ភ្នំពេញ៖ យុវជនម្នាក់ស្រវឹងស្រាឡើងជោកជាំ បានបើករថយន្តកាមរីបាឡែនក្នុងល្បឿនយ៉ាងលឿន ហើយរេចង្កូតជ្រុលទៅបុករះរនាំងដែកពុះចែកទ្រូងផ្លូវបណ្ដាលឲ្យបាក់អស់ចំនួន៤ផ្ទាំងរងការខូចខាត ។
ហេតុការណ៍នេះបានកើតឡើងកាលពីវេលាម៉ោង១០នឹង៣០នាទីយប់ថ្ងៃទី២ ខែឧសភា ឆ្នាំ២០១៦ តាមបណ្តោយផ្លូវព្រះមុន្នីវង្ស កែងនឹងផ្លូវលេខ២៩៤ ស្ថិតក្នុងសង្កាត់បឹងកេងកងទី២ ខណ្ឌចំការមន ហើយរថយន្តបង្កបានព្យាយាមបើករត់តែត្រូវបាន កម្លាំងសមត្ថកិច្ចដែលដាក់គោលដៅពិនិតជាតិអាគុលនៅចំណុចមុខវិទ្យាល័យបឹងត្របែក ឃាត់បានទាំងរថយន្តបង្កនិងម្ចាស់។
តាមប្រភពពត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរថយន្តកាមេរីបាឡែន ពណ៍ស ពាក់ស្លាកលេខ ភ្នំពេញ 2I-7233 បើកបរដោយយុវជនម្នាក់ស្រវឹងស្រាឡើងជោគជាំ ដោយបើកបរតាមបណ្តោផ្លូវព្រះមុន្នីវង្ស ទិសដៅពីជើងទៅត្បូងក្នុងល្បឿនយ៉ាងលឿន ពេលមកដល់កន្លែងកើតេហតុ ក៏បានរេចង្កូតទៅបុករះរនាំងដែកពុះចែកទ្រូងផ្លូវ បណ្តាលឱ្យបាក់បែកអស់ចំនួន៤ផ្ទាំង ហើយរថយន្តបង្កបានព្យាយាមបើករត់តែត្រូវកម្លាំងសមត្ថកិច្ចដែលដាក់គោលដៅពិនិត្យជាតិអាគុលនៅចំណុចមុខវិទ្យាល័យបឹងត្របែក ក៏បានឃាត់បានទាំងរថយន្តបង្កនិងម្ចាស់តែម្ដង ។
ក្រោយមកសមត្ថកិច្ចជំនាញបានមកធ្វើការវាស់វែង និងយករថយន្តបង្ករួមទាំងម្ចាស់ទៅកាន់ការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយគ្នាតាមនីតិវិធីច្បាប់ ៕
ដោយ៖ ជីម ភារ៉ា ដង្កោ
