ខេត្តកណ្ដាល: ជនសង្ស័យមុខសញ្ញាលួចម៉ូតូយ៉ាងសកម្មម្នាក់ លួចម៉ូតូសិស្សសាលាម្នាក់ទុកនៅខាងក្រោមផ្ទះ យកទៅលក់នៅផ្សារឃ្លាំងរំសេវ លុះ៨ថ្ងៃក្រោយមក ត្រូវបានសមត្ថកិច្ចក្របួចជាប់។ ករណីឃាត់ខ្លួននេះ ធ្វើឡើងនៅថ្ងៃទី១៩ ខែឧសភា.ឆ្នាំ២០២២ វេលាម៉ោង ១០និង០០នាទី ដែលករណីនេះ បានកើតឡើងកាលពីថ្ងៃទី១១ ខែឧសភា ឆ្នាំ២០២២ វេលាម៉ោង២និង៣០នាទីទៀបភ្លឺ នៅចំណុចភូមិព្រែកដូនហែម ឃុំព្រែកអំពិល ស្រុកខ្សាច់កណ្ដាល ខេត្តកណ្តាល ។
មន្ត្រីនគរបាលស្រុកខ្សាច់កណ្ដាលបានឲ្យដឹងថា ជនរងគ្រោះឈ្មោះ ភាព ស្រីម៉ិជ ភេទស្រី អាយុ១៨ឆ្នាំ ជនជាតិ​ខ្មែរ មុខរបរ សិស្ស មានទីលំនៅភូមិ ឃុំកើតហេតុ ។ចំណែកជនសង្ស័យឈ្មោះ រស់ បញ្ញា ហៅចយ ភេទប្រុស អាយ១៨ឆ្នាំ ជនជាតិ​ ខ្មែរ មុខរបរ មិនពិតប្រាកដ មានទីលំនៅភូមិឃុំកើតហេតុ ។ ដោយឡែកសម្ភារៈបាត់បង់មាន៖ ម៉ូតូ ០១គ្រឿងម៉ាក Honda Scoopy-i ពណ៌ ស ស៊េរី ២០១៩ ពាក់ផ្លាកលេខ កណ្ដាល 1AC-7044។
ប្រភព​ដដែលបន្តថា.កាលពីថ្ងៃទី ១០.ខែឧសភា.ឆ្នាំ២០២២ វេលាម៉ោង៩យប់ ជនរងគ្រោះបានជិះម៉ូតូរបស់ខ្លួនម៉ាក Honda Scoopy-i ពណ៌ ស ស៊េរី ២០១៩ ពាក់ផ្លាកលេខ កណ្ដាល 1AC-7044 ត្រឡប់ពីសាលារៀននៅរាជធានីភ្នំពេញមកផ្ទះ ហើយទុកម៉ូតូនៅក្រោមផ្ទះតែមិនបានចាក់សោរកម៉ូតូទេ ប៉ុន្តែបានដកកូនសោរម៉ូតូចេញពីម៉ូតូ ឯទ្វារដែកនៅក្រោមផ្ទះក៏មិនបានចាក់សោរដែរ តែសោរទ្វាររបងផ្ទះខាងមុខបានចាក់សោរម៉ាក Solix ពីខាងក្នុងរបង រួចជនរងគ្រោះក៏ឡើងទៅដេកនៅបន្ទប់លើផ្ទះ ។ លុះដល់ថ្ងៃទី១១ ថ្ងៃខែឆ្នាំដដែលវេលាម៉ោង ១៣និង០០នាទី ជនរងគ្រោះបានចុះមកក្រោមផ្ទះ ស្រាប់តែបាត់មិនឃើញម៉ូតូខ្លួន ឯសោរទ្វាររបងផ្ទះខាងមុខខូចរបូតជ្រុះមកដី បន្ទាប់មកជនរងគ្រោះមកដាក់ពាក្យបណ្ដឹងនៅប៉ុស្ដិ៍នគរបាលព្រែកអំពិល ។ សមត្ថកិច្ចនគរបាលប៉ុស្តិ៍ សហការជាមួយកម្លាំងផ្នែកនគរបាលយុត្តិធម៌ បានចុះស្រាវជ្រាវ កសាងសំណុំរឿង ហើយកំណត់មុខសញ្ញាជនសង្ស័យឈ្មោះ រស់ បញ្ញា ហៅ ចយ ។ ដល់ថ្ងៃទី១៩.ខែឆ្នាំដដែល វេលាម៉ោង១០ សមត្ថកិច្ចចុះល្បាតក៏ប្រទះឃើញជនសង្ស័យកំពុងនៅក្នុងវត្ត ព្រែកអំពិល សមត្ថកិច្ចឃាត់ខ្លួនជនសង្ស័យមកសាកសួរ។
នៅចំពោះមុខសមត្ថកិច្ច ជនសង្ស័យបានឆ្លើយសារភាពថា៖ ខ្លួនពិតជាបានលួចយកម៉ូតូរបស់ជនរងគ្រោះពិតប្រាកដមែន ឯម៉ូតូខ្លួនយកទៅលក់ឲ្យជនមិនស្គាល់អត្តសញ្ញាណម្នាក់ នៅម្តុំឃ្លាំងរំសេវ រាជធានីភ្នំពេញ បានប្រាក់៤០០ដុល្លារ យកប្រាក់ទិញគ្រឿងញៀនប្រើប្រាស់ និងស៊ីចាយអស់ ។
ករណីនេះ.សមត្ថកិច្ចប៉ុស្តិ៍បានបញ្ជូនជនសង្ស័យមកអធិការដ្ឋាននគរបាលស្រុក បន្តអនុវត្តតាមនីតិវិធី៕

ដោយ៖ ស្អាងជ័យ