ភ្នំពេញ៖ ហេតុការណ៍ភ្ញាក់ផ្អើលមួយបានកើតឡើងខណៈដែលបុរសពិការជើងម្នាក់ដែលជាជនអនាថា បានដើរឆ្លងផ្លូវដោយកាន់ឈើជ្រត់ ហើយត្រូវរថយន្តស្ទួច១គ្រឿងបានបើកកិនបែកក្បាលធ្លាយខួរស្លាប់ភ្លាមៗនៅកន្លែងកើតហេតុ ចំណែកឯរថយន្តបង្កបើកគេចខ្លួនបាត់ស្រមោលតែម្តង ។
ករណីគ្រោះថ្នាក់ចរាចរខាងលើនេះ បានកើតឡើងកាលពីវេលាម៉ោង៥និង១០នាទីព្រឹកថ្ងៃទី៩ ខែឧសភា ឆ្នាំ២០១៥ នៅមុខសណ្ឋាគាររីវើផាឡេស ក្រោមស្ពានជ្រាយចង្វា ផ្លូវជាតិលេខ៥ ក្នុងសង្កាត់ស្រះចក ខណ្ឌដូនពេញ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅពេលកើតហេតុនៅគេឃើញគាត់ដើរពីត្បូងទៅជើងលុះមកដល់មុខសណ្ឋាគាររីវើ ផាឡេសក៏ឆ្លងផ្លូវ ហើយត្រូវរថយន្តស្ទួចបើកមកពីក្រោយបុកនឹងកិនពីលើបែកក្បាលស្លាប់ភ្លាមៗតែម្ដងរួចរថយន្តបានបន្ថែមល្បឿនគេចខ្លួនបាត់។ ដោយសារតែនៅព្រឹកព្រលឹមនៅតាមផ្លូវនៅមានសភាពស្ងាត់ទើបគ្មានអ្នកណាឃាត់រថយន្តនោះបាន។
បច្ចុប្បន្នសពត្រូវបានសមត្ថកិច្ចដឹកយកទៅវត្តសំបួរមាសដើម្បីធ្វើការបូជាព្រោះគ្មានសញ្ញតិនោះទេ ៕
ដោយ៖ ស ដារ៉ា
