ភ្នំពេញ៖ នៅព្រឹកថ្ងៃទី៧ ខែមេសា ឆ្នាំ២០១៦នេះ លោក ទេព ងន អនុប្រធានទី២ព្រឹទ្ធសភា នៃព្រះរាជាណាចក្រកម្ពុជា បានអញ្ជើញជាអធិបតីភាពក្នុងពិធីបំពាក់គ្រឿងឥស្សរិយយស និងមេដាយជូនដល់មន្រ្តីរាជការ នៃអគ្គលេខាធិការដ្ឋានព្រឹទ្ធសភា នៅវិមានព្រឹទ្ធសភា។
នៅក្នុងឱកាសនោះ លោក អ៊ុំ សារឹទ្ធ អគ្គលេខាធិការព្រឹទ្ធសភា បានមានប្រសាសន៍ថា ជារៀងរាល់ឆ្នាំ ការរៀបចំស្នើសុំគ្រឿងឥស្សរិយយស និងមេដាយជូនដល់មន្ត្រីរាជការ ដែលមានស្នាដៃ ដែលអ្នកគ្រប់គ្រងគ្រប់អង្គភាពចំណុះអគ្គលេខាធិការដ្ឋានព្រឹទ្ធសភា វាយតម្លៃមានភាពត្រឹមត្រូវ យុត្តិធម៌ និងតម្លាភាព ដើម្បីជ្រើសរើសមន្ត្រីដែលមានស្នាដៃពិតប្រាកដ ដោយផ្អែកតាមលក្ខណសម្បត្តិ ៥យ៉ាងរួមមាន៖
ទី១-ការគោរពវិន័យ និងសីលធម៌រស់នៅ
ទី២-ឧស្សាហ៍ព្យាយាម សកម្មក្នុងការងារ
ទី៣-មានស្មារតីទទួលខុសត្រូវ និងមានគំនិតផ្តូចផ្តើម ចេះច្នៃប្រឌិត
ទី៤-សាមគ្គីភាព និងទំនាក់ទំនងល្អជាមួយមជ្ឈដ្ឋានខាងក្នុង និងខាងក្រៅ និង
ទី៥-មានឆន្ទៈគិតគូរ និងផ្តល់កិត្តិយសជូនស្ថាប័ន។
ឈរលើគោលការណ៍ខាងលើ នៅដើមខែមេសា ឆ្នាំ២០១៥ គ្រប់អង្គភាពទាំងអស់បានធ្វើការវាយតម្លៃជ្រើសរើសបានមន្ត្រីដែលមានស្នាដៃសរុបចំនួន៦៤រូប ព្រមទាំងបានឆ្លងកាត់ការពិនិត្យ វាយតម្លៃលក្ខណៈសម្បត្តិពីគណៈកម្មការពិនិត្យ និងវាយតម្លៃបេក្ខជន ដែលមានស្នាដៃ។ ហើយជាងនេះទៅទៀត ពិធីបំពាក់គ្រឿងឥស្សរិយយស និងមេដាយនាឱកាសនេះ បានបញ្ជាក់នូវអត្ថន័យវិសេសវិសាល ដើម្បីចារឹកនូវគុណសម្បត្តិ ស្នាដៃរបស់មន្ត្រីរាជការ ដែលបានបំពេញភារកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់ ព្រមទាំងជាការលើកទឹកចិត្តចំពោះការខិតខំបង្កើនស្នាដៃថ្មីៗថែមទៀត ក្នុងការចូលរួមលើកស្ទួយអគ្គលេខាធិការដ្ឋានព្រឹទ្ធសភា និងព្រឹទ្ធសភា ឲ្យទទួលបានការអភិវឌ្ឍន៍ជាប្រចាំតទៅទៀត។
គ្រឿងឥស្សរិយយស និងមេដាយ ដែលត្រូវបំពាក់ជូនមន្ត្រីរាជការនៃអគ្គលេខាធិការដ្ឋានព្រឹទ្ធសភា រួមមានចំនួន៦៤គ្រឿងរួមមាន៖
ទី១-គ្រឿងឥស្សរិយយសព្រះរាជាណាចក្រកម្ពុជា ថ្នាក់មហាសេរីវឌ្ឍន៍ ចំនួន០២គ្រឿង
ទី២-គ្រឿងឥស្សរិយយសព្រះរាជាណាចក្រកម្ពុជា ថ្នាក់មហាសេនា ចំនួន០៣គ្រឿង
ទី៣-គ្រឿងឥស្សរិយយសមុនីសារាភ័ណ្ឌ ថ្នាក់មហាសេនា ចំនួន០២គ្រឿង
ទី៤-គ្រឿងឥស្សរិយយសព្រះរាជាណាចក្រកម្ពុជា ថ្នាក់សេនា ចំនួន០៨គ្រឿង
ទី៥-គ្រឿងឥស្សរិយយសមុនីសារាភ័ណ្ឌ ថ្នាក់សេនា ចំនួន០១គ្រឿង
ទី៦-គ្រឿងឥស្សរិយយសមុនីសារាភ័ណ្ឌ ថ្នាក់អស្សឫទ្ធិ ចំនួន០១គ្រឿង និង
ទី៧-គ្រឿងឥស្សរិយយសមេដាយមាសការងារ ចំនួន៤៧គ្រឿង៕
ដោយ៖ នាយកដ្ឋានព័ត៌មាន
