ភ្នំពេញ៖ ផ្ទុះកក្រើកពេញបណ្តាញសង្គមនិងក្រុមអ្នកគាំទ្រវិស័យកញ្ញាឯកក្រោយបុរសម្នាក់អះអាងថាខ្លួនជាប្តីរបស់បេក្ខភាពកញ្ញាឯកចក្រវាឡកម្ពុជា ពាក់ស្លាកលេខ៧ កញ្ញា សុគន្ធ ចរិយា ហើយបានតាមរករឿងនាងដល់មុខឆាកប្រកួតរហូតបុរសនោះបានទម្លាយវីដេអូនៅលើបណ្តាញសង្គមTik Tok ថានាងមានទាំងកូននិងប្តីរួចហើយ។ បន្ទាប់ពីលេចធ្លាយនាំឲ្យមានការជជីកសួរ និងបារម្ភនឹងការប៉ះពាល់ដល់កម្មវិធីប្រកួតបេក្ខភាពកញ្ញាឯករូបនេះបានចេញមុខធ្វើការបដិសេធនូវរឿងរ៉ាវមានប្តី និងកូន ហើយឡើងលើឆាកប្រកួតបវរកញ្ញា ហើយពេលនេះនាងបង្ហាញភស្តុតាងមួយចំនួនទៀត។
មុននេះទាំងនាងនិងអ្នកផលិតកម្មវិធីលើកឡើងថា ពួកគេត្រឹមតែជាសង្សារនឹងគ្នាតែប៉ុណ្ណោះមិនមែនជាប្តីប្រពន្ធ ក៏មិនធ្លាប់រៀបការ ឬចុះអេតាស៊ីវិលអ្វីដែរ។ក្រៅពីចេញមុខបកស្រាយ បេក្ខនារីរូបនេះថែមទាំងបានលើកឡើងថា នាងស្គាល់បុរសខាងលើរយៈពេល២ឆ្នាំ ហើយរស់នៅមិនចុះសម្រុងគ្នាទើបបែកគ្នាហើយបុរសនោះក៏ថែមទាំងធ្លាប់បានប្រើប្រាស់អំពើហិង្សាលើរូបនាងផងដែរ។ នាងលើកឡើងជាសំណួរចោទទៅកាន់អ្នករិះគន់នាងវិញថា គ្រាន់តែរស់នៅមិនចុះសម្រុងគ្នាបែកគ្នានាងខុសដែរឬ? នាងថានឹងបន្តទម្លាយភស្តុតាងជាក់ស្តែងមួយចំនួនបន្ថែមទៀតដើម្បីរកភាពស្អាតស្អំសម្រាប់ខ្លួនឯង ក្រោយពេលកម្មវិធីប្រកួតចប់សប់គ្រប់។ ទាំងនាងនិងអ្នកផលិតកម្មវិធីលើកឡើងថា នឹងមិនបោះបង់ចោលឬលប់ឈ្មោះនាងចេញពីកម្មវិធីប្រកួតកញ្ញាឯកចក្រវាឡកម្ពុជា ២០២២នេះដែរ។
មុនថ្ងៃប្រកួតផ្តាច់ព្រ័ត្រមកដល់បេក្ខនារីរូបនេះបានបញ្ចេញសារឆ្លើយឆ្លង ដែលជាសារជេរប្រមាថនិងគំរាមទៅកាន់រូបនាងផងដែរ ដែលការបញ្ចេញនេះនាំឲ្យមិត្តភក្ដិដែលបានស្គាល់នាងចូលបញ្ចេញសារហួសចិត្តនិងលើកទឹកចិត្តទៅកាន់នាងជាហូរហែ។គេនៅបន្តរង់ចាំតាមដានទៀតថាតើករណីនេះនឹងទៅជាយ៉ាងណា ខណៈដែលពេលនេះប្រសិនបើបេក្ខនារីខាងលើរកភស្តុតាងឃើញថាពិតជាធ្លាប់រងហិង្សាពីសំណាក់បុរសខាងលើមែន ករណីនេះនឹងកាន់តែរីកធំជាងមុនជាក់ជាមិនខាន៕

        

ដោយ ៖ វឌ្ឍនា