លោក Carlos Queiroz បានបញ្ជាក់ថា លោកនឹងចាកចេញពីការងារជាគ្រូបង្វឹកជម្រើសជាតិអេហ្ស៊ីប ដោយបញ្ចប់ការរំពឹងទុកថា លោកនឹងនៅបន្តទៀត បើទោះបីជាមិនអាចដឹកនាំពួកគេទៅកាន់ការប្រកួត World Cup នៅប្រទេសកាតាឆ្នាំនេះក៏ដោយ។
បុរសសញ្ជាតិព័រទុយហ្គាល់ Queiroz វ័យ៦៩ឆ្នាំមានកិច្ចសន្យារយៈពេល៦ខែជាមួយក្រុមជម្រើសជាតិអេហ្ស៊ីបដោយបានចូលកាន់តំណែងក្នុងខែកញ្ញាដើម្បីដឹកនាំក្រុមឆ្លងកាត់វគ្គជម្រុះនៃពូលនៃការប្រកួត World Cup និងចូលទៅក្នុងវគ្គ Playoff កាលពីខែមុនដែលក្រុមនេះបានចាញ់ដោយបាល់ប៉េណាល់ទីក្រោមថ្វីជើងក្រុមសេណេហ្គាល់ដើម្បីខកខានការប្រកួត។លោក Queiroz បាននាំក្រុមអេហ្ស៊ីបទៅវគ្គពាក់កណ្តាលផ្តាច់ព្រ័ត្រ Arab Cup នៅប្រទេសកាតាក្នុងខែធ្នូជាមួយនឹងក្រុមដែលបង្កើតឡើងដោយកីឡាករក្នុងស្រុក ហើយក្នុងខែកុម្ភៈ ជាមួយនឹងក្រុមពេញ អេហ្ស៊ីបបានឈានដល់វគ្គផ្តាច់ព្រ័ត្រ Africa Cup of Nations នៅប្រទេសកាមេរូន តែបានប្រកួតចាញ់សេណេហ្គាល់ ។លោក Queiroz បានសរសេរនៅលើ Twitter របស់លោកថា “ចំពោះទាំងអស់គ្នា អ្នកគាំទ្រអេហ្ស៊ីប អ្នកគាំទ្ររបស់យើង ក្រុមសុបិន្តបុគ្គលិកដែលរួសរាយរាក់ទាក់ និងវេទមន្តរបស់ខ្ញុំ ហើយចំពោះកីឡាករដ៏អស្ចារ្យរបស់ខ្ញុំ រាល់ការចាប់ផ្តើមថ្មីដែលចាប់ផ្តើមដោយការលាដ៏ឈឺចាប់មួយ វាមានន័យថា បេះដូងរបស់យើងពោរពេញទៅដោយការដឹងគុណ ការគោរព និងមិត្តភាព”។ពាក់ព័ន្ធនឹងការលើកឡើងខាងលើ សមាគមបាល់ទាត់ប្រទេសអេហ្ស៊ីបបានប្រកាសថា សមាគមបានពិភាក្សាជាមួយលោក Queiroz ហើយបានយល់ព្រមចែកផ្លូវគ្នា។ អេហ្ស៊ីបនឹងសម្លឹងរកការតែងតាំងអ្នកជំនួសមុនពេលចាប់ផ្តើមការប្រកួតជម្រុះ Cup of Nations នៅខែមិថុនាខាងមុខ។
សូមបញ្ជាក់ថា អេហ្ស៊ីបគឺជាក្រុមជម្រើសជាតិទី៦ ដែលលោក Queiroz បង្វឹកក្នុងអាជីពដ៏វែងរបស់គាត់ ដែលរួមបញ្ចូលផងដែរនូវតួនាទីជាអ្នកចាត់ការទូទៅរបស់ក្លិប Real Madrid និងធ្លាប់ជាជំនួយការលោកAlex Ferguson នៅក្លិបបិសាចក្រហម Manchester United ផងដែរ ៕ (រូបភាព ៖ Reuters/CNA)
