ភ្នំពេញ: បុរសម្នាក់បើករថយន្តហាយឡេនឌ័រមួយគ្រឿងលឿនដូចហោះជ្រុលទៅបុករះឡំបហរឺតាមួយគ្រឿងចតស្ងៀមនិងរថយន្តមួយគ្រឿងទៀត រួមនឹងផ្ទះលក់ទូរស័ព្ទដៃរងការខូចខាតយ៉ាងដំណំ បណ្ដាលឲ្យបុរសម្នាក់ជាអ្នកបើកឡំប្រឺតារងរបួសធ្ងន់ កាលពីវេលាម៉ោង៣និង ៣០ នាទីយប់ទៀបភ្លឺឈានចូលថ្ងៃទី ១៦ខែធ្នូឆ្នាំ ២០២១នៅតាមបណ្តោយផ្លូវ ២០០៤ ជាប់របងបន្ទាយ ៩៩ស្ថិតក្នុងសង្កាត់កាកាបទី១ ខណ្ឌពោធិ៍សែនជ័យរាជធានីភ្នំពេញ ខណ្ឌពោធិ៍សែនជ័យ។
តាមប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុឃើញបុរសម្នាក់បើករថយន្តហាយឡេនឌ័រមួយគ្រឿងពណ៌ទឹកប្រាក់ពាក់ស្លាកលេខភ្នំពេញ2Z-3204ធ្វើដំណើរទិសដៅពីកើតទៅលិច ក្នុងល្បឿនលឿនដូចហោះលុះមកដល់ចំណុចកើតហេតុខាងលើផ្លូវកោងបួងចង្កូតមិនទាន់ ជ្រុលទៅបុកឡំប្រឺតាមួយគ្រឿងនិងរថយន្តមួយគ្រឿងទៀតដែលចតស្ងៀមរួចបន្តទៅបុកចូលផ្ទះលក់ទូរស័ព្ទដៃបណ្ដាលឱ្យយម្ចាស់កង់បីកំពុងតែដេកលក់ស្រួលរងរបួសធ្ងន់ ត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅឯមន្ទីរពេទ្យភ្លាមៗចំណែកឡំប្រឺតានិងរថយន្ត រួមទាំងផ្ទះលក់ទូរសព្ទដៃរងការខូចខាតយ៉ាងដំណំ។ភ្លាមនោះម្ចាស់រថយន្តបង្កបានចេញពីកន្លែងកើតហេតុបាត់ និងមានអ្នកមកដោះស្លាកលេខយកទៅតាមក្រោយ។
ក្រោយកើតហេតុសមត្ថកិច្ចមូលដ្ឋានបានចុះដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយកទៅរក្សាទុករងចាំធ្វើការដោះស្រាយគ្នាតាមផ្លូវច្បាប់៕
ដោយ៖សុខាសែនជ័យ
