ភ្នំពេញ៖ អគ្គិភ័យមួយបានឆាបឆេះបន្ទប់ផ្ទះជួលមួយកន្លែងយ៉ាងខ្លាំង បន្ទាប់ពីមានការឆ្លងចរន្តអគ្គីសនីពីខ្សែភ្លើងដែលនៅក្នុងបន្ទប់កើតហេតុបង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋនាំគ្នាអន្តរាគមន៍យកទឹកបាញ់ពន្លត់ រលត់ទៅវិញ មុនពេលរថយន្តពន្លត់អគ្គិភ័យចុះទៅដល់កន្លែងកើតហេតុ។
ហេតុការណ៍នេះបានកើតឡើងកាលពីវេលាម៉ោង១០ និង៣០នាទីយប់ថៃ្ងទី៨ ខែឧសភា ឆ្នាំ២០១៦ នៅចំណុចផ្ទះល្វែងដែលមានយីហោ កាហ្វេសំណាងល្អ តាមបណ្ដោយផ្លូវ១០៣ ក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ ។
តាមប្រភពព័ត៌មានពីប្រជាពលរដ្ឋដែលនៅក្បែកន្លែងកើតហេតុ បានឲ្យដឹងថា មុនពេលកើតហេតុ គេបានឭសូរសម្លេងផ្ទុះ ចេញពីចំណុចខ្សែរភ្លើងដែលនៅក្នុងបន្ទប់កើតហេតុខាងលើ ខណៈ នោះស្រាប់តែឃើញមានអណ្តាតភ្លើងឆាបឆេះឡើងយ៉ាងខ្លាំង រួមទាំងផ្សែងយ៉ាងក្មួរខ្មាញ់ផងដែរ ហើយខាងម្ចាស់បន្ទប់និងអ្នករស់នៅក្បែរបានស្រែកផ្អើលឆោឡោនាំគ្នាយកបំពង់ពន្លត់អគ្គិភ័យដែលនៅតាមផ្ទះរៀងៗខ្លួនជាច្រើនបំពង់យកមកបាញ់ និងអ្នកខ្លះយកទុយោទឹកមកត និងធ្វើការបាញ់ពន្លត់ភ្លើងដែលកំពុងឆាបឆេះខាងលើនេះ រហូតប្រើពេលវេលាប្រហែលកន្លះម៉ោងទើបប្រជាពលរដ្ឋបានបាញ់រលត់ទៅវិញជាស្ថាពរ ក្រោយពីប្រជាពលរដ្ឋនាំគ្នាជួយបាញ់ពន្លត់រួចមកទើបរថយន្តពន្លត់អគ្គិភ័យជា
ច្រើនគ្រឿងមកដល់ផងដែរ ។ ដោយឡែកក្នុងហេតុការណ៍នេះដែរបានបណ្ដាលឲ្យនារីម្នាក់បានដួលសន្លប់ ផងដែរដោយសារតែមានការភ័យតក់ស្លុតនឹងគ្រោះអគ្គិភ័យនេះ ហើយត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅមន្ទីរពេទ្យភ្លាមៗផងដែរ។
សំណាងល្អហើយដោយប្រជាពលរដ្ឋមានការសហការណ៍គ្នាបានល្អ និងមានបំពងពន្លត់អគ្គិភ័យត្រៀមទុកនៅក្នុងផ្ទះទុកការពារក្នុងគ្រាមានអាសន្ន និងជួយទប់ស្កាត់បានទាន់ពេលវេលា តែក្នុងហេតុការណ៍នោះមិនបង្កឲ្យរាលដាលដល់ផ្ទះអ្នកក្បែរខាងនោះទេ៕
ដោយ៖ ព្រែកជ័យ
