ក្រុមហង្សក្រហម Liverpool បានយកឈ្នះលើក្រុមបិសាចក្រហមManchester United ក្នុងលទ្ធផល ៤ទល់០ ដែលធ្វើឲ្យក្រុមបិសាចក្រហមអស់សង្ឃឹម និងអាម៉ាស់មុខនៅកីឡដ្ឋាន Anfield ដើម្បីប្រជែងក្រុមកំពូលទាំង៤នៅ Premier League ។
ជ័យជម្នះនេះធ្វើឲ្យក្រុម Liverpool ឡើងឈរកំពូលតារាងបណ្តោះអាសន្ន ខណៈដែលក្រុម Manchester City អាចដណ្តើមបានកៅអីកំពូលឡើងវិញក្នុងជំនួបកំពូលទល់នឹងក្រុម Brighton នៅរាត្រីថ្ងៃពុធនេះ ប៉ុន្តែនេះជាការរំលឹកដ៏រំភើបមួយទៀតក្រោមការដឹកនាំក្រុមរបស់លោក Jurgen Klopp ប្តេជ្ញាប្រជែងពាន Premier League ក្នុងការប្រកួតជាប្រវត្តិសាស្ត្ររដូវកាលនេះ។ការបរាជ័យនេះ ក៏ជាការបង្ហាញពីកិច្ចការដ៏ធំដែលប្រឈមមុខនឹងអ្នកចាត់ការថ្មីលោក Erik ten Hag ដែលក្រុមបិសាចក្រុម Man United ជ្រើសរើសឲ្យមកដឹកនាំដែលត្រូវប្រជែងយកតំណែង Top 4 ដើម្បីមានកៅអីទៅលេងនៅ Champions League រដូវកាលក្រោយផងដែរ។ការប្រកួតនោះ ក្រុមបិសាចក្រហមគ្មានកីឡាករ Cristiano Ronaldo ទេ បន្ទាប់ពីការស្លាប់របស់កូនប្រុសដែលទើបនឹងកើតរបស់គាត់ ហើយក្រុមអ្នកគាំទ្រទាំង២បានចូលរួមបង្ហាញពីការសោកស្តាយជាមួយនឹងការលើកអាវលេខ៧ផងដែរ។ក្រុមហង្សក្រហម Liverpool បាននាំមុខ១គ្រាប់នៅនាទីទី៥ រកបានដោយកីឡាករ Luis Diaz ពីការបញ្ជូនបាល់របស់ Salah មុនពេលដែលកីឡាករអេហ្ស៊ីបរូបនេះរកបាន១គ្រាប់ដែរក្នុងតង់ទី១ នាទីទី២២ ពីការបញ្ជូនបាល់ដ៏អស្ចារ្យរបស់ Sadio Mane ។ចូលដល់ការប្រកួតក្នុងតង់ទី២ ក្រុមហង្សក្រហមនៅតែគ្រប់គ្រងបាល់បានល្អ និងរកបានគ្រាប់បាល់២គ្រាប់បន្ថែមទៀត ដោយនៅនាទីទី៦៨ ខ្សែប្រយុទ្ធ Sadio Mane ពីការបញ្ជូនបាល់របស់កីឡាករ Luis Diaz និងគ្រាប់ទី៤រកបានដោយខ្សែប្រយុទ្ធ Salah នៅនាទីទី៨៥ជិតចប់ការប្រកួត ដោយបានបញ្ចប់ក្តីសង្ឃឹមតិចតួចរបស់ Man Utd។បន្ទាប់ពីជ័យជម្នះ ៥-០ របស់ពួកគេនៅទឹកដី Old Trafford កាលពីខែតុលា Liverpool គឺជាក្លិបដំបូងគេដែលស៊ុតបញ្ចូលទីយ៉ាងហោចណាស់៨គ្រាប់ក្នុង Premier League ទល់នឹង United ក្នុងរដូវកាលតែមួយ។ ជ័យជម្នះនេះបានធ្វើឱ្យក្រុមរបស់លោក Jurgen Klopp នាំមុខ២ពិន្ទុលើក្រុមការពារតំណែងជើងឯក Man City ដែលមានការប្រកួតចំនួន៧ដែលនៅសល់មុនពេលប្រកួតជាមួយ Brighton នៅកីឡដ្ឋាន Etihad នៅរាត្រីថ្ងៃពុធនេះ។ក្រុមហង្សក្រហម Liverpool បានឈ្នះពាន League Cup មួយរួចទៅហើយ នឹងត្រូវជួបជាមួយក្រុម Chelsea ក្នុងវគ្គផ្តាច់ព្រ័ត្រ FA Cup និងត្រូវប៉ះជាមួយក្រុម Villarreal នៅវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League រដូវកាលនេះផងដែរ។
ចំណែកក្រុម United ដែលអាចឈានដល់កម្រិតមួយពិន្ទុជាមួយក្រុមលេខ៤ Tottenham បន្តនៅលេខ៦។ នៅថ្ងៃសៅរ៍ បិសាចក្រហមត្រូវទៅជួបក្រុមលេខ៥ Arsenal បន្តទៀត ៕ (រូបភាព ៖ BBC Sport)
