ភ្នំពេញ៖លោក ឡេង វាសនា នាយរងផ្នែកនគរបាលព្រហ្មទណ្ឌពោធិសែនជ័យប្រាប់នារសៀលនេះឲ្យដឹងថា កាលពីវេលាម៉ោង ១៤ និង៣០នាទី ថ្ងៃទី២៣ ខែកក្កដា ឆ្នាំ២០១៥ នគរបាលខណ្ឌពោធិសែនជ័យដឹកនាំដោយលោកវរសេនីយ៍ទោ យឹម សារ៉ាន់ បានធ្វើការស្រាវជ្រាវតាមឃាត់ខ្លួនបានជនសង្ស័យម្នាក់ទៀត ករណីគ្រឿងញៀន និងប្រើប្រាស់អាវុធខ្លីអត់ច្បាប់១ដើម។
លោក ឡេង វាសនា ប្រាប់បញ្ជាក់ឲ្យដឹងថា កាលពីវេលាម៉ោង ២៣និង៣០ នាទី យប់ថ្ងៃទី២១ ខែកក្កដា កំលាំងល្បាតអន្តរាគមន៍ពេលយប់ របស់អធិការដ្ឋាននគរបាលខណ្ឌពោធិសែនជ័យ បានឃាត់ជនសង្ស័យម្នាក់ឈ្មោះ ឈន មករា ភេទប្រុស អាយុ២៦ឆ្នាំ មុខរបរមិនពិតប្រាកដ ជិះម៉ូតូម៉ាក និច ពណ៍សលាយខ្មៅ ពាក់ស្លាកលេខ ភ្នំពេញ 1BX-7150 ដកហូតបានអាវុធខ្លី កា៥៩ មួយដើម និង គ្រឿងញៀនតូចធំ ៦កញ្ចប់ (តូច៤កញ្ចប់ ធំ២កញ្ចប់) ។ មុនពេលឃាត់ខ្លួន គឺកម្លាំងនគរបាលខណ្ឌពោធិសែនជ័យបានជិះល្បាតក្នុងមូលដ្ឋានរបស់ខ្លួន ដើម្បីទប់ស្កាត់រាល់បទល្មើស ស្រាប់តែឃើញជនសង្ស័យជិះម៉ូតូម្នាក់ឯង ដោយមានការសង្ស័យ ក៏បានហៅសួរនាំ ឆែកឆេររកឃើញកាំភ្លើងខ្លី១ដើមអត់មានលិខិតបេសកកម្ម និងរកឃើញថ្នាំញៀនចំនួន ទើបឃាត់ខ្លួននាំមកកាន់អធិការដ្ឋាននគរបាលខណ្ឌពោធិសែនជ័យ ធ្វើការសាកសួររួចមក ជនសង្ស័យឆ្លើយសារភាពថា រូបគេមានបក្ខពួកមួយចំនួនទៀត ដូច្នេះកម្លាំងរបស់លោកក៏បានធ្វើការស្រាវជ្រាវ រហូតតាមចាប់បានជនសង្ស័យម្នាក់ទៀតឈ្មោះ ទុំ សុវណ្ណារើន ភេទប្រុស អាយុ២៨ឆ្នាំ មុខរបរមិនពិតប្រាកដ កាលពីវេលាម៉ោង១៤ និង៣០នាទី ថ្ងៃទី២៣ ខែកក្កដា ឆ្នាំ២០១៥ នៅចំណុចផ្ទះជួលភូមិចាក់ជ្រូក សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ រកឃើញវត្ថុតាងមួយចំនួនទៀត។
លោកនាយរងផ្នែកនគរបាលព្រហ្មទណ្ឌពោធិសែនជ័យប្រាប់បន្តឲ្យដឹងថា ជនសង្ស័យទាំង២នាក់ រួមទាំងវត្ថុតាង កម្លាំងរបស់លោក នឹងដឹកបញ្ជូនទៅកាន់តុលាការ នាព្រឹកថ្ងៃទី២៥ ខែកក្កដា ដើម្បីផ្តន្ទាទោសតាមច្បាប់ ៕សុខា សែនជ័យ
