ខេត្តបន្ទាយមានជ័យ៖ សមត្ថកិច្ចនគរបាលនៃគណៈកម្មការប្រឆាំងផលិតផល ក្លែងក្លាយ (គ.ប.ផ.ក) បិទនិងដកហូតវត្ថុតាងទំនិញជាច្រេីននៅទីតាំងស្តុក និងចែកចាយគ្រឿងសំអាងចំនួន ពីរកន្លែង របស់ក្រុមហ៊ុនហ្វីលីមីរខេមបូឌា ខូអិលធីឌី(P PHILIMORE CAMBODIA CO LTD) នៅភូមិក្បាលស្ពាន១ សង្កាត់-ក្រុងប៉ោយបែត ខេត្តបន្ទាយមានជ័យ កាលពីថ្ងៃទី៣ ខែមេសាថ្មីៗនេះយកមករក្សាទុកបណ្ដោះអាសន្ន។ បន្ទាប់ពីកម្លាំងជំនាញ ចុះពិនិត្យរកឃើញកំហុសចំនួន ៨ចំណុច ពិសេសអត់ច្បាប់អាជីវកម្ម ក្លែងបន្លំពាណិជ្ជសញ្ញា ម៉ាកពាណិជ្ជនាមរបស់សហគ្រាសផ្សេងទៀត។ នេះបេីតាមការបញ្ជាក់ពីលោកឧត្ដមសេនីយ៍ត្រី កាន វឌ្ឍនា ជាមន្ត្រីនគរបាលយុត្តិធម៌ ឋានៈប្រធានលេខាធិការដ្ឋាន នៃគណ:កម្មការប្រឆាំងផលិតផល ក្លែងក្លាយ (គ.ប.ផ.ក) បានថ្លែងឱ្យដឹងនៅល្ងាចថ្ងៃចន្ទទី០៤ ខែមេសា ២០២២ម្សិលមិញ។
លោកឧត្ដមសេនីយ៍ត្រី កាន វឌ្ឍនា បានបន្ថែមថា៖ ក្នុងកិច្ចប្រតិបត្តិការខាងលើនេះ ដោយមានការសម្របសម្រួលនីតិវិធីពីលោក ស៊ិន ពិសុទ្ធ ព្រះរាជអាជ្ញារងអមសាលាដំបូងខេត្តបន្ទាយមានជ័យ និងសហការជាមួយកម្លាំនគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្ត រួមនិងមន្ត្រីអាជ្ញាធរ ភូមិ សង្កាត់ផងដែរ។
លោកឧត្ដមសេនីយ៍ត្រី កាន វឌ្ឍនា បានឱ្យដឹងទៀតថា៖ បន្ទាប់ពីទទួលបានបណ្ដឹងពីសហគ្រាសមួយ ដែលចោទថា មានករណីក្លែងបន្លំពាណិជ្ជសញ្ញា ម៉ាកពាណិជ្ជនាម លើទីតាំងខាងលើរបស់ ឈ្មោះ ឆម ដាឡែន ភេទស្រី ជនជាតិខ្មែរ មានទីលំនៅ បច្ចុប្បន្ន នៅផ្សារណាត់ដើមពុទ្រា សង្កាត់-ក្រុងប៉ោយប៉ែត ខេត្តបន្ទាយមានជ័យ ក្រុមសមត្តកិច្ច បានចុះស៊ើបអង្កេត ដល់ទីតាំង តែម្ដង។ ប៉ុន្តែម្ចាស់ទីតាំង មិនចូលរួមសហការហើយបានចាក់បិទសោរ រួចគេចខ្លួនបាត់ទៅ។ ភ្លាមៗកម្លាំងជំនាញបានព្យាយាមទាក់ទងទៅម្ចាស់ទីតាំងជាច្រើនលើក ប៉ុន្តែមិនមានការឆ្លើយតបនោះទេ ទេីប លោក ស៊ិន ពិសុទ្ធ ព្រះរាជអាជ្ញារងអមសាលាដំបូងខេត្ត បានសម្រេចបញ្ជាឱ្យកាត់សោរទំលុះ ដើម្បីបើកត្រួតពិនិត្យទំនិញជាក់ស្ដែងតែម្តង។
ប្រភពដដែលបន្តថា ក្រោយធ្វើការត្រួតពិនិត្យជាក់ស្ដែង កម្លាំងជំនាញ រកឃើញទីតាំងស្តុកទុក និងចែកចាយគ្រឿងសំអាង ពីរកន្លែងនេះបានស្តុកទុកផលិផលរួមមាន៖ ចំនួន ១១៧ មុខ ស្មើនឹង ១៤២កេស និងសម្ភារ: ផលិតគ្រឿងសំអាង និងទំនិញមួយចំនួនទៀត។ មន្ត្រីជំនាញ បានគូសបញ្ជាក់ទៀតថា៖ ទីតាំងស្តុកទុក និងចែកចាយគ្រឿងសំអាង ពីរកន្លែងនេះ គឺមិនមានស្លាកសញ្ញា យីហោ ផលិតផល មិនបានចុះបញ្ជី (លេខប្រវេទន៍) ក្លែងបន្លំពាណិជ្ជសញ្ញា ម៉ាកពាណិជ្ជកម្ម របស់សហគ្រាស មួយផ្សេងទៀត មិនមានច្បាប់អាជីវកម្ម គ្មានច្បាប់ស្តុកទុក គ្មានប័ណ្ណពន្ធប៉ាតង់ ការរក្សាទុកផលិតផល ម្ហូបអហារ ពុំមានស្តង់ដាត្រឹមត្រូវ ។
ក្រោយប្រតិបត្តិការចប់ កម្លាំងជំនាញសម្រេចរក្សាទុកវត្ថុតាងទាំងអស់ដោយបិទឃ្លុំបេគ្រឿងសំអាង ហើយសម្រេចបិទទីតាំងខាងលើនេះ ដេីម្បីកោះហៅម្ចាស់ចូលខ្លួនមកដោះស្រាយតាមច្បាប់៕
ដោយ៖សហការី
