គេនៅចាំបានថា លោក អ៊ូ វីរៈ គឺជាអតីតសង្សារបស់ កឹម មនោវិទ្យា ឬអតីតកូនចៅជំនិតរបស់លោក កឹម សុខា ដែលជាប្រធានមជ្ឈមណ្ឌលសិទ្ធិមនុស្សកម្ពុជា កាលពីលោក កឹម សុខា មិនទាន់បានប្រែកាយទៅជាប្រធានគណបក្សសិទ្ធិមនុស្ស។ ប្រហែលជាដោយសារនៅមានចំណងពាក់ព័ន្ធគ្នាខាងក្រៅឆាកបែបនេះហើយ ទើបបានជាជំរុញឲ្យលោក អ៊ូ វីរៈ ព្យាយាមធ្វើការវិភាគគាំទ្រទាំងផ្កាប់មុខគាំទ្រចំពោះអំពើអសីលធម៌រឿងស្នេហាលួចលាក់របស់លោក កឹម សុខា រហូតដល់គាត់ហ៊ានវាយប្រហារបង្ខូចកេរ្តិ៍ឈ្មោះ និងកិត្តិយសគណបក្សប្រជាជនកម្ពុជា ថាជាអ្នករៀបចំឆាក ឬសេណារីយ៉ូ ក្នុងការបំបាក់ប្រជាប្រិយភាព និងកាត់ផ្តាច់ហិរញ្ញវត្ថុរបស់លោក កឹម សុខា បែបនេះ។
តាមការពិត រឿងទំនាក់ទំនងស្រីញី របស់លោក កឹម សុខានិងកញ្ញា ខុម ចាន់តារាទី ហៅស្រីមុំនោះ គឺជារឿងស្នេហារបស់បុគ្គលឯកជន ជាមួយនឹងអ្នកនយោបាយល្បីឈ្មោះម្នាក់ប៉ុណ្ណោះ វាមិនបានពាក់ព័ន្ធ នឹងរាជរដ្ឋាភិបាល ឬគណបក្សប្រជាជនកម្ពុជាឡើយ។ ការចោទប្រកាន់ចំឈ្មោះមកលើគណបក្សប្រជាជនកម្ពុជា របស់អ្នកវិភាគរូបនោះគឺពិតជារឿងបំផ្លើស និងបរិហារកេរិ៍្ត។ ដូច្នេះហើយ ទើបគណបក្សប្រជាជនកម្ពុជា ប្រើសិទ្ធិការពារកិត្តិយស និងសេចក្តីថ្លៃថ្នូររបស់ខ្លួនក្នុងការដាក់ពាក្យបណ្តឹងតាមនីតិវីធីច្បាប់ទៅតុលាការ។
ការប្តឹងផ្តល់លោក អ៊ូ វីរៈ នៅពេលនេះ គឺមិនបានប៉ះពាល់ទៅដល់សិទ្ធិសេរីភាពក្នុងការបញ្ចេញមតិដូចការលើកឡើងរបស់ក្រុមអ្នកវិភាគផ្កាប់មុខគាំទ្របក្សប្រឆាំងនោះទេ ហើយគណបក្សប្រជាជន ប្តឹងតែអ្នកដែលមួលបង្កាច់សភាពការណ៍ពិត ដែលនិយាយបំផ្លើសទំលាក់កំហុសមកលើអ្នកដ៏ទៃ ហើយគ្មានមូលដ្ឋានច្បាស់លាស់តែប៉ុណ្ណោះ។
រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៤១ ចែងថា ប្រជាពលរដ្ឋខែ្មរមានសេរីភាពខាងការបញ្ចេញមតិរបស់ខ្លួន សេរីភាពខាងសារពត៌មាន សេរីភាពខាងការបោះពុម្ភផ្សាយ សេរីភាពខាងការប្រជុំ។ ជនណាក៏ដោយមិនអាចឆ្លៀតប្រើសិទ្ធិនេះដោយរំលោភ នាំអោយប៉ះពាល់ដល់កិត្តិយសរបស់អ្នកដ៏ទៃ ដល់ទំនៀមទំលាប់ល្អរបស់សង្គម ដល់សណ្តាប់ធ្នាប់សាធារណៈ និងដល់សន្តិសុខជាតិបានទ្បើយ។
ផ្ទុយមកវិញ ការនិយាយបំផ្លើស បរិហារកេរ្តិ៍ មួលបង្កាច់សភាពការណ៍ពិត មិនត្រូវបានចាត់ទុកថា ជាការបញ្ចេញមតិ ឬជាសេរីភាពខាងសារពត៌មាន សេរីភាពខាងការបោះពុម្ភផ្សាយ សេរីភាពខាងការប្រជុំ នោះទេ។
