ខេត្តកំពង់ធំ៖ មានករណីឃាតកម្មសម្លាប់មនុស្សនៅស្រុកសណ្ដានកាលពីរសៀលម៉ោង២និង៣០នាទីថ្ងៃទី១៩ ខែមេសា ឆ្នាំ២០១៦នៅតំបន់បឹងធំ ខាងត្បូងភូមិកែរ៉ង ឃុំឈើទាល ស្រុកសណ្ដាន់ ខេត្តកំពង់ធំ ។
បើតាមប្រភពព័ត៌មានពីសមត្ថកិច្ចបានអោយដឹងថាករណីឃាតកម្មបាញ់សម្លាប់បង្កឡើងដោយជនសង្ស័យ៣នាក់មានទី១ឈ្មោះ មិន បឿន អាយុ២៥ឆ្នាំ រស់នៅភូមិកែរ៉ង ទី២ ឈ្មោះ ខេង សុផាត អាយុ ២១ឆ្នាំ រស់នៅ ភូមិកែរ៉ង និងទី៣ ឈ្មោះ ខាន់ ឡែន អាយុ២១ ឆ្នាំ ទីលំនៅ ភូមិ ទឹកវិល ឃុំក្លែង ស្រុកសណ្ដាន់ ខេត្តកំពង់ធំ អាវុធដែលជនសង្ស័យប្រើគឺកាំភ្លើងឆ្នុក(កាំភ្លើងកែច្នៃ)។ ចំណែកជនរងគ្រោះមានឈ្មោះ ឈន វួច អាយុ២៦ឆ្នាំទីលំនៅភូមិកើតហេតុខាងលើ ។
តាមប្រភពព័ត៍មានពីកន្លែងកើតហេតុបានអោយដឹងថា ក្នុងចំណោមជនសង្ស័យ៣នាក់ម្នាក់ត្រូវជាបងថ្លៃរួមដៃគ្នាសម្លាប់ប្អូនថ្លៃដោយសារមានគំនុំរឿងជនរងគ្រោះធ្លាប់ទះកំផ្លៀងប្រពន្ធជនសង្ស័យពីមុនមក ហើយជនសង្ស័យទាំង៣កំពុងរត់គេច់ខ្លួន សមត្ថកិច្ចប៉ូលីសនិង កងរាជអាវុធកំពុងតាមចាប់ខ្លួនជនសង្ស័យមកផ្តន្ទាទោសទៅតាមនីតិវីធីច្បាប់។
លោក អួងម៉ូលី អធិការស្រុកសណ្ដាន បានបញ្ជាក់អោយដឹងថាៈ រហូតមកដល់ វេលាម៉ោង ២និង២០នាទីរំលងអាធ្រាត្រឈានដល់ ថ្ងៃទី២០ មេសាឆ្នាំ២០១៦ សមត្ថកិច្ចស្ទាក់ចាប់បានជនសង្ស័យទាំង៣នាក់ហើយនៅចំនុច យក្សកតី ភូមិអង្គសែនជ័យ ឃុំខ្វែងស្រុកសណ្ដាន់ ខេត្តកំពង់ធំ ។
ពេលនេះសមត្ថកិច្ចកំពុងកសាងសំណុំរឿងបញ្ជូនមកស្នងការខេត្តកំពង់ធំនារសៀលថ្ងៃនេះផងដែរ៕
ដោយ៖ ប៊ុន រិទ្ធី
