ភ្នំពេញៈ នៅថ្ងៃទី៣ ខែឧសភា ឆ្នាំ២០២២ វេលាម៉ោង១៤និង៣០នាទីសៀល កម្លាំងជំនាញនៃអធិការដ្ឋានខណ្ឌឫស្សីកែវ និងកម្លាំងប៉ុស្តិ៍ឫស្សីកែវបានធ្វើការបង្ក្រាបជនសង្ស័យម្នាក់ជាក់ស្ដែងករណីជួញដូរដោយខុសច្បាប់នូវសារធាតុញៀននៅចំណុចឡឥដ្ឋ ស្ថិតក្នុងក្រុម១០ ភូមិលូ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
លោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវបានឱ្យដឹងថា ជាលទ្ធផលនៃការបង្ក្រាបនេះកម្លាំងជំនាញខណ្ឌបានធ្វើការឃាត់ខ្លួន ជនសង្ស័យចំនួន១នាក់ឈ្មោះ សៀក លី ភេទប្រុស អាយុ១៨ឆ្នាំ ជនជាតិខ្មែរ មានទីលំនៅភូមិស្វាយហ្លួង ឃុំកណ្ដៀង ស្រុក កណ្ដៀង ខេត្តពោធិ៍សាត់ មុខរបរមិនពិតប្រាកដ ។ ចំពោះសម្ភារដកហូតវិញមានម្សៅក្រាមពណ៌សថ្លាសង្ស័យជាគ្រឿងញៀនចំនួន ០១កញ្ចប់ធំ។
បច្ចុប្បន្នជនសង្ស័យរួមទាំងវត្ថុតាងដកហូតបានខាងលើ នគរបាលជំនាញខណ្ឌនិងប៉ុស្តិ៍បានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីអនុវត្តតាមនីតិវិធីច្បាប់៕ ដោយជីណា
