ខេត្តកណ្តាល៖ ស្ត្រីវ័យចំណាស់ម្នាក់បានរងរបួសយ៉ាងធ្ងន់ធ្ងរ ហើយត្រូវបានរថយន្តសាមុយដឹកបញ្ជូនទៅសង្គ្រោះនៅមន្ទីរពេទ្យក្នុងរាជធានីភ្នំពេញ បន្ទាប់ពីស្ត្រីរូបនេះត្រូវបានម៉ូតូសណ្តោងរ៉ឺម៉កដឹកបន្លែបើកកៀរ ខណៈកំពុងជិះម៉ូតូម្នាក់ឯង កាលពីវេលាម៉ោង១៧ និង៣០នាទី ថ្ងៃទី១៨ ខែមេសា ឆ្នាំ២០១៦ នៅលើកំណាត់ផ្លូវជាតិលេខ២១B ស្ថិតក្នុងភូមិព្រែកខ្សេវ ឃុំរកាខ្ពស់ ស្រុកស្អាង ខេត្តកណ្តាល ។
មន្ត្រីនគរបាលចរាចរណ៍ស្រុកស្អាងបានឲ្យដឹងថា ស្ត្រីរងគ្រោះឈ្មោះ សេង ពៅ ភេទស្រី អាយុ៥៧ឆ្នាំ មុខរបរលក់ដូរ មានទីលំនៅក្នុងភូមិព្រែកខ្សេវ ឃុំរកាខ្ពស់ ស្រុកស្អាង ជិះម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខភ្នំពេញ1BN-9556 ។ ចំណែកឯម៉ូតូ សណ្តោងរ៉ឺម៉កម៉ាកស៊ីធី ធុនសេ១០០កូរ៉េ ពណ៌ស្លាទុំ ពាក់ស្លាកលេខយ-9912.ក.ណ1 បើកបរដោយឈ្មោះ ប្រា លីម ភេទប្រុស អាយុ៤២ឆ្នាំ មុខរបរលក់បន្លែ មានទីលំនៅក្នុងភូមិដំរីឆ្លង ឃុំស្អាងភ្នំ ស្រុកស្អាង ។
ប្រភពដដែលបានបន្តថា នៅមុនពេលកើតមានគ្រោះថ្នាក់ចរាចរណ៍ខាងលើនេះសាក្សីបានឃើញម៉ូតូសណ្តោងរ៉ឺម៉កដឹកបន្លែ តែមិនមានបន្លែនោះទេបានបើកបរតាមបណ្តោយផ្លូវជាតិលេខ២១B ក្នុងទិសដៅពីជើងទៅត្បូង(ពីក្រុងតាខ្មៅឆ្ពោះទៅស្រុកស្អាង) ដោយល្បឿនមធ្យម ខណៈបើកដល់ចំណុចកើតហេតុក៏ជ្រុលទៅកៀរម៉ូតូស្ត្រីរងគ្រោះដែលកំពុងបើកបរស្របទិសគ្នា បណ្តាលឲ្យម៉ូតូដួលបោកទៅលើផ្លូវរងរបួសយ៉ាងធ្ងន់ធ្ងរ ។
មន្ត្រីនគរបាលស្រុកស្អាងបានបញ្ជាក់ថា ក្រោយពីមានហេតុការណ៍កើតឡើងបុរសជាអ្នកបើកបរម៉ូតូសណ្តោងរ៉ឺម៉ក ត្រូវបានសមត្ថកិច្ចនគរបាលឃាត់ខ្លួនបណ្តោះអាសន្ន ដើម្បីធ្វើការសាកសួរនៅអធិការដ្ឋាននគរបាលស្រុកស្អាង ។ ចំណែកឯស្ត្រីរងគ្រោះ ត្រូវបានរថយន្តសាមុយដឹកបញ្ជូនទៅសង្រ្គោះនៅមន្ទីរពេទ្យក្នុងរាជធានីភ្នំពេញ ។
បច្ចុប្បន្នមធ្យោបាយពាក់ព័ន្ធទាំង២គ្រឿង ត្រូវបានបញ្ជូនទៅរក្សាទុកនៅអធិការដ្ឋាននគរបាលស្រុកស្អាង ដើម្បីចាត់ការតាមច្បាប់ ៕
ដោយ៖ ស្អាងជ័យ
