ខេត្តកំពត៖ ស្ត្រីម្នាក់ត្រូវរន្ទះបាញ់ស្លាប់ ពេលដែលកំពុងត្រងទឹកភ្លៀងទុកប្រើប្រាស់ ខណៈមេឃកំពុងភ្លៀងខ្លាំងមានផ្គររន្ទះផង នោះ ។ ករណីរន្ទះបាញ់ស្ត្រីខាងលើនេះ បានកើតឡើងកាលពីវេលាម៉ោង១២ថ្ងៃ ត្រង់ ថ្ងៃទី៦ ខែឧសភា ឆ្នាំ២០១៦ នៅភូមិ ស្នាយអញ្ឆិត ឃុំស្នាយអញ្ឆិត ស្រុកជុំគិរី ខេត្តកំពត ។

អាជ្ញាធរមូលដ្ឋានបានឲ្យដឹងថា ស្រ្តីរង គ្រោះដោយសាររន្ទះបាញ់ឈ្មោះ ឆេង រឿន អាយុ៤៥ឆ្នាំ ជាកសិករ រស់នៅភូមិ-ឃុំខាង លើ ។ អ្នកភូមិបានឲ្យដឹងដែរថា នៅមុនពេល មានរន្ទះបាញ់សម្លាប់ស្ត្រីរងគ្រោះខាងលើ នេះមេឃបានបង្អុរភ្លៀងមួយមេយ៉ាងធំ តែពុំមានខ្យល់កន្ត្រាក់ខ្លាំងនោះទេ។ ដោយ សារតែមិនមានខ្យល់ និងទំនងជាស្ត្រីរង គ្រោះស្តាយទឹកភ្លៀងផងនោះក៏បានចេញ ពីក្នុងផ្ទះមកត្រងទឹកភ្លៀងដាក់ក្នុងពាង ហើយក៏ត្រូវរន្ទះបាញ់ស្លាប់តែម្តង ។ ភ្លាមៗ ក្រោយពីកើតហេតុក្រុមគ្រួសារបានយក ស្រ្តីរងគ្រោះទៅកប់ដីដើម្បីជួយសង្គ្រោះ ប៉ុន្តែស្ត្រីរងគ្រោះមិនអាចរស់វិញបានទេ ។

ដោយឡែកនៅថ្ងៃដដែលវេលាេម៉ោង ២និង៤០នាទីរសៀលនៅក្នុងភូមិព្រែក ក្រែង ឃុំព្រែកត្ន​ោត ស្រុកទឹកឈូ ខេត្ត កំពត ស្រ្តីម្នាក់ទៀតក៏បានរងគ្រោះដោយ សាររន្ទះបាញ់ដូចគ្នា។ ប៉ុន្តែត្រូវបានក្រុម គ្រួសារនិងអ្នកភូមិនាំគ្នាយកទៅកប់ដីតាម របៀបចាស់បុរាណ ហើយក៏បានដឹងខ្លួន វិញដែរ ។

ស្ត្រីដែលត្រូវរន្ទះបាញ់ខណៈកំពុង អង្គុយនៅក្នុងផ្ទះបណ្តាលឲ្យរបួសធ្ងន់ ឈ្មោះ ហេង ស្រីពៅ អាយុ២៣ឆ្នាំ រស់នៅ ភូមិ-ឃុំកើតហេតុ ។
គួរបញ្ជាក់ថា នៅចុងខែមេសា និងដើម ខែឧសភា ឆ្នាំ២០១៦នេះមានភ្លៀងធ្លាក់ តាមបណ្តាខេត្តមួយចំនួនធំ ប៉ុន្តែពេលដែល មានភ្លៀងធ្លាក់នោះលាយឡំជាមួយខ្យល់ កន្ត្រាក់បណ្តាលឲ្យផ្ទះប្រជាពលរដ្ឋបាក់ អស់ជាច្រើនរយខ្នង ព្រមទាំងមន្ទីរក្រសួង របស់រដ្ឋថែមទៀតផង ។ មិនតែប៉ុណ្ណោះ គ្រោះធម្មជាតិនេះបង្កឲ្យប្រជាពលរដ្ឋស្លាប់ និងរបួសជាច្រើននាក់ និងសត្វពាហនៈ ក៏បានងាប់ជាបន្តបន្ទាប់៕

ដោយ៖ សហការី