ខេត្តកណ្ដាល ៖ កូនចិត្តតិរច្ឆានម្នាក់ ជាមុខសញ្ញាជាប់ពន្ធនាគារបានឈ្លោះជេរប្រមាថទៅលើបងប្រុសរបស់ខ្លួន ហើយពេលឪពុកចូលទៅឃាត់ស្រាប់តែប្រតាយប្រតប់ជាមួយឪពុក និងយកកាំបិតប៉័ងតោមកគំរាមកំហែងកាប់ឪពុកទៀតផង។ ករណើនេះកើតឡើងកាលពីថ្ងៃទី១១ ខែមីនា ឆ្នាំ២០២២ វេលាម៉ោង១២និង៣០នាទី ស្ថិតក្នុងភូមិចំបក់ ឃុំសៀមរាប ស្រុកកណ្ដាលស្ទឹង ខេត្តកណ្តាល។
មន្រ្តីនគរបាលស្រុកកណ្ដាលស្ទឹងបានឱ្យដឹងថា ជនសង្ស័យឈ្មោះ ហាំង ចាន់សុខ ភេទប្រុស អាយុ២៩ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅក្នុងភូមិចំបក់ ឃុំសៀមរាប ស្រុកកណ្ដាលស្ទឹង ខេត្តកណ្តាល។ ចំណែកជនរងគ្រោះឈ្មោះ ហំាង មា ភេទប្រុស អាយុ៥៨ឆ្នាំ ជនជាតិខ្មែរ មុខរបរកសិករ(ត្រូវជាឪពុកជនសង្ស័យ)។
ប្រភពដដែលបានបន្តថា កន្លងមក ខណៈដែលជនសង្ស័យប្រើប្រាស់គ្រឿងញៀនរួចតែងតែរករឿងក្រុមគ្រួសារ និងបំផ្លិចបំផ្លាញទ្រព្យសម្បត្តិក្នុងផ្ទះជាញឹកញាប់ទៀតផង។ លុះមកដល់ថ្ងៃទី១១ ខែមីនា ឆ្នាំ២០២២ វេលាម៉ោងកើតហេតុខាងលើ ជនសង្ស័យបានស្រែកជេរប្រមាថបងប្រុសរបស់ខ្លួន ហើយខណៈជនរងគ្រោះជាឪពុកបានចូលទៅឃាត់ គឺជនសង្ស័យមិនព្រមស្ដាប់ទេថែមទាំងយកកាំបិតប៉័ងតោដេញគំរាម និងប្រតាយប្រតប់ជាមួយជនរងគ្រោះជាឪពុកបណ្ដាលឱ្យរយះដៃថែមទៀតផង។ បន្ទាប់មកជនសង្ស័យបានទៅវាយជញ្ជាំងផ្ទះធ្វើពីសង្ក័សីបណ្ដាលឱ្យរងការខូចខាតមួយចំនួន។
ក្រោយពីទទួលបានព័ត៌មានខាងលើភ្លាម កម្លាំងប៉ុស្តិ៍នគរបាលសៀបរាមបានចុះទៅកន្លែងកើតហេតុ និងនាំខ្លួនជនសង្ស័យយកមកធ្វើការសាកសួរ និងកសាងសំណុំរឿងបញ្ជូនទៅកាន់ឣធិការដ្ឋាននគរបាលស្រុកដើម្បីចាត់ការតាមផ្លវច្បាប់។
សូមបញ្ជាក់ថា កន្លងមកជនសង្ស័យធ្លាប់ជាប់ពន្ធនាគាររយៈពេល២ឆ្នាំមកហើយ៕
ដោយ៖ស្អាងជ័យ
