ខេត្តបាត់ដំបង÷នាព្រឹកថ្ងៃសៅរ៍ ៩កើត ខែកត្ដិក ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៣ ខែវិច្ឆិកា ឆ្នាំ២០២១នេះ សម្តេចក្រឡាហោម ស ខេង អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជា ខេត្តបាត់ដំបង បានអញ្ជើញដឹកនាំកិច្ចប្រជុំបូកសរុបលទ្ធផលអនុវត្តផែនការរួម ឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ខេត្តបាត់ដំបង តាមប្រព័ន្ធវីដេអូ។

អញ្ជើញមានប្រសាសន៍នាឱកាសនោះ សម្ដេចក្រឡាហោម ស ខេង ក្នុងនាមគណៈអចិន្ត្រៃយ៍នៃគណៈកម្មាធិការកណ្ដាល និងក្នុងនាមសម្ដេចអគ្គមហាសេនាបតីតេជោ ហ៊ុន សែន ប្រធានគណបក្ស បានការកោតសរសើរ និងវាយតម្លៃខ្ពស់ ចំពោះក្រុមការងារ ទាំងក្រុមការងារគណបក្ស និងក្រុមការរាជរដ្ឋាភិបាល ក្រុមការងារគណបក្សគ្រប់ថ្នាក់ អាជ្ញាធរ និងកងកម្លាំងទូទាំងខេត្តបាត់ដំបង ដែលបានខិតខំប្រឹងប្រែងពុះពារសម្រេចបានសមិទ្ធិផលនានាជាច្រើន។

សម្រាប់ការងារគ្រប់គ្រងសង្គម សម្ដេចក្រឡាហោម បានគូសបញ្ជាក់ថាអាជ្ញាធរ និងកងកម្លាំងមានសមត្ថកិច្ចគ្រប់ជាន់ថ្នាក់ បានប្រឹងប្រែងយកអស់កម្លាំងកាយប្រាជ្ញាស្មារតីខិតខំរួមគ្នាថែរក្សាការពារសុខសន្តិភាព ស្ថេរភាពនយោបាយ និងថែរក្សាការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គមបានាងល្អប្រសើរ និងថាអាស្រ័យដោយការប្ដេជ្ញាចិត្តចូលរួមអនុវត្តវិធានការនានារបស់រាជរដ្ឋាភិបាលប្រកបដោយប្រសិទ្ធភាពក៏បានរួមចំណែកធ្វើឱ្យរាជរដ្ឋាភិបាលអាចគ្រប់គ្រងការឆ្លងជំងឺកូវីដ-១៩ ហើយឈានទៅចាប់ផ្ដើមសកម្មភាពសេដ្ឋកិច្ច និងសង្គមជាជំហានៗក្នុងក្របខណ្ឌទូទាំងប្រទេស។

សម្ដេចបន្តថា ទោះបីជាជួបប្រទះនឹងបញ្ហានានាក្នុងវិបត្តិជំងឺកូវីដ-១៩នេះយ៉ាណាក្ដី ក៏ក្រុមការងារ និងគណបក្សគ្រប់ថ្នាក់ទូទាំងខេត្តបាត់ដំបង បានខិតខំពុះពារលើកស្ទួយ និងធ្វើឱ្យសម្រេចបានកិច្ចការសំខាន់ៗស្របទៅតាមផែនការឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២ ដែលមកដល់ពេលនេះក្រុមការងារនិងគណបក្សគ្រប់ថ្នាក់ ក៏កំពុងបំពេញភារកិច្ច និងសកម្មភាពពាក់ព័ន្ធនានា។ ក្នុងនោះក៏មានការរៀបចំបូកសរុបសមិទ្ធិផលនៃការអនុវត្តគោលនយោបាយអភិវឌ្ឍន៍ឃុំសង្កាត់អាណត្តិទី៤ និងកំណត់គោលនយោបាយអភិវឌ្ឍន៍ឃុំសង្កាត់អាណត្តិទី៥ជាដើម។

នៅក្នុងឱកាសដឹកនាំកិច្ចប្រជុំនោះដែរ សម្ដេចក្រឡាហោមស ខេង អនុប្រធានគណបក្សប្រជាជនកម្ពុជា ក៏បានមានប្រសាសន៍ណែនាំឱ្យក្រុមការងារគណបក្ស ក្រុមការងារពាក់ព័ន្ធ អាជ្ញាធរ កងកម្លាំងមូលដ្ឋានគ្រប់លំដាប់ថ្នាក់ បន្តរួមកម្លាំងសាមគ្គីគ្នាបំពេញភារកិច្ចបំរើជាតិ និងប្រជាជនឱ្យបានល្អ ពិសេសត្រូវចេញធ្វើសកម្មភាពភ្លាមៗនៅពេលប្រជាពលរដ្ឋជួបការលំបាក ទាំងការលំបាកក្នុងជីវភាពប្រចាំថ្ងៃ ការលំបាកបង្កឡើងដោយវិបត្តិជំងឺកូវីដ-១៩ និងគ្រោះមហន្តរាយធម្មជាតិនានា។ សម្ដេចក៏បានថ្លែងអំណរគុណចំពោះការរួមចំណែកពីក្រុមការងារ និងសប្បុរសជនគាំទ្រដល់បេសកម្មមនុស្សធម៌នៃក្រុមការងារក្រឡាហោមមនុស្សធម៌ខេត្តបាត់ដំបងផងដែរ៕

ដោយ៖ សូរិយា