ខេត្តពោធិ៍សាត់៖ កម្លាំងកងរាជអាវុធហត្ថក្រុងខេត្តសហការគ្នាបង្ក្រាបមុខសញ្ញាចែកចាយ និងប្រើប្រាស់នូវសារធាតុញៀន បានម្នាក់រួមទាំងវត្ថុតាង និងសម្ភារមួយចំនួន ។

ប្រតិបត្តិការនេះធ្វើឡើងកាលពីរសៀលថ្ងៃទី៥ ខែមេសា ឆ្នាំ២០១៦ នៅលើកំណាត់ផ្លូវកៅស៊ូលេខ ១៥៥ ស្ថិតក្នុងភូមិពោធិ៍អណ្ដោត សង្កាត់រលាប ក្រុង-ខេត្តពោធិ៍សាត់ ។

លោកវរសេនីយ៍ទោ ញឹម នី មេបញ្ជាការរងអាវុធហត្ថខេត្ត បានឱ្យដឹងថា ជនសង្ស័យជាមុខសញ្ញាត្រូវបានឃាត់ខ្លួនឈ្មោះ កា សុខា ភេទប្រុស អាយុ ២០ឆ្នាំ រស់នៅភូមិសង្កាត់កើតហេតុ ។ លោកវរសេនីយ៍ទោបន្តថា ក្នុងកិច្ចប្រតិបត្តិការខាងលើ កម្លាំងដកហូតបានវត្ថុតាង និងសម្ភាររួមមាន៖ ម្សៅក្រាមពណ៌សថ្លាចំនួន ១កញ្ចប់, ឧបករណ៍សម្រាប់ប្រើប្រាស់សារធាតុញៀនមួយចំនួន, ម៉ូតូ ១គ្រឿង, មួកសុវត្ថិភាព១, លុយដុល្លារចំនួន ១២ដុល្លារ និងលុយរៀលចំនួន ២៨៦៤០០រៀល ។

លោកមេបញ្ជាការរងបន្តទៀតថា ជនសង្ស័យនិងវត្ថុតាងរួមទាំងសម្ភារត្រូវបានកម្លាំងអាវុធហត្ថយកទៅបន្តការសាកសួរ និងបំពេញសំណុំឯកសារពាក់ព័ន្ធនៅទីបញ្ជាការដ្ឋានកងរាជអាវុធហត្ថខេត្តពោធិ៍សាត់ ដើម្បីបញ្ជូនបន្តតាមនីតិវិធីទៅសាលាដំបូងខេត្ត ៕

ដោយ៖ ប៉ឹម ពិន