម្ជូនៅកន្លែងកើតហេតុ ស្នាក់នៅបុរីសែនមនោរម្យ សង្កាត់ចោមចៅ ខណ្ឌពោធិ៍សែន បានឲ្យដឹងថា រូបគាត់និងក្រុុមជនបង្កដែលលក់នៅជិតគ្នាធ្លាប់មានទំនាស់ជាមួយគ្នាជាយូរមកហើយលុះរហូតមកដល់វេលាកើតហេតុក៏បង្កជម្លោះពាក្យសម្ដីគ្នាម្តងទៀតរហូតដល់ក្រុមភាគីម្ខាងទៀតលើកគ្នាមកព្រួតវាយបណ្តាលឲ្យរបួសដៃខាងស្តាំ ទើបរូបគាត់រត់ទៅប្តឹងសមត្ថកិច្ចនៅទីស្នាក់ការនគរបាលប៉ុស្តិ៍ចោមចៅដើម្បីឲ្យជួយរកយុត្តិធម៌។
ក្រោយពេលកើតហេតុសមត្ថកិច្ចបានចុះមកដល់ចំណុចកើតហេតុនិងធ្វើការឃាត់ជនបង្កទាំង៦នាក់ដើម្បីយកមកធ្វើការសាកសួរ។
សមត្ថកិច្ចបានបញ្ជាក់ថា បន្ទាប់ពីធ្វើការសាកសួររួចភាគីខាងក្រុមបង្កបានសងថ្លៃជំងឺចិត្តចំនួន៥០ម៉ឺនរៀលដើម្បីបញ្ចប់រឿង៕
ដោយ៖ សុខាសែនជ័យ
...
