ខេត្តព្រះសីហនុ៖ បើតាមការបញ្ជាក់ពីប្រធានមន្ទីរធនធានទឹកនិងឧតុនិយមខេត្តព្រះសីហនុ លោក ហេង សោភ័ណរិទ្ធ បានថ្លែងឱ្យដឹងនៅព្រឹកថ្ងៃសុក្រទី២៥ ខែកុម្ភៈ ឆ្នាំ២០២២នេះថា៖ ប្រឡាយអូរឈើទាល ដែលជាប្រឡាយដោះទឹកភ្លៀងក្នុងក្រុងព្រះសីហនុ ដែលបានកាយស្តារកាលពីឆ្នាំមុននោះ! ពេលនេះមានការគោករាក់វិញអស់ដោយសារដី និងខ្សាច់ហូរមកពីទីខ្ពស់កាលពីក្នុងរដូវវស្សា។
ប្រធានមន្ទីរធនធានទឹករូបនេះ បានថ្លែងបន្តថា បច្ចុប្បន្នប្រឡាយដោះទឹកភ្លៀងនេះ កំពុងត្រូវបានកាយស្តារឡើងវិញជាថ្មីដោយមន្ទីរជំនាញ និងតាមការណែនាំរបស់លោកគួច ចំរើន អភិបាលខេត្តព្រះសីហនុ ដោយធ្វើយ៉ាងណាឱ្យបានរួចរាល់មុនរដូវភ្លៀងធ្លាក់ជោគជាំមកដល់ គឺធ្វើទាន់ពេលនៅមានផ្លូវអាចចេញចូលគ្រឿងចក្របាន។
លោក ហេង សោភ័ណរិទ្ធ បានបញ្ជាក់បន្ថែមថា ប្រឡាយដែលកាយស្តារដោយមន្ទីរធនធានទឹកនេះ បានធ្វើចាប់ពីចំណុចក្រោមម្លប់តាប៉ាងទៅដល់អូរអាចម៍មឹក ដោយបានចាប់ផ្តើមអនុវត្តរយៈពេលមួយសប្តាហ៍រួចមកហើយ។ លោកប្រធានមន្ទីររូបនេះ បន្តថា ប្រឡាយកំពុងស្តារនេះ មានទំហំទទឹង១៥ម៉ែត្រ ដោយប្រើគ្រឿងក្រពីរគ្រឿង ដីនិងខ្សាច់ដែលកាយចេញពីក្នុងពោះ ប្រឡាយដាក់នៅសងខាងប្រឡាយជាបណ្តោះអាសន្នរង់ចាំដល់ស្ងួតទើបរកមធ្យោបាយដឹកចេញ ពេលនេះបើមានអ្នកណាត្រូវការដីខ្សាច់ដែលបានកាយចេញពីប្រឡាយនេះអាចមកដឹកយកទៅបាន។ ប្រឡាយផ្សេងទៀតក៏មានការគោករាក់ដែរ តែត្រូវធ្វើដោយមន្ទីរសាធារណការ។
សូមជម្រាបថា ក្រុងព្រះសីហនុ មួយរយៈពេលចុងក្រោយនេះប៉ុន្មានឆ្នាំនេះ គេឃើញមានការលិចលង់ដោយជំនន់ទឹកភ្លៀងរាល់ឆ្នាំ ទោះបីជាអូរនិងប្រឡាយត្រូវបានការស្តាររួចជា បន្តបន្ទាប់ហើយក៏ដោយនៅពេលមានភ្លៀងធ្លាក់លើសពីកម្រិត១០០មីលីម៉ែត្រក្នុងរយៈពេលខ្លីនោះ ដោយសារក្រុងព្រះសីហនុជាតំបន់មានសណ្ឋានដីខ្ពស់ទាប(ភ្នំ)ធ្វើទឹកភ្លៀងហូរគំហុកទៅកាន់តំបន់ទំនាបនាំឱ្យមានការលិចលង់។ ប៉ុន្តែទោះជាយ៉ាងណា បញ្ហាលិចលង់នេះត្រូវបានគេមើលឃើញថាបានកាត់បន្ថយពីការលិចលង់មានរយៈពេលច្រើនថ្ងៃមកនៅត្រឹមរយៈពេលច្រើន បន្ទាប់ពីអូរ និងប្រឡាយ ត្រូវបានកាយស្តារឡើងវិញជាបន្តបន្ទាប់ផងដែរ៕
ដោយ៖ស តារា
