ភ្នំពេញ, កិច្ចប្រជុំរដ្ឋមន្ត្រីដឹកជញ្ជូនអាស៊ាន និងជប៉ុនលើកទី១៩ ដឹកនាំដោយ លោកទេសរដ្ឋមន្ត្រី ស៊ុន ចាន់ថុល ប្រធានកិច្ចប្រជុំរដ្ឋមន្ត្រីដឹកជញ្ជូនអាស៊ាន និងសមភាគី លោក NAKAYAMA NORIHIRO រដ្ឋមន្ត្រីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុន តាមរយៈប្រព័ន្ធវីដេអូ ពីចម្ងាយ។

សូមជម្រាបជូនថា, នៅថ្ងៃសុក្រ ៨កើត ខែកត្តិក ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១២ ខែវិច្ឆិកា ឆ្នាំ២០២១ នៅរាជធានី ភ្នំពេញ ព្រះរាជាណាចក្រកម្ពុជា៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៃព្រះរាជាណាចក្រកម្ពុជា និងជាប្រធានកិច្ចប្រជុំរដ្ឋមន្ត្រីដឹកជញ្ជូនអាស៊ាន និងសមភាគី លោក NAKAYAMA NORIHIRO រដ្ឋមន្ត្រីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុន បានអញ្ជើញធ្វើជាសហប្រធានកិច្ចប្រជុំរដ្ឋមន្ត្រីដឹកជញ្ជូនអាស៊ាន និងជប៉ុនលើកទី១៩ ដោយមានការចូលរួមពីលោក លោកស្រី រដ្ឋមន្ត្រីដឹកជញ្ជូនអាស៊ាន លោក LIM JOCK HOI អគ្គលេខាធិការអាស៊ាន និងគណៈប្រតិភូកិត្តិយស។

ថ្លែងក្នុងសុន្ទរកថាបើកកិច្ចប្រជុំ លោកទេសរដ្ឋមន្ត្រី បានគូសបញ្ជាក់ពីតួនាទីយ៉ាងសកម្មរបស់ប្រទេស ជប៉ុនក្នុងកិច្ចខិតខំប្រឹងប្រែងកសាងសហគមន៍អាស៊ាន ដែលជាដៃគូពាណិជ្ជកម្ម និងវិនិយោគដ៏សំខាន់ សម្រាប់អាស៊ាន និងជាដៃគូឈានមុខក្នុងការលើកកម្ពស់ការតភ្ជាប់ក្នុងតំបន់ និងផ្តល់ធនធានយ៉ាងច្រើន ក្នុងការគាំទ្រដល់ការអនុវត្តផែនការមេស្តីពីការតភ្ជាប់អាស៊ានឆ្នាំ២០២៥។

លោកទេសរដ្ឋមន្ត្រី បានបញ្ជាក់ថា៖ ក្នុងវិស័យដឹកជញ្ជូន ទំនាក់ទំនងរវាងអាស៊ាន និងជប៉ុននាពេល នេះ បានឈានដល់កម្រិតនៃភាពចាស់ទុំ និងការយោគយល់ថ្មីមួយ ដោយសារការទំនាក់ទំនងទៅវិញ ទៅមកមានការរីកចម្រើនគួរឱ្យកត់សម្គាល់។ ទំនាក់ទំនងកាន់តែរឹងមាំនិងទូលំទូលាយ កំពុងត្រូវបាន បង្កើតឡើង តាមរយៈការធ្វើសមាហរណកម្មស្ថាប័ន ដែលបង្ហាញឱ្យឃើញនូវការរីកចម្រើនលើគំនិតផ្តួច ផ្តើមកិច្ចសហប្រតិបត្តិការដឹកជញ្ជូនសំខាន់ៗ។

