សារព័ត៌មានរបស់អាល្លឺម៉ង់ទាំងអស់នាំគ្នាសរសេរវិភាគពីទស្សនកិច្ចរបស់លោក បារ៉ាក់ អូបាម៉ា ដែលពួកគេយល់ថា គឺជាដំណើរមកដល់ដើម្បីរាយមន្តស្នេហ៍ ជាលើកចុងក្រោយ មុននឹងលោកត្រូវបញ្ចប់អាណត្តិនៅចុងឆ្នាំនេះ។ នេះជាលើកទីប្រាំហើយ ហើយក៏ជាលើកចុងក្រោយដែរ ដែលលោកអូបាម៉ាអញ្ជើញទៅអាល្លឺម៉ង់ ក្នុងនាមជាប្រធានាធិបតីសហរដ្ឋអាមេរិក។
ផ្ទុយទៅវិញមានសំណុំរឿងច្រើនដែលបង្ហាញថា សហរដ្ឋអាមេរិកនិងអាល្លឺម៉ង់ បានចាប់ដៃគ្នាធ្វើការបានយ៉ាងល្អក្នុងពេលកន្លងមក។ ទីមួយក្នុងសំណុំរឿងអ៊ុយក្រែន ដែលអាមេរិក និងអាល្លឺម៉ង់បានចាប់ដៃគ្នាយ៉ាងណែន ដើម្បីការពារអ៊ុយក្រែនតទល់ជាមួយនឹងរុស្ស៊ី។ លោកស្រីអង់ហ្គេឡា មែគែល បានបញ្ចុះបញ្ចូលមិនឲ្យលោកអូបាម៉ា ជួយជាអាវុធទៅឲ្យអ៊ុយក្រែនទេគឺលោកស្រីព្យាយាមរកវិធីផ្សេងដោយសន្តិវិធីដើម្បីបញ្ចប់សង្រ្គាម ហើយដាក់ទណ្ឌកម្មលើរុស្ស៊ី ដែលឈ្លានពានលើអ៊ុយក្រែន។ សំណុំរឿងមួយទៀត គឺការសហការគ្នាក្នុងវិស័យយោធានៅអាហ្វហ្គានីស្ថាន។ បច្ចុប្បន្ននេះ មានតែកងទ័ពអាល្លឺម៉ង់ មួយទេដែលនៅជួយការងាររបស់កងទ័ពអាមេរិកក្នុងប្រទេសអាហ្វហ្គានីស្ថាន។ បារាំងនិង អង់គ្លេស គេនាំគ្នាដកទ័ពរត់ចោលអាមេរិកអស់ហើយ។
សំណុំរឿងចុងក្រោយ ដែលកំពុងតែពុះកញ្រ្ជោលនេះ គឺកិច្ចព្រមព្រាងពាណិជ្ជកម្មសេរីរវាងសហភាពអឺរ៉ុប និងអាមេរិកតែម្តង។ គម្រោងចុះហត្ថលេខាលើកិច្ចព្រមព្រាងនេះ គឺអាមេរិក និងអាល្លឺម៉ងមានជំហរដូចគ្នា ហើយចង់ឲ្យចេញឆាប់ៗ។ សម្រាប់ថ្ងៃអាទិត្យនេះ លោកអូបាម៉ា និងលោកស្រីមែគែលបានទៅបើកសម្ភោធពិធីពិព័រណ៍ឧស្សាហកម្មនៅទីក្រុងហាណូវ្រ៍ ដែលជាពិព័រណ៍ឧស្សាហកម្មធំបំផុត។ ដូចយើងដឹងហើយ ឧស្សាហកម្មធនធ្ងន់របស់អាល្លឺម៉ង់ និងអាមេរិកគឺឈានមុខគេ លើពិភពលោក។
ជុំវិញបញ្ហាកិច្ចព្រមព្រាងពាណិជ្ជកម្មសេរីមានបាតុកម្មនៅអាល្លឺម៉ង់ ដែលមានមនុស្សប្រមាណជាជិត៥ម៉ឺននាក់។ បាតុកម្មនេះ គឺប្រឆាំងមិនឲ្យមានកិច្ចព្រមព្រាងពាណិជ្ជកម្មសេរីរវាងសហភាពអឺរ៉ុប និងសហរដ្ឋអាមេរិក។
អ្វីៗនៅមិនទាន់អាចនិយាយបានទេក្នុងពេលនេះ។ លោកអូបាម៉ាដឹងថាអាល្លឺម៉ង់ ជាជន្ទោលគ្រឹះនៃសហភាពអឺរ៉ុបទាំងយុទ្ធសាស្ត្រនយោបាយ និងសេដ្ឋកិច្ច។ តែយ៉ាងណាក៏ដោយ នេះជាកិច្ចព្រមព្រាង រវាងសហរដ្ឋអាមេរិកនិងសហភាពអឺរ៉ុប ពោលគឺរវាងសហរដ្ឋអាមេរិក និងប្រទេសទាំង២៨ ដែលជាសមាជិកសហភាពអឺរ៉ុប មិនមែនជាមួយតែអាល្លឺម៉ង់ម្នាក់ឯងទេ។
យ៉ាងណាមិញ ឆ្លៀតឱកាស វត្តមានលោកអូបាម៉ារយៈពេល២ថ្ងៃនេះ លោកស្រីអង់ហ្គេឡា មែគែលបានធ្វើការកោះប្រជុំប្រទេសធំៗទាំង៥ នៅទីក្រុង ហាណូវ្រ៍ តែម្តងគឺមានអាល្លឺម៉ង់ បារាំង អង់គ្លេស អ៊ីតាលី និងសហរដ្ឋអាមេរិក នៅថ្ងៃចន្ទស្អែកនេះ។ មានសំណុំរឿងជាច្រើនដែលនឹងត្រូវលើកមកពិភាក្សា ដូចជាបញ្ហាជនភៀសខ្លួនវិបត្តិនៅដើមបូព៌ា សង្រ្គាមប្រឆាំងនឹងអំពើភេរវកម្មជាដើម។ ក្នុងនោះគេក៏ចង់ពិភាក្សាពីរឿងកិច្ចព្រមព្រាងពាណិជ្ជកម្មសេរីនេះដែរ ក៏ប៉ុន្តែបើតាមការចុះផ្សាយរបស់កាសែតអាល្លឺម៉ង់ Der Spiegel គឺលោកហ្រ្វង់ស័រហូរឡង់ បានបដិសេធសុំកុំអាលនិយាយពីសំណុំរឿងកិច្ចព្រមព្រាងនេះ ព្រោះសម្រាប់ពេលនេះ មតិសាធារណៈមិនពេញចិត្តច្រើនណាស់មិនថានៅបារាំងរឺនៅអាល្លឺម៉ង់។
ការចរចាសម្រេចកិច្ចព្រមព្រាងពាណិជ្ជកម្មសេរី ហៅកាត់ថា TTIP នេះត្រូវការពេលវេលាយូរ។ ដូច្នេះគេមិនអាចធ្វើវាដោយបង្ខំទេ។ លោកអូបាម៉ា តាមរយៈការឲ្យដឹងរបស់ខុទ្ទកាល័យគាត់គឺគេចង់ធ្វើកិច្ចព្រមព្រាងនេះ ឲ្យបានមុននឹងលោកអូបាម៉ាចប់អាណត្តិដើម្បីទុកជាកេរ្តិ៍។ តែបើតាមការស្មានវាអាចលំបាកបន្តិច៕
ប្រែសម្រួល៖ ម៉ែវ សាធី