អ្នកវិភាគម្នាក់គឺលោក ឱក សេរីសោភក្តិ៍ ក៏បានយល់ស្របដែរថា ដោយសារតែលោក អ៊ូ វីរៈ បាននិយាយវាយប្រហារចេញឈ្មោះចំថា គណបក្សប្រជាជនកម្ពុជា ជាអ្នករៀបចំឲ្យមានចំណាត់ការខាងផ្នែកតុលាការ ទើបលោកយល់ថា ការប្តឹងរបស់គណបក្សប្រជាជនកម្ពុជាចំពោះលោក អ៊ូ វីរៈ តាមរយៈអ្នកនាំពាក្យគឺជារឿងធម្មតា ព្រោះវាពិតជាបានប៉ះពាល់ដល់កិត្តិយសរបស់គណបក្សកាន់អំណាចពិតមែន។ លោក បានអះអាងទៀតថា ទោះបីជាគណបក្សណាផ្សេងក៏ដោយ ប្រសិនបើមានគេបរិហារកេរ្តិ៍ បែបនេះ ក៏គណបក្សផ្សេងនោះមានសិទ្ធិប្តឹងដែរ គឺដើម្បីរក្សាកេរ្តិ៍ឈ្មោះរបស់គណបក្សគេ និងដើម្បីស្របតាមច្បាប់ដែលបានកំណត់ តាមគោលការណ៍នៃលទ្ធិប្រជាធិបតេយ្យ ហើយក៏ជានីតិវិធីដើម្បីទទួលបាននូវភាពយុត្តិធម៌ និងសច្ចៈធម៌មកវិញ ផងដែរ។
ករណីដែលបង្កឡើងដោយលោក អ៊ូ វីរៈ ហើយបានផ្សព្វផ្សាយតាមវិទ្យុអាស៊ីសេរី កាលពីថ្ងៃទី២៤-២៥ ខែមេសា កន្លងមកនេះ គឺវាកើតចេញជាផលវិបាកនៃទង្វើជាក់ស្តែងរបស់សាម៉ីជន ដែលបានចោទប្រកាន់ថារឿងស្នេហាលួចលាក់របស់ប្រធានស្តីទី គណបក្សសង្គ្រោះជាតិ លោក កឹម សុខា និងកញ្ញាស្រីមុំ គឺជាការរៀបចំរបស់គណបក្សប្រជាជនកម្ពុជា ក្រោយពេលដែលរឿងអាស្រូវនេះបែកធ្លាយដល់សាធារណៈជន ហើយបែរជាទម្លាក់កំហុសទៅលើអ្នកដទៃ។ តើគណបក្សប្រជាជនជាអ្នកដឹកដៃឲ្យលោក កឹម សុខា ទៅជួបជាមួយស្រីមុំ និងជាអ្នកទិញសំបុត្រយន្តហោះឲ្យពួកគេទាំងពីរនាក់ទៅ «គីគីលូ» នៅក្រៅប្រទេសឬយ៉ាងណា? ហេតុអ្វីបានជាអ្នកវិភាគរូបនោះហ៊ានចោទប្រកាន់បែបនេះ? តើគេធ្វើដើម្បីឲ្យប្រជាពលរដ្ឋស្អប់គណបក្សប្រជាជនកម្ពុជា ដើម្បីកេងចំណេញនយោបាយរបស់ក្រុមគេ ឬយ៉ាងណា?
ក្រោយពីមានការប្តឹងផ្តល់ ចំពោះមន្ត្រីសង្គមស៊ីវិលទាំងនោះ បែរជាមានការលើកឡើងថា ស្ថានការណ៍នយោបាយបច្ចុប្បន្នកំពុងឡើងកំដៅ ឬមានការប្រែប្រួលខ្លាំងទៅវិញ នោះគឺជារឿងមិនពិត។ ការប្រើប្រាស់នីតិវិធីច្បាប់នាពេលនេះ គឺសមស្របបំផុតតាមគោលការណ៍នៃលទ្ធិប្រជាធិបតេយ្យ ហើយអនុវត្តតែចំពោះជនណាដែលប្រព្រឹត្តិល្មើសច្បាប់ប៉ុណ្ណោះ។
ករណីលោក ហុង សុខហួរ ក្តី លោក អ៊ុំ សំអាន ក្តី និងករណីផ្សេងៗមួយចំនួនទៀតនោះ គឺជាលទ្ធផលដែលកើតចេញពីទង្វើល្មើសច្បាប់របស់បុគ្គលទាំងនោះ ប៉ុណ្ណោះ។
ជារួម ការឈានដល់ការដាក់ពាក្យបណ្តឹងលោក អ៊ូ វីរៈ ដែលបានបំភ្លៃ និងបរិហារកេរ្តិ៍ គណបក្សប្រជាជនកម្ពុជានាពេលនេះ វាមិនបានធ្វើឲ្យប៉ះពាល់ដល់ដំណើរការនៃលទ្ធិប្រជាធិបតេយ្យនៅកម្ពុជានោះទេ ហើយវាក៏មិនបានប៉ះពាល់ទៅដល់ប្រជាប្រិយភាពភាពរបស់គណបក្សប្រជាជនកម្ពុជាឡើយ ព្រោះនីតិវិធីនេះគ្រាន់តែជាការស្វែងរកនូវសច្ចៈធម៌ និងយុត្តិធម៌សម្រាប់គណបក្សប្រជាជនកម្ពុជាតែប៉ុណ្ណោះ។ កន្លងមកក៏ដូចជាបច្ចុប្បន្ន គណបក្សប្រជាជនបានខិតខំស្តារ និងកសាងប្រទេស និងថែមទាំងបានគិតគូរយ៉ាងហ្មត់ចត់ដល់ជីវភាពរបស់ប្រជាពលរដ្ឋ ព្រមទាំងបានដឹកនាំប្រទេសឲ្យដើរតាមគន្លងនៃលទ្ធិប្រជាធិបតេយ្យសេរីពហុបក្ស និងតាមបែបស៊ីវិល័យ និងនីតិរដ្ឋ ពិតៗ៕
ដោយ នគរដ្រេហ្គន