លោកទេសរដ្ឋមន្ត្រី បានកត់សម្គាល់ថា៖ ក្នុងរយៈពេលប៉ុន្មានឆ្នាំមកនេះ សកម្មភាព កម្មវិធី និង គម្រោងផ្សេងៗត្រូវបានអនុវត្តដោយជោគជ័យក្រោមក្របខ័ណ្ឌភាពជាដៃគូដឹកជញ្ជូនអាស៊ាន-ជប៉ុន (AJTP) ដោយផ្តោតជាសំខាន់លើសសរស្តម្ភសំខាន់ៗចំនួនបួនគឺ៖ កិច្ចសម្រួលការដឹកជញ្ជូន ហេដ្ឋា រចនាសម្ព័ន្ធដឹកជញ្ជូន ការដឹកជញ្ជូនប្រកបដោយនិរន្តរភាពនិងគុណភាព និងការអភិវឌ្ឍធនធាន មនុស្ស។

លើសពីនេះទៀត ប្រទេសជប៉ុនបានផ្តល់ជំនួយបច្ចេកទេស និងហិរញ្ញវត្ថុ ដើម្បីពង្រីកកំពង់ផែស្វយ័តក្រុង ព្រះសីហនុដែលគ្រប់គ្រងពាណិជ្ជកម្មអន្តរជាតិរបស់កម្ពុជាប្រមាណជាង៦០%។ ដើម្បីបង្កើនប្រសិទ្ធភាព វិស័យភស្តុភារកម្ម ជប៉ុនមិនត្រឹមតែផ្តល់ការគាំទ្រលើការអភិវឌ្ឍហេដ្ឋារចនាសម្ព័ន្ធរឹងប៉ុណ្ណោះទេ ប៉ុន្តែថែម ទាំងផ្តល់ជំនួយដល់កម្ពុជាក្នុងការរៀបចំផែនការមេតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភារ កម្ម គម្រោងប្រើប្រាស់ប្រព័ន្ធPort EDIនៅកំពង់ផែ និងការកសាងសមត្ថភាពផងដែរ។

ឆ្លៀតក្នុងឱកាសនេះ លោកទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់ប្រទេសជប៉ុន ដែលបានផ្តល់ការគាំទ្រប្រកបដោយសប្បុរសរបស់ខ្លួនក្នុងការស្តារ និងសាងសង់ស្ពានចំនួនពីរឆ្លងកាត់ ទន្លេមេគង្គ ការពង្រីកផ្លូវជាតិលេខ៥ពីពីរគន្លងទៅបួនគន្លង និងការធ្វើឱ្យប្រសើរឡើងផ្លូវជាតិលេខ១ ពី ភ្នំពេញទៅវៀតណាម ដែលជាផ្លូវហាយវ៉េអាស៊ានលេខ១ ពីថៃទៅវៀតណាម។

ថ្លែងក្នុងសុន្ទរកថាបិទ លោកទេសរដ្ឋមន្ត្រី បានបង្ហាញពីទំនុកចិត្តលើការអនុវត្តដោយជោគជ័យ និងទាន់វេលានូវឯកសារដែលបានអនុម័តចំនួនពីរគឺ៖ (១) របាយការណ៍ស្តីពីគោលការណ៍ដំណោះ ស្រាយព័ត៌មានវិទ្យា(ICT)សម្រាប់ការគ្រប់គ្រងយានយន្តដឹកជញ្ជូនលើសទម្ងន់កម្រិតកំណត់ និង(២) គោលការណ៍ណែនាំអាស៊ាន-ជប៉ុនស្តីពីការធ្វើសវនកម្មវិញ្ញាបនកម្មសម្រាប់ ស្តង់ដារភស្តុភារកម្មខ្សែ សង្វាក់ត្រជាក់(Cold Chain Logistics) និងគំនិតផ្តួចផ្តើមថ្មីមួយស្តីពីការប្រើប្រាស់ទិន្នន័យធំ(Big Data)ដើម្បីធ្វើឱ្យប្រសើរឡើងការដឹកជញ្ជូន ជាមួយនឹងកិច្ចខិតខំប្រឹងប្រែងរួមគ្នានិងការប្តេជ្ញាចិត្តមុតមាំ៕

ដោយ, សិលា